1 Ora birá gueela bidxiña ca xaíque sti ca sacerdote ne ca xaíque sti guidxi ne ca maistru de ley ne irá ni naca justicia sti ca judíu, ne gupa ca ti junta. Ne biluxe si junta que, ucuaa ca Jesús bindiibi ca ne yesaana ca laabe ra nuu Pilatu. 2 Para na Pilatu rabi laabe:

―Ñee lii nga rey sti ca judíu la?

Para rabi be laa:

―Lii caníu' ni.

3 Ne óraque guluu ca xaíque sti ca sacerdote xqueja be de irá modo. 4 Bigueta unaba diidxa Pilatu laabe sti tiru, na rabi laabe:

―Ñee qué zaníu' gasti de irá ni cugaani cabe luguiá lu ri la?

5 Peru nin ti diidxa qué niní' be ne nabé bidxagayaa Pilatu.

6 Cada iza saa que rundaa Pilatu ti presu para ca binni que, tutiica inaba ca'. 7 Ne yeguyoo ti hombre ca dxi que lá Barrabás, laa ne ca xpinni, purti bicaa lú ca gobiernu ne biiti ca stale binni. 8 Oraque beeda ca binni que ra nuu Pilatu ne gudxi ca laabe guni be casi runi be irá iza. 9 Para na Pilatu rabi laacabe:

―Ñee racala'dxi tu undaa Rey sti ca judíu ri para laatu la?

10 Uní' Pilatu zaqué purti nanna bedané ca xaíque sti ca sacerdote Jesús ra nuu purti si cadxiichi ca xiñee rinanda binni laabe. 11 Peru maca bisiene ca ca binni que inaba ilaa Barrabás. 12 Oraque na Pilatu rabi laacabe:

―Xi racala'dxi tu gune nia ni na tu Rey sti ca judíu ri ya'.

13 Para bicaa cabe ridxi:

―¡Icá be lu cruz!

14 Oraque na Pilatu:

―Xiñee, xi huayuni be.

Peru bigueta bicaa cabe ridxi sti tiru:

―¡Icá be lu cruz!

15 Peru Pilatu racala'dxi guiaana bien ne ca binni que; ngue runi bindaa Barrabás, para bini mandar idiiñe Jesús ne bidii laabe icá be lu cruz.

16 Oraque gucuaa ca soldadu que Jesús, yené ca laabe lu patiu sti palaciu ne bidxiña idubi naca batallón laabe. 17 Bigacu ca laabe ti lari moradu ne bizá' ca ti la'pa de guichi guluu ca ique be. 18 Ne bizulú bicaa ca ridxi:

―¡Viva Rey sti ca judíu!

19 Ne bigaze ca ti gueere ique be ne bichá xhinni ca ladi be ne bizuxibi ca xañee be. 20 Biluxe bini burla si ca laabe zaqué la? gulee ca lari moradu que ladi be ne bigacu ca laabe xhaba be. Para biree ca ziné ca laabe icá be lu cruz.

21 Neza ze cabe que bidxaaga cabe ti hombre de Cirene lá Simón, bixhoze Alejandru ne Rufo, zeeda de gui'xhi', ne biguá' cabe laa cruz sti Jesús.

22 Ne yené cabe Jesús ti lugar lá Gólgota. Ne diidxa Gólgota la? riní' “Lugar sti Calavera”.

23 Ne bidii cabe laabe vinu nucha ti nisa lá mirra peru qué ñe' be ni. 24 Oraque bicaa cabe laabe lu cruz ne gucuaa ca soldadu que xhaba be ne uluu cabe xhaba be lu rifa ne cada tobi ucuaa ni gulee.

25 Siadó' bia' las nueve bicaa cabe laabe lu cruz. 26 Ne bicaa cabe caadxi diidxa xa ique be ni riní' xiñee cayuu xqueja be ne ndi nga ni na ni: “Rey sti ca judíu.” 27 Laca bicaa cabe chupa gubaana cue' be, tobi ladu derechu ne stobi ladu biga'. 28 Ne zaqué biree ni casi cá lu Xqui'chi Dios ra na: “Bitiidi cabe laabe de malu.”

29 Ne irá binni cadi'di ra nuu be cayuni burla ca laabe ne cuniibi ique ca lú be ne na ca':

―Cadi lii nga nou' zuxhá lu yu'du ro' ne lu chonna gubidxa zandisa lu laa sti tiru la? 30 Yanna bilá laca lii ne biete de lu cruz ca.

31 Ne zaqueca bini burla ca xaíque sti ca sacerdote ne maistru de ley laabe, na ca':

―Stobi bilá be peru qué ganda ulá be laca laabe. 32 Pa idu'ya nu guiete Cristu Rey sti Israel de lu cruz ca la? óraque huaxa zuni cre nu laa.

Ne dede cani cá né laabe lu cruz que bini burla ca laabe.

33 Ne bia' galaa dxi, mala bicahui ibá' ne zaqué biaana ni dede gunda huadxí bia' las tres. 34 Ne bia' las tres que bicaa Jesús ridxi:

―¡Eloi, Eloi, lama sabactani! Didxazá la? niní' be: Dios stinne', Dios stinne', xiñee ma bisaanu naa.

35 Bina diaga caadxi de cani nuu raqué cucaa be ridxi para na ca':

―Laucaa diaga, cucaa ridxi be Elías.

36 Ne beda uxooñe tobi gucuaa ti esponja bigadxe de vinagre ne gudixhe ni ique ti gueere', ne bidii ni gue be, ne na:

―Lacueza, idu'ya nu pa gueda ndete Elías laabe.

37 Oraque bicaa Jesús ti ridxi ne guti. 38 Ne gureza cortina ni nuu ra yu'du ro' chupa ndaa de punta punta. 39 Ne ora bi'ya capitán ni zuhuaa lú be que modo bicaa be ridxi ne modo guti be la? na:

―Dxandí Xiiñi Dios hombre ri'.

40 Laca nuu caadxi gunaa raqué cayuuya ca de zitu. Ne lade ca gunaa que nuu María Magdalena ne Salomé ne María jñaa Jacobo huiini ne José. 41 Uzá nanda cabe Jesús ne ucané cabe laa dxi uzá Galilea. Cadi laasi cabe sínuque nuu ru stale ni yenanda Jesús Jerusalén.

42-43 Ma huadxí uyé José de Arimatea ra nuu Pilatu. Naca José tobi ni risaca lade ca justicia sti ca judíu, ne laca cabeza idxiña dxi guni mandar Dios. Viernes huadxí cayaca irá ndi', ma para uzulú dxi enda riziila'dxi'. Nga runi oraqueca uyé José, yenaba cuerpu sti Jesús, ne qué nutuí lú yenaba ni.

44 Bidxagayaa Pilatu pabiá' nagueenda guti Jesús, ne bisenda caa be capitán que ne unaba diidxa be laa pa dxandí ni. 45 Oraque na capitán que dxandí ni, para bidii Pilatu lugar ucuaa José cuerpu sti Jesús. 46 Oraque uzí' José ti lari gueela cha'hui', gundete be cuerpu que ne bichenda be lari gueela que. Ne óraque uluu be ni ndaani ti ba' ni gudaañe cabe cue' guie ne biseegu be ti guie ruaa ba' que. 47 Ne biiya María Magdalena ne María jñaa José ra bicaachi cabe Jesús.