1 Liꞌá enu rnibiyaꞌ lubee saꞌahua enu nzeli arquiaꞌahua Jesucristo, rquieꞌa carta quieꞌ luhua liꞌihua enu ucañila Diose, liꞌihua enu nzeli arquiꞌ Jesucristo enu rni nu neli neca. Liꞌá neli seꞌca liꞌihua nu laca tucutsia liꞌá seꞌca liꞌihua, leꞌca seca ye bee bene enu nzeli arquiꞌ Diose liꞌihua. 2 Liꞌá seꞌca liꞌihua xne nchiñi Stichiaꞌ Diose arquiaꞌahua nu siempre nehuañine cuna liaꞌahua. 3 Paꞌahua Diose cuna Lliꞌñinu Jesucristo, riꞌinu nu cha nzeꞌca lu cuendaꞌhua nu huaꞌa arquiꞌnu liꞌihua cuna nu liquiꞌnu nú nzuxee arquiꞌhua, xne nzequieehua stichiaꞌnu, nu liꞌinu secanu liꞌihua. Diose rnibiyaꞌ nú zecaꞌahua bee saꞌahua. 4 Chiquiꞌ ñia utsu arquia chenu ungabiya nu nuꞌ bee saꞌlu enu neli nzequie Stichiaꞌ Diose, nu nehuañi beella tucu nu rnibiyaꞌ Paꞌahua Diose. 5 Tucu nú seꞌca liꞌihua, ye bee enu neca saꞌahua ziquia luhua nu rquiꞌña nu zecahua bee saꞌahua. Nu lunú rnia luhua nee la necuqui necane, leꞌca liꞌi mandamiento quieꞌ neca nú ubeneꞌlaꞌhua hasta chenu uquixie nú ubeneꞌhua Stichiaꞌ Diose. 6 Tunu seꞌcaꞌahua Diose rriaꞌahua tucu nu rnibiyaꞌnu; nu lunú rnibiyaꞌ Diose nú ubeneꞌahua desde chenu uquixie nú ubeneꞌahuane necane nu rquiꞌña nú zecaꞌahua bee saꞌahua

7 Rquieꞌa bee nucuaꞌ luhua xne diqui lu iliulabe enzee huaxi bee bene enu sequienu bee bene, nu la chili arquiꞌbeei nú ubeꞌta Jesucristo lu iliulabe xi neca tucu bene. Nu bee enu rriꞌi scua sequienu beei bee bene, nu liꞌibeei neca beei enu rriꞌi condra Jesucristo. 8 Ubiꞌyahua liꞌihua para nu la nitihua lunú rialahua, equie nu rriꞌihua lunú niarquiꞌ Diose. 9 Tatse bene enu sucuꞌ equielá tucu nu uzeteꞌ Jesucristo bee bene, liꞌilla la nehuañilla cuna Diose, pero enu nzequie stichiaꞌ Jesucristo tucu nu uzeteꞌnu bee bene, liꞌilla nehuañilla cuna Diose nu cuna Lliꞌñinu. 10 Tunu nuꞌ enu rriña niꞌhua para nu zeteꞌ nzeꞌe liꞌihua tucu nu nzeli arquiꞌ nzeꞌe nu la necane tucu nu uzeteꞌ Jesucristo bee bene, la duꞌhua nzeꞌe liñi niꞌhua nu la riꞌihua caso lunú rni nzeꞌe. 11 Xne bee bene enu rriꞌi caso stichiaꞌ bene cuaꞌ neca conformella lunú sequienu bene cuaꞌ bee bene. Último bedichiaꞌ nú rni lu carta quieꞌ.

12 Huaxi beenú niarquia nia luhua, pero la niarquia nu quieꞌene lu carta. Nzuquia nú nzela biꞌya liꞌihua para nú liꞌi eꞌcua nia luhua, nu scua junto ñia tsu arquiaꞌahua.

13 Bee bene enu ucañi Diose, liꞌihua bee saꞌa enu nzeli arquiaꞌahua Jesucristo enu nucuaꞌa caꞌa, xeꞌla beella saludo luhua. Amén.