1 Ma xhupa si gubidxa cayaadxa para ganda laní pascua, ne saa ra ro cabe pan sin levadura. Ne ma cuyubi si ca xaíque sti ca sacerdote ne ca maistru de ley quixhe ca trampa Jesús para inaaze ca laabe ne guuti ca laabe. 2 Peru na ca pa ganda cadi gaca ni ndaani pe saa que, ti cadi cui zisi binni.

3 Nuu Jesús Betania ralidxi Simón ni gupa lepra que. Ne laga zuba be ruaa mexa', beeda ti gunaa bedané ti frascu dxa de aceite rindá' naxhi ni nabé risaca. Ne gundaa frascu que bichá aceite que ique be. 4 Ne bidxiichi caadxi de cani nuu raqué ne uní' saa ca', na ca':

―Xiñee biniti si aceite rindá' naxhi ri'. 5 Purti ñanda nidoo ni chonna gayuaa denariu para ñaazi lú ca pobre.

Para gudinde né cabe gunaa que. 6 Peru na Jesús rabi laacabe:

―Zaa nuu be. Xiñee cuchiiña tu laabe. Jneza ni bi'ni be ri para naa. 7 Ca pobre la? qué ziuu dxi guiaadxa ca lade tu, ne ora tiica gapa tu gana zanda acané tu laaca', peru naa la? zadxiña dxi ma qué ziuaa nia laatu. 8 Ne laabe ma bi'ni be biá' gunda. Neca ca'ru ganda ora igaache', ma bichá be aceite rindá' naxhi ri lade'. 9 Gabe ca' laatu, ratiica güi cabe stiidxa Dios ndaani idubi naca guidxilayú ri', zuzeete cabe ni bi'ni be, ti cadi guiaanda be.

10 Oraque uyé Judas Iscariote, tobi de lade doce discípulu stibe que, ra nuu ca xaíque sti ca sacerdote, yeutoo Jesús. 11 Ne ora bina diaga cabe xi na Judas la? bieche cabe ne bidii stiidxa cabe laa icaa bidxichi. Ne dede dxi que, ma cuyubi si Judas ximodo ganda uluí' laacabe Jesús.

12 Ne primé ca dxi bizulú saa ra ro cabe pan sin levadura, dxi ruuti cabe dendxu para pascua que, na ca discípulu rabi laabe:

―Paraa racala'dxu chi guni chaahui du para go xhi lu pascua ri'.

13 Para na be rabi be chupa de ca discípulu que:

―Laché ndaani guidxi. Raqué zadxaaga tu tobi hombre ziné ti rii nisa, ne lachinanda laa. 14 Laguiuu ra guiuu be, lagabi xpixuaana yoo que: “Na Maistru uná nga cuartu ra go xhi né ca discípulu pascua ri'.” 15 Ne zuluí' be laatu ti cuartu xilaga ni nuu luguiá' ne maca nuu ni listu. Raqué laguni chaahui para laanu.

16 Para biree ca discípulu que ze', ne yendá ca ndaani guidxi, ne casi gudxi Jesús laaca que, zaqué biree ni. Bidxela ca ni, ne gudixhe chaahui ca endaró xhi para pascua que.

17 Ne huaxhinni que la? bedané be ca discípulu stibe. 18 Gurí cabe ruaa mexa' ne bizulú cayó cabe. Para rabi be laaca':

―Gabe ca' laatu, tobi de laatu ni cayó né naa rarí', zutoo naa.

19 Oraque ucaná ladxidó' cabe ne cada tobi na rabi laabe:

―Ñee naa la?

Ne stobi na:

―O naa.

20 Para rabi be laaca':

―Laabe nga tobi de lade cani cugadxe né naa pan ndaani bladu ri'. 21 Naa nga Hombre Biseenda Dios, ne napa xidé gate' casi cá lu Xqui'chi Dios de naa. Peru gapa gá si ni utoo naa que laa. Jma galán ñaca para laa pa qué ñale.

22 Ne ra cayó cabe que, gucuaa Jesús ti pan, guluu ndaaya ni, para gundaa ni ne bidii ni laacabe. Ne na rabi laacabe:

―Laicaa. Ndi nga cuerpu stinne'.

23 Oraque ucuaa be ti copa, ne bidii be diuxquixe Dios, para bitiidi be ni lu ná cabe ne irá cabe güe' cabe ruaa copa que. 24 Ne laca gudxi be laaca':

―Ndi nga rini stinne ni chi ixii pur stale binni, ne ra ixii ni zaguixhe Bixhoze ti modo cubi chu' né binni laa tobi si. 25 Ne gabe ca' laatu, ma qué zee rua' nisa uvas dede ora ganda dxi guee ni sti tiru ra runi mandar Dios.

26 Biluxe biinda si cabe ti cantu, para biree cabe ze cabe lu dani Olivo.

27 Oraque na Jesús rabi laacabe:

―Pur irá ni chi gaca yanna gueela la? zusaana tu naa. Purti sicarí cá lu Xqui'chi Dios: “Zunena'ya pastor sti ca dendxu' ne zareche ndase ca'.” 28 Peru dxi guiasa de lade gue'tu la? ziaa Galilea ne raqué cueza laatu.

29 Oraque na Pedru:

―Neca irá cabe usaana cabe lii peru naa qué zusaana dia' lii.

30 Para na Jesús rabi laabe:

―Gabe ca' lii, yanna gueela ca, ante gu'nda gallu chupa tiru la? chonna tiru zaníu' qué runibióu' naa.

31 Peru qué ñaana dxi be na be:

―Neca napa xidé gate nia lii peru qué ziuu dxi inié qué runebia'ya lii.

Ngue ca na irá cabe.

32 Yendá Jesús ne ca discípulu sti' ti lugar lá Getsemaní. Para rabi be ca discípulu que:

―Lacuí rarí', laga chi inié nia Dios.

33 Para ucuaa be Pedru ne Jacobo ne Juan, bixele né be laaca ti ladu, ne bizulú uyuu be triste ne ucaná ladxidó' be. 34 Para rabi be laaca':

―Nabé cayacaná ladxiduá' ne enda naná para guuti. Laguiaana rarí' ne lagataná.

35 Ne bixele be zitu huiini de laaca ne bizuxibi be layú, gunaba be lu Dios pa ganda cadi tidi be enda naná ni chi tidi be que. 36 Ne ra caní' né be Dios que na be:

―Bixhoze', para lii gasti ni nagana, bilá naa de enda naná ri', peru cadi aca ni rabe', sínuque ni na lu' nga gaca'.

37 Oraque uyé be ra nuu ca discípulu. Yendá be laaca nisiaasi ca', para rabi be Pedru:

―Simón, nisiaasi lu la? Ñee qué ñanda ñataná lu neca ti hora la? 38 Lagataná ne lainí' né Dios ti cadi uquiinde binidxaba laatu. Neca ndaani ladxidó' to racala'dxi tu guni tu jneza, peru cuerpu stitu, nagueenda riguudxi.

39 Bigueta yení' né be Dios sti tiru, ne laca ngue ca uní' be. 40 Ne bigueta be ra nuu ca discípulu ne laca bedandá be laaca nisiaasi ca', purti nabé nuu bacaanda lú ca'. Ne qué idxela ca xi gabi ca laabe. 41 Bigueta be raguionna tiru de yení' né be Dios ne rabi be laaca':

―Yanna huaxa lagasi ne laiziila'dxi, ma bia'cati, purti naa nga Hombre Biseenda Dios ne ma bidxiña hora utoo cabe naa lu ca binni malu. 42 Laguiasa, chuu nu. Ma zeda dxiña ni chi uluí' naa.

43 Caní' ru be ora bedandá Judas, tobi de lade doce discípulu stibe que, bedané stale binni ni biseenda ca xaíque sti ca sacerdote ne ca maistru de ley ne ca xaíque sti guidxi, naaze ca espada ne palu.

44 Ne maca bidii Judas ti seña laacabe, na rabi laacabe:

―Ni gahua ti bixidu lucuá la? ngue nga laabe. Lainaaze laabe ne lachiné laabe.

45 Ne casi yendá Judas ra nuu be bidxiña laabe ne rabi laabe:

―Maistru.

Ne gudó ti bixidu lucuá be. 46 Oraque uluu ná cabe laabe para chiné cabe laabe.

47 Peru óraque guxha tobi de cani nuu né laabe raqué espada, ne bigá ti chu diaga ti jmozo sacerdote gola. 48 Oraque rabi be ca xcaadxi que:

―Ñee gubaana zeda naaze tu la? Né pe tu espada ne palu. 49 Irá ca dxi uyuaa lade tu ndaani yu'du ro', qué ñuni tu pur ninaaze tu naa. Peru cayaca ni sicarí ti iree ni modo cá lu Xqui'chi Dios.

50 Ne óraque bixooñe irá discípulu que, bisaana ca laabe stubi be.

51 Peru yenanda ti hombre huiini laabe, renda ti lari gueela si, ne gunaaze ca binni que laa. 52 Peru óraque bixooñe xie ladi, bisaana lari que.

53 Yené cabe Jesús ra nuu sacerdote gola ne bidxiña irá ca xaíque sti ca sacerdote ne ca xaíque sti guidxi ne ca maistru de ley raqué. 54 Ne yenanda Pedru laabe zitu zitu dede lu patiu sti sacerdote gola ne gurí ra nuu ca gendarme cadxaa cue' gui.

55 Ne cuyubi ca xaíque sti ca sacerdote ne irá ni naca justicia sti ca judíu tuuxa iní' paraa pe bichee Jesús ti gapa ca xi pur gati be. Peru qué nidxela ca'. 56 Nuu stale ni cabee falsu luguiá be, peru adxé adxé ni na ca'. 57 Oraque biasa xcaadxi na:

58 ―Laadu bina diaga du uní' be zuxhá be yu'du ro' ni bicuí binni, ne lu chonna gubidxa zucuí be stobi peru ma cadi binni ucuí ni.

59 Peru nin ne zaqué qué ñanda ñuu cabe tobi si de ni caní' cabe que.

60 Oraque bizuhuaa sacerdote gola lade cabe ne na rabi Jesús:

―Qué gapu xiixa iníu' la? Xi ra'bu de ni cugaani cabe luguiá lu ri ya'.

61 Peru qué niní' Jesús gasti'. Bigueta na sacerdote gola que rabi laabe:

―Ñee lii nga Cristu Xiiñi Dios la?

62 Para rabi be laa:

―Naa pue. Ne zuuya tu Hombre Biseenda Dios zuba cue' Dios ni nandxó', ne zuuya tu laa zeda yete de xaibá' lade za.

63 Oraque gucheza sacerdote gola que xhaba ne na:

―Xi jma ru caquiiñe ganna nu, 64 purti ma bina diaga nu ni de ruaa pe be. Yanna ya', xi na tu.

Para na irá cabe napa be xidé gati be.

65 Ne bizulú caadxi de laaca bichá xhinni ca ladi be. Biseegu ca lú be ne gudiñe ca laabe ne na ca iní' be tu bi'ni ni, ne laca udapa ca gendarme que laabe.

66 Nuu Pedru ndaani patiu que ora beeda ti criada sti sacerdote gola, 67 ne ora bi'ya zuba be cue' gui que cadxaa be la? biiya dxí laabe ne rabi laabe:

―Lii laca uzá neu Jesús de Nazaret.

68 Peru qué niná niní' pa xpinni be laa, sínuque na rabi badu dxaapa que:

―Nin qué runebia'ya laabe ne qué ganna xii nga nou'.

Ne biree yeuzuhuaa ra puerta'. Oraque biinda gallu. 69 Bigueta biiya dxí criada que laabe sti tiru ne na rabi cani nuu raqué:

―Hombre ri', laca tobi de laacabe laa.

70 Peru laca bini negar Pedru sti tiru. Ne qué nindaa de ngue na cani zuba raqué rabi laabe:

―Dxandí laca de laacabe lii purti binni Galilea lii ne riníu' modo riní' cabe.

71 Oraque bizulú Pedru bini jurar ne na:

―Gunidé Dios naa pa cusiguiee'. Qué runebia'ya dia' hombre ni na tu ca.

72 Ne óraque biinda gallu rairopa tiru ne bietenala'dxi be ca diidxa ni gudxi Jesús laabe que: ante gu'nda gallu chupa tiru, zaní' be chonna tiru qué runibiá' be laa. Ne ora bedasilú nga laabe la? biina be.