1 Swak'e' ink'ajsbil tetz Wajcaw, na i' colol wetz.

Nin i' chusul wetz tan woque'n tetz jun balaj sanlar yi na xcye' te yi contr.

2 Nin i' yi balaj wamiw yi ba'n k'uke' inc'u'l te'j.

Nin i' yi ama'l tane'n yi ba'n tzincol wib tul.

Na ni'cu'n i' tu jun ama'l kale tzincol wit wib tibaj, yi chin wutz tkan nin, kale cya'l jun jepon swe'j.

I' colpinl wetz.

Cho'n at i' tzinwutz tan makle'n e'chk flech.

Cho'n na incol wib te'j.

Nin tan i' ja no'c tetz ajcaw tibaj cyakil e'chk tnum.

3 Poro Wajcaw, ¿mbi eka'n kak'un yi o' wunak yi na ocu' il ske'j? ¿Mbi kaxac yi o' wunak swutzu'?

4 Ni'cu'n o' tu cyek'ek' yi jal cu'n na icy'.

Ni'cu'n o' tu mujil sbak' yi jal cu'n na icy'.

5 Wajcaw, jake'nu' yi puertil tcya'j nin cuk tzaju'.

Maque'u' yi e'chk wutz tan je'n kop nin tan je'n sib te'j.

6 Cuk k'ancyok tu xlitz' tanu' tan chixite'n cu'n yi e' contru'.

7 Tak' cu'n tzaju' yi k'abu' tan incolche'n ẍchik'ab yi jun c'oloj wunak yi i cunin mar quitane'n.

Chin cole'u' ẍchik'ab yi e' awer naka'tz.

8 Na yi e'a's e' cu'n la'j na na chisuk chiyol poro che'ch tu'.

9 Wajcaw, tzimbitze' jun ac'aj bitz teru'.

Tzimbitze' balaj bitz tu inkbetz.

10-11 Na yi ilu' teru', ilu' na ak'on ama'l tetz jun rey tan xtx'acone'n.

Na ilu' nchincolon, yi in wetz, yi in Luwiy.

Chincole'u' bin ẍchik'ab yi e' yi na cyaj cho'c tan imbiyle'n cu'n tan spar.

Chincole'u' ẍchik'ab yi e' la'j, yi e' yi na cyak'e'n chik'ab tcya'j tan talche'n yi bintzi chiyol.

Poro che'ch tu'.

12 Yi e' kanitxa' chumbalaj nin e'. Na, tzan chich'uye'n chi na ban jun buch wutzk'anil jun ca'l.

Nin yi e' kame'l, ni'cu'n e' tu e'chk tkan ca'l yi chin yube'n nin yi na xcon tan palche'n yi wi' yi ca'l Kataj.

13 Nin yi kac'ojaj nojnak tan e'chk kawa'.

Nin yi e' kawun, wi'nin chipuc'une'n.

Jat lo' mil ate' wi'ak cojbil.

14 Ma yi kawacẍ ilenin na cu' cyal.

Qui'c jun tir yi najk chitz'ij yi cyal yi ntaxk opon chitiempil.

Nin cya'l cunin na baje't il lakak kabe'.

15 Ba'n cyeri yi e' tnum yi ya'tz quitane'n.

Ba'n cyeri yi e' tnum yi Kataj Ryos ya'stzun chiRyosil.