1 Liꞌá enu rnibiyaꞌ lubee saꞌahua enu nzeli arquiaꞌahua Jesucristo, rquieꞌa carta quieꞌ lulu Gayo enu rquietea, liꞌilu enu chiquiꞌ seꞌca. 2 Tucu nu seꞌca liꞌilu, scua rnacua lu Diose lu cuendaꞌlu nu tucu nú nzequiee nzeꞌcalu inziuꞌ Diose, leꞌca scua chiuꞌu nzeꞌcalu lunú rriꞌilu nu luꞌculu elunaaqui. 3 Chiquiꞌ ñia utsu arquia chenu ubeꞌta chiucu chuna bee saꞌahua enu uni lua nú nehuañilu tucu nú rni Stichiaꞌ Diose. 4 Leca niꞌ tucu nú riꞌi nu máse ñia nzu arquia chenu ubenea nu neli nehuañi bee saꞌahua tucu nú rni Stichiaꞌ Diose. 5 Tucu nú seꞌca liꞌilu Gayo, liꞌá nia lulu nú chiquiꞌ neca nzeꞌca nú rriꞌilu lubee saꞌahua enu nzeli arquiaꞌahua Jesucristo, nu máse neca nzeꞌca nu rriꞌilu lubee saꞌahua enu nzeꞌta stucu luhuare. 6 Xne liꞌibeella uni beella ante lu ye bee saꞌahua enu nzeli arquiaꞌahua Jesucristo nu uriꞌi nzeꞌcalu lubeella. Enzeꞌe rriꞌi nzeꞌcalu tunu rriꞌilu elietsa lubeella para nu cheriꞌi beella seidu viaji nú nzuebeella, xne nucuaꞌ riuꞌ arquiꞌ Diose nú riꞌilu. 7 Xne liꞌibeella uchiuꞌu beella para nú nzetixiuleꞌe beella stichiaꞌ Jesucristo lubee bene, nu né nacuꞌ beella niꞌ tucu elietsa lubee bene enu la chili arquiꞌ Jesucristo. 8 Enzeꞌe liaꞌahua enu nzeli arquiaꞌahua Jesucristo rquiꞌña nú riaꞌahua elietsa lubee bene enu rixuleꞌe stichiaꞌnu, xne scua rriaꞌahua elietsa lubeella para nú riꞌi bee bene beyaꞌ lunú neli neca.

9 Liꞌá uquieꞌela tucu carta lubee saꞌahua enu nzeli arquiaꞌahua Jesucristo, pero Diótrefes riuꞌ arquiꞌi nú nibiyaꞌi, enzeꞌe la riꞌi casoi stichiaꞌa. 10 Enzeꞌe, tunu nzelabiꞌya liꞌihua, che nia lui xne seꞌtai liaꞌahua nu rni eluquichiaꞌ equie cuendaꞌ liaꞌahua. Nu la riꞌi nucuaꞌtsia, leꞌca la deteꞌi niꞌi yaꞌna bee saꞌahua enu nzeꞌta stucu luhuare, nu leꞌca la zelai nú deteꞌ bee saꞌahua niꞌi beella para nú yaꞌna bee saꞌahua enu nzeꞌta stucu luhuare, nu liꞌibeella enu rdeteꞌ niꞌi nú riaꞌna bee saꞌahua la zelai nu chuꞌu beella liñi indu. 11 Saꞌa enu nzeli arquiaꞌa Jesucristo enu chiquiꞌ seꞌca, la chequieelu nu necha neca, uriꞌi tucu nu neca nzeꞌca. Xne bene enu rriꞌi nu neca nzeꞌca liꞌilla necalla beneꞌ Diose, pero bene enu nzequie inziu nu necha neca la chululla Diose.

12 Nu equie cuendaꞌ Demetrio ye bee bene rni nu nehuañilla tucu nu rni Stichiaꞌ Diose, nu chee rlubeꞌ nu xa nehuañilla. Hasta liꞌiru rniru nú ñia rriꞌilla, nu liꞌilu nediyaꞌlu nu neli nú rniru.

13 Huaxi nu niarquia nú nia lulu, pero la niarquia nu quieꞌene lu carta. 14 Xne nzuquia nú la leaꞌ nzelabiꞌya liꞌilu, che bedichiaꞌlaꞌa.

15 Diose liquiꞌ nú nzuxe arquiꞌhua. Bee enu rquieteꞌ liaꞌahua enu nucuaꞌa caꞌa xeꞌla beella saludo lulu, leꞌca uriꞌi saludar ye bee enu rquieteꞌahua.