1 Swale' yi ẍe'n cu'n tane'n yi k'eju' yi ilu' wutzile'n kaRyosil, nin yi ilu' kaReyil. Swak'e' ink'ajsbil teru', tetz ben k'ej ben sak.

2 Swak'e' ink'ajsbil teru' cyakil nin k'ej. Swak'e' ink'ajsbil teru' tetz ben k'ej ben sak.

3 Na yi ilu' teru' at wi'nin k'eju', nin tajwe'n yi cho'n lkak' kak'ajsbil teru'. Quil kaxcye' tan tele'n katxum te cyakil yi teru' k'eju'.

4 Cyakil yi jujun wekl wunak scyak'e' chik'ajsbil teru' tan yi e'chk takle'n balaj yi na banu'.

Chitxole' yi e'chk milawr yi bnixnak tanu'.

5 Chiyole' yi ẍe'n tane'n yi k'eju' tzi'n tcya'j.

Ncha'tz in wetz tzintxole' yi e'chk takle'n yi mbanu' yi na ke'l yab te'j.

6 Chitxole' yi e'chk milawr yi bnixnak tanu' yi chin xo'wbil nin.

Ma yi in wetz swak'e' ink'ajsbil teru', na at wi'nin k'eju'.

7 Chitxole' yi banl talma'u' yi quinin bajsbe'n tetz.

Nin chiẍch'ink tan talche'n yi chin tz'aknak cunin ilu' te cyakil e'chk takle'n.

8 Yi Kajcaw, wi'nin xtxaxl talma' skibaj, nin na el k'ajab ske'j.

Wi'nin pasens i' skibaj, ntin lok' ib at tuch' i'.

9 Chumbalaj nin i' scye'j cyakil wunak, chin putzpuj i' tan q'uicy'le'n yi ja bnix ta'n.

10 Wajcaw, lok cyak' cyakil yi bnixnak tanu' chik'ajsbil teru'.

Lok cyak' cyakil yi e' yi na chixom te'ju' k'eju'.

11 Lok cho'c tan yolche'n yi pak'puchal yi teru' k'eju'.

Lok cyal cyakil yi e'chk takle'n yi ja bnix tanu' tan yi poreru'.

12 Bantz cyalol scyetz cyakil wunak yi wi'nin poreru' tan cawu'n, nin yi at wi'nin pak'puchal yi teru' k'eju'.

13 Nin yil cawunu', scawunku' tetz ben k'ej ben sak.

Nin yi ca'wlu', quil sotz tera'tz sbne' opon tunintz.

14 List atite'tu' tan quich'eye'n yi e' cotxcoj.

Nin na ocu' tan chiquiwse'n yi e' yi pentu' ate'.

15 Na cyakil wunak cho'n k'uklij chic'u'l te'ju', tan tk'olu' chiwa' cyakil tiemp.

16 Nin tan yi banl talma'u', na tak'u' yi tajwe'n scyetz cyakil yi e' itz', chi quitane'n yi e' wunak tu txuc.

17 Na yi ilu' teru' chumbalaj nin yi tajtza'klu' te yi cyakil yi na banu'.

18 Ncha'tz jalcu'n na ocu' tan quich'eye'n yi e' yi na cu' chiwutz teru', yi e' yi tetz cu'n cyalma' na cu' chitzi' teru'.

19 Na tak'u' yi e'chk takle'n yi tajwe'n scyetz yi e' yi na cyek ẍchi'u', na yi na chijak ẍch'eybil cyetz teru' na tbitu' nin na che' colu'.

20 Na ocu' tan chicolche'n yi e' yi na chipek' te'ju'.

Poro yi e' mal nak, na ocu' tan chixite'n.

21 Wajcaw, swak'e' ink'ajsbil teru'.

Ncha'tz nink cyak' len cyakil wunak k'ej yi bi'u' yi wi'nin xanil.

Lok cyak' k'ej jalu', nin sbne' opon tunintz.