1 Še no beṉe' byo gole chone' bi da' mal, bi tiḻo'ne', san gwṉeyoede' cuejyic̱hjen', con ben xbab naque' x̱ao'. Na' še no beṉe' xcuide' chone' bi da' mal, gwṉeyoede' cuejyic̱hjen', con ben xbab naque' beṉe' bišo'. 2 Na' še no no'ol gole chone' bi da' mal, gwṉeyoede' cuejyic̱hjen', con ben xbab naque' xṉao'. Na' še no no'ol xcuide' chone' bi da' mal, gwṉeyoede' cuejyic̱hjen', con ben xbab naque' beṉe' zano'. Cheyaḻa' gwsaco' cont gaco' beṉe' laždao' xilaže' len ḻegaque'.

3 Chio' chdop chžagcho chonxencho Criston' cheyaḻa' gwnežjwcho da' cheseyažje no'ol ca' ba gosat beṉe' c̱hegaque' še da' ḻi zjanaque' beṉe' chyažj chc̱hine. 4 Perw še nita' no xi'iṉgaque' no xesoagaque', bzejni'ide' ḻegaque' cheyaḻa' yosonežjue' da' cheseyažje no'ol ca', ḻe no'ol ca' ba bososgole' ḻegaque', na' Diosen' chaclaže' yesone' güen len ḻegaque' cont yosolo'e chesejnilaže'ne'. 5 No'ol ca' nono zoa beṉe' gwnežjw ḻegaque' da' cheseyažjde' na' zjanaque' dogualje güezebe, yesenite' lez gaclen Diosen' ḻegaque' na' do ža do yel yesenite' yeseṉabde'ne' gaclene' ḻegaque'. 6 Perw no'ol güezeb ca' chesacde' yesone' con ca žan c̱hegaque', len Diosen' yic̱hjlažda'ogaquen' naquen ca c̱he to beṉe' ba got ḻa'czḻa' ṉe' zjambane'. 7 Ben mandadw ṉec̱he beṉe' ca' chesedop chesežag chesonxene' Jesucriston' yesone' can' žia' nga na' bibi da' mal yesone' da' zaca' no tiḻe ḻegaque'. 8 Še no beṉe' bi chaclene' cont gata' da' chyažje beṉe' zjanac diaža c̱he', ba bzoe' šḻa'ale xtiža' Diosen' dan' chejḻe'cho c̱hen, na' malech chone' ca beṉe' bi chesejnilaže' Jesucriston'. Na' ḻeca da' mal chone' še bi chaclene' beṉe' ḻo' yo'o c̱he'.

9 Quinga ṉezdo' no no'ol güezeb ca' cheyaḻa' gwc̱helo' ḻe'e yiš cont beṉe' ca' chesedop chesežag chesonxene' Jesucriston' yosogüe'ej yosoguagüe'ne' na' yosonežjue' bichle da' cheseyažjde'. Cuejle no'ol gol ca' beṉe' ba gwde gayon iz, no'ole goc toze beṉe' c̱he'. 10 Cuejle con no'ol ca' zjaṉeze beṉe' ba gosonchgüe' da' güen, ca no da' quinga: še bosgole' bi' c̱he' binḻo, še blebe' beṉe' liže', še goclene' yezica'chle beṉe' chesonxene' Diosen', še goclene' beṉe' ca' cheseyi chesezaque', o še ba bene' bite'tezechle da' güen.

11 Beṉe' ca' chesedop chesežag chesonxene' Jesucriston' bi cheyaḻa' yesego'o ḻo na'gaque' yosogüe'ej yosoguague' no'ol güezeb xcuide' ca'. Ḻe no'ol ca', gwžin ža yesaclaže' yosyošagne'e da' yoble, 12 na' yesape' doḻa' še yesebejyic̱hje' xšin Criston' dan' gosec̱hebe' yesone'. 13 Na' ḻecze no'ol güezeb xcuide' ca' bi naquen güen gwco'olaochwne' yeselaže' to to liž beṉe', cont bi yesaque' beṉe' xagüed, na' cont bi yesaque' beṉe' güetob diža'. Bi yeselaže' to to liž beṉe' yesezi'diže' bi chac, ḻe bi cheyaḻa' yesone' dan' nac ca'. 14 Da'nan' chaclaža' no'ol güezeb xcuide' ca' yosyošagne'e da' yoble na' yesezanche' cont yosyosgole' xi'iṉgaque' na' yosogüia yeseṉa' ližgaquen' binḻo, na' bi yesone' cont beṉe' ca' chesegue'ede' chio' yesene' chesone' da' mal. 15 Chnia' ca' ḻe nita' baḻ no'ol güezeb xcuide' ca' ba gosebejyic̱hje' Criston' na' chosozenague' c̱he Satanásen'.

16 Note'tez beṉe' chejnilaže' Criston', še nita' no'ol güezeb ḻo diaža c̱hegaque', cheyaḻa' yosonežjue'ne' da' yese'ej yesagüe' cont bibi da' zed yesone' len beṉe' ca' chesedop chesežag chesonxene' Criston'. Nach con no'ol ca' nono zoa yesaclen ḻegaque', ḻegacze' cheyaḻa' yesego'o ḻo na' beṉe' ca' chesedop chesežag chesonxene' Criston'.

17 Na' ca nac beṉe' blao ba zjanchoj chosogüia cheseṉe'e beṉe' ca' chesedop chesežag chesonxene' Criston' to to yež, še cheseṉe'e beṉe' ca' binḻo, da' xen cheyaḻa' yesacxene', na' cheyaḻa' gwnežjwchone' da' yesacbande'. Na' zaca'che' yesacxene' še cheseyix̱jue'ede' xtiža' Diosen' na' chosozejni'ide' beṉe' bi zejen. 18 Cheyaḻa' yesacxene' na' gwnežjwchone' da' yesacbande', ḻe nyoj Xtiža' Diosen' žan: “Bitw gwseyjwle cho'a go'ṉ cont ca gagwba' cate' chlej chšošjba' trigon' nec̱he choj xen'.” Na' ḻecz nyojen žan: “Beṉe' güen žin cheyaḻa' si' laxjue'.”

19 Bi gono' cuent cate' no beṉe' gagw xya c̱he to beṉe' blao beṉe' nchoj chgüia chṉe'e beṉe' ḻježe' chesonxene' Criston' še bi zoa yeto beṉe' o yec̱hope beṉe' co' da' baḻi. 20 Na' še da' ḻi ba bene' da' malen', cheyaḻa' tiḻo'ne' lao beṉe' ca' chesedop chesežag chesonxene' Criston' cont yezica'chle beṉe' ca' yesežebe' yesone' da' malen' nac ca'. 21 Na' toze can' cheyaḻa' gono' len note'teze beṉe', bitw ṉacho baḻ beṉe' gonxenchguachone' na' yebaḻe' gonchone' nacteze. Na' Diosen' len X̱ancho Jesucriston' na' len angl beṉe' ca' zjanchoj chesone' mandadw c̱he' zjaṉezde' chona' mandadw gono' yogo' da' ca' ba gwnia' nga. 22 Bitw yob cuejo' beṉe' güia ṉe'e ḻježe' cont gague leno' gapo' doḻa' še ben' gwlejon' gone' da' mal. Gwsaco' cont bibi doḻa' gapo'.

23 Na' dan' toḻize chac ḻi'o, bi ye'ejo' toze nis, san güe'ej late' güeje vino.

24 Baḻ beṉe' nacbia' chesone' da' mal na' yogo'ze beṉe' zjaṉezde' can' chesonen' ḻa'czḻa' biṉa' žin ža yesezi'e castigw c̱hen. Na' baḻ beṉe' chesone' da' malen' dan' ngaše' na' da' bi nacbia', perw žin ža gwlo'elaon. 25 Na' ḻecz ca' naquen len beṉe' ca' cheson da' güen, nacbia' še da' güenṉa' chesone', na' ḻa'czḻa' gague nḻa' da' güenṉa' chesone', bi ṉacho yega'aṉcze bagaše'ze dan' chesonen'.