1 Na' Spiritw c̱he Diosen' ba ben' diža' ḻi cont šejni'icho žin ža cate' baḻ beṉe' yesebejyic̱hje' diža' ḻi c̱he Diosen' dan' chejḻe'cho na' yesejḻe'e c̱he bi da' yeson da' x̱igüe' ca' cont yesex̱oayaguen ḻegaque'. 2 Da' x̱igüe' ca' yesonen cont ṉita' beṉe' yosozejni'ide' diža' güenḻaže' da' siyen' beṉe', na' beṉe' ca' yosozejni'ide' diža' güenḻažen' bibi yesacde' ḻo' yic̱hjlažda'ogüe' caten' yeseziye'e beṉe'. 3 Yosožone' yosošagna' beṉe' na' yosožone' ye'ej gagwcho baḻ yeḻa' guagw, ḻa'czḻa' Diosen' bene' cont zjade yeḻa' guagw ca' cont chio' chonxencho Criston' na' nombia'cho diža' ḻi c̱hen' gagwchon na' güe'cho yeḻa' chox̱clen c̱he'. 4 Yogo' dan' ben Diosen' naquen güen na' bi naquen da' gue'echo, con še güe'cho yeḻa' chox̱clen c̱he' caten' gagwchon. 5 Na' ṉezecho guac gagwcho bite'teze yeḻa' guagw, ḻe ba gwna Diosen' naquen güen, na' güe'cho yeḻa' chox̱clen c̱he' cate' gagwchon.

6 Ca nac beṉe' ḻjež chio' chonxencho Jesucriston', cheyaḻa' gwzejni'ido' ḻegaque' da' quinga ba gwnia' le' cont gacleno' ḻegaque' can' chazlaže' Jesucriston', ḻe gwleje' le' cont gwzejni'ido' beṉe'. Ḻecz gonen c̱hac̱hlažo' še gwzejni'ido' beṉe' xtiža' Diosen' dan' chejḻe'cho, ḻe naquen to diža' güen, na' ba bzenago' c̱hen do yic̱hj do lažo'. 7 Bi gwzenago' c̱he diža' güenḻaže' dan' chesaljlaže' beṉe' bi chesonxene' Diosen'. Ben byen soaczo' gono' can' chazlaže' Diosen'. 8 Ṉezecho cate' chda ṉi'a na'cho chaclenen cuerp c̱hechon' late'. Perw na' cate' choncho can' chazlaže' Diosen', chaclenchen chio' cont zoa chbezcho binḻo ṉa'a na' ḻecz ca' cate' šjayzoacho len ḻe' toḻi tocaṉe. 9 Can' ža to diža' dan' zaca' šejḻe'cho na' dan' zaca' gwzenagcho c̱hen do yic̱hj do laže'cho. 10 Na' cont choncho can' chazlaže' Diosen', da'nan' chonchguacho xšinen' na' chyo chc̱hejlaže'cho cate' chzi'diža' beṉe' chio', ḻe ṉezecho Diosen' zoe' toḻi tocaṉe na' zoacho lez gone' güen len chio'. Ḻe' chaclaže' gwnežjue' yeḻa' mban toḻi tocaṉe c̱he yogo' beṉac̱h, na' can' nacczen gone' len beṉe' chesejnilaže' Jesucriston'.

11 Da'nan' bzejni'i beṉe' da' ca' ba gwnian' na' ben mandadw yosozenague' c̱he yogo'czen. 12 Bi go'o latje yosozoa beṉe' le' šḻa'ale lagüe da' naco' beṉe' xcuide'. Len xtižo' na' len da' chono' ben güen cont yogo' beṉe' chesejnilaže' Criston' yesape' le' bala'aṉ. Len xtižo' na' len da' chono' blo'e ḻegaque' ca cheyaḻa' yesacde' Diosen' na' beṉe' ḻježgaque', ca cheyaḻa' yesenita'c̱hac̱he' yesejnilaže'ne' na' ca cheyaḻa' yesaque' beṉe' laždao' xilaže'. 13 Na' ṉa'a šlac biṉa' yida' da' yoble, gwlec yic̱hjo' gwlabo' Xtiža' Diosen' dan' nyojen len beṉe' ca' chesedop chesežag chesonxene' Jesucriston'. Na' gwṉeyoede' yosozenague' c̱hen na' bzejni'ide' bi zejen. 14 Bi gatlažo' dan' gwlo'o Diosen' ḻo nao' gono' caten' gosex̱oa na' beṉe' blao ca' yic̱hjon', beṉe' ca' chosogüia cheseṉe'e ḻjež chio' chonxencho Diosen', bosozende' le' gwlej Diosen' gono' xšinen'.

15 Cheyaḻa' cuec yic̱hjo' do yic̱hj do lažo' gono' da' ca' gwlej Diosen' le' gono' cont yogo' beṉe' yesele'ede' zejcho' chono' da' güen. 16 Na' gwsaco' can' soa cuezo' cont soac̱hac̱ho' gono' con can' chazlaže' Diosen' na' soac̱hac̱ho' gwzejni'ido' beṉe' xtiža' Diosen' con can' naquen. Ben ca' cont gaclenen le' na' ḻecze gaclenen beṉe' ca' chosozenag xtižon' cont šjayzoalenḻe Diosen' cate' žin ža.