1-2 Apu David Absalón jakamun dekaa buutui tabaun niina uyunainak Mahanaim jegawaju aidau dekawajui. Nunikag ujumak aents Joapan ujaktatus wejiajui. 3 Nuna suntag aidau antukag depetmakaju asag shiig aneasag waketmainun, ayatak datsaajag depetmakchauti wajukmaina numamtuk wake besemag waketjajui. 4 Nuninai apu David yapiin jáanchi dukumak senchi jiika buutak: “¡Uchuchi Absalógka! ¡Uchuchi Absalógka! ¡Uchuchi Absalógka!” wajau.

5 Imatak niina inamtaijin pujusa buutak pujuttaman, Joab jegajua chichajak: “Amina, tuja amina nuwem aidau, uchijum aidau, nawanjum aidau, ikaa nuwem aidau aatsa ayamjaku, amina kajegtamiagma duka yamai depetka ijinaji. Dutikau ajinig, amek ii pegkegchau takamsamtai datsankagtakum wajukmaina aan pujame. 6 Amek suntaja apuji aidau, nuigtu amina suntajum aina dushakam eme anentsa diyatsum nunú yamai paan iwainmamkaume. Nuniau asam ya amina kajegtamua nunú ima senchi aneakum, amina anempaina nunú kajejame. Amek ii jinaa ajinish puyatkagtutsuk, Absalón iwaku pujakuig shiig aneasa pujumain asam aniame. 7 Aní pujutsuk jiinkim amina suntajum aina nunú anentai ichichtugta. Ame dutikchataik, amina aentsjum aina duka makichkish juwi batsamsag tsawagchagtatui. Nunikagmatai amek juwaktatme. Nunak Tuke Pujuu daajin tajame. Nunú atatui ame yaunchuk datsauch asam utugchat igkugkuitam nuna nagkaesau utugchat igkugtatam nunú”, tiuwai. 8 Tusa tima apu David yaakta waitijin jeganta ekemsauwai. Nunikmatai ashí aents aidau nuna dekaawag apu eketbaunum jegantag ijunjajui.

Ashí Israel aents aidauk pisajag maki makichik dita jeen shiyakajui. 9 Nunikagmatai Israel aents maki makichik wegantu aidau chichainak:

“Iina shiwaaji aidau waitkagmagma nunak David ayamjutpakji, tuja filisteo aents aidau waitkagmaidaunashkam ayamjutpak agkanmitkagmaji. Imanape tama Absalógka ishamak tikich nugkanum tupikaki wekaewai. 10 Untsu Absalón iina apuji atin adaikamiag duka maaniamunum jakae. Nunika duwish ¿wagka David nigki ataktu iina apuji ati tumainchauwaita?” tuidau.

11 Aatus Absalógka aentsji aajaku aidau tuinamun David dekauwai. Nunik: “Sacerdote Sadokan, Abiatarjai Judá wegantu aidaun apuji múun aidau iniastajum: ‘¿Wagkag ditash minash wakitki niina inamtaijin taati tusash untsujuinatsua? 12 Dita ainawai wi wegantu mina pataag aina duka. Nuadui dita ainawai dekas mina taati tusag untsugmain aina duka’ ”, tiuwai. 13 Tusa nuigtushkam Amasán chichajak:

“Ameshkam minak dekas shiig pataachijuitme. Nuadui Joab suntaja apuji puja nuna yapajiakun amina apu adaikattagme. Tuja nuna wi umishtaik, Apajuí suwimkan sujusti”, tiuwai.

14 Nuna tusa Judá wegantu aidau wainak chichá yujaun imijkauwai. Dutikam dita ashí ijunag apu David wakitki niina suntaji aidaujai Jerusalén taati tusag chichaman akuptukajui. 15 Nuna dekaa apu David niina aentsji aidaujai wakitkiag namak Jordágnum jegawajui. Nuninai Judá wegantu aidaushkam David niina aentsji aidaujai Jordán katiniagtai, yaigkagtatus shimutuinak Guilgal jegawajui.

16 Nunik shimiagtai Simí Gera uchiji Benjamín wegantu Bahurimnumia aajakua dushakam apu Davita igkugtatus tupikaki ditajai ijunag weuwai. 17 Nunik wetai mil aents Benjamín wegantu aidau uyuniajui. Tuja Sibá Saúla jeen pujusa tsakajua dushakam niina uchiji quince aajakua nuna yajuak, nuigtu veinte inake aidaun yajuak eke apu David Jordán jegatsaig niyá jegauwai. Nunikag apu David batsatbaunum katiajajui. 18 Nunak nunikajui wagki apu David niina patayi aidaujai yaigka ikatiaja shiig anemtiksami tuidau asag. Tuja apu David Jordágkan katitkatatus uminai, Simí niina jegantun eme anentus tsuntsuma wajas 19 chichajak:

“Ame Jerusalén jiinki weamin, wi amina pegkegchaun chichagkauwaitjam nunú wait aneasam tsagkugtugta. Tuja nuigtush anentaimtu pujutsuk kajimatkita. 20 Mina apujuh, wi dewakbaugnak dekagmamjai. Nuadui wika amina igkugtasan ima wiki José wegantunuk wiyá emkan taajai”, tiuwai. 21 Tusa tutai Seruián uchiji Abisaí chichaak:

“¡Auk Simík apu Davitan Tuke Pujuu etegkamun pegkegchau chichagkau asa mantamnamainai!” tiuwai. 22 Tusa tutai, David ayaak:

“¡Wainka tuu wekaetsuk idaisata! ¡Yamai aents suwimak susami tabauk atsawai! Ayatak ijuntsa jiistamatag taji, wagki Israel aents aidaun apujinuk yamaishkam wikitjai”, tiuwai. 23 Nuna tusa Simín chichajak:

“¡Aminak mashtatjame! Wi tajam nunak Apajuí antamunum tajai”, tiuwai. 24 Tuja Saúla tijaji Mefi-boshet aajakua dushakam apu Davitan igkugtatus jiintukiuwai. Tuja niig David Absalógkan ishamak Jerusalén jiinkiuwa duwi nagkamas nawenak nijatsuk, jáanchjinash nijatsuk, tuja susujinashkam awatsuk pujai, apu David iwaku pegkeg wakitki tauwai. 25 Tuja niishkam apu Davitan igkugtatus Jerusalén jegauwai. Nunik jegamtai apu chichajak:

“Amesh ¿wagka wijaish minichmayume?” tau. 26 Tama nii ayaak:

“Apujuh, wika shutuu asan wi ekemi wetinun burron itagtuati tusan mina inakjun inagbaijai. Tusa ti ai ayu tujutiatak, umikchau asamtai minichbaijai. 27 Tuja wi wetinun umigtutsuk ukuak amina tajutjama wi makichkish tichamun amina tsanupagmayi. Tujash apuh, amek Apajuí aentsji nayaimpinmayajai betekaitme. Imanaitam duwi ame wajuk wakegapa duka nunisag uminkati. 28 Wagki mina apaju uchiji aidautik ame ijinam amainaitku, amina pataim itugmaina numamtuk ipatuawamin, amejai ijunja ekemsan yujumka yuwag nuniaunush ¿wisha nuigtush wajinak ima segatjame? Wika amina inakmetjai”, tiuwai. 29 Tusa tama apu David ayaak:

“Duka imanuk chichaak wekayipa. Wika amina Sibájai Saúla nugke aajakua nunú akandaika jukitajum timajime”, tiuwai. 30 Tama Mefi-boshet ayaak:

“Mina apachju nugke aina duka ashí niinu ati, wagki nuna nagkaesauwa duka, dekas ame shiig pegkeg ataktu ame pujusa inamtaigmin taum nunuwai”, tiuwai.

31 Tuja Barzilai galaadnumia aajakua dushakam yaakat Roguilim pujau, apu David Jordágka katittai yaigka, nuwi apujai akatdayag ukuak wakitkitatus wejiuwai. 32 Niinak ochenta mijanji ajujakui. Untsu niig wiakuch aajakui. Iman asa apu David Mahanaim pujusa atsumamujinak nii ashí yaijakui. 33 Nuadui apu David Barzilain chichajak:

“Jerusalén taata nunikamin wi amina kuitamkatjame”, tiuwai. 34 Tusa tama Barzilai ayaak:

“Wika múuntuch wajasjai, nuniku asan kuashat tsawan iwakuk pujushtatjai. Tuja kuashat tsawan amejai pujustinigkik Jerusalégkak minimaitsujai, 35 minak ochenta mijan ajutui, nuadui yujumka yuwaknush, umutain umaknush pegkegnak dekapeatsjai. Tuja nuigtushkam kantabaunash antumain dekapeatsjai. Nuadui wainka ame mina kuitamjakum waittsaim tajai. 36 Ame Jordán katiakmin yaigtasan tajuajam duwikik apujuh, minash pegkegnum yainkatag tame. ¡Dekas duka puyatjukaipa! 37 Wika dekas wakitkin mina yaaktajui jegaan, nuwi pujusan jakatjai. Nunikmatai mina apaju ukumataijin ukugsatnume tajai. Untsu juju mina uchig Quimham amina takagtamin ati tajai. Nii amina uyuuntamas wekaekui, ame nii yaigtin ata”, tiuwai. 38 Tusa tama apu David niina ayaak:

“Untsu Quimham wijai pujusti, tuja ame uchigminash wajuk yainjukti tusa wakegame nunak imatiksanuk umiktajai. ¡Tuja ame waji segattatme nunak ashí dutikatjai!” tiuwai.

39 Tusa chichas inagnakmatai, ashí aents aidauk Jordán utsaanawag katiajajui. Nunikag nuwi apu David Barzilaijai akatdayag niina kumpamak yapinum kugkuasui. Dutikam Barzilaik niina jeen wakitkiuwai. 40 Nunikmatai apu David niishkam Quimhamjai uyunis, nuigtu suntag Judá wegantu aidaujai aatus ashí ijumag, nuigtushkam suntag Israel wegantu aidau jimaituk aatus yaakat Guilgalnum shiyakajui.

41 Nunik nuwi jegawag batsatai, dukap atsuk ashí Israel aents aidau apu Davitan jegajua chichajuinak:

“¿Wagka ii Israel wegantu aidauti ame yaigka Jordán ikatimain aish, Judá wegantu aidaush aminash Jordán katitminish yaimpakagmae?” tuidau. 42 Tusa tiagtai, Judá wegantu aidau ditan ainak:

“¿Wagka atumesh wainkagmesh kajeagme? Iik yaigmaji, wagki apuk iina patayi asamtai. Iik apu yutain, nuniachkush waji aidaun amastí tusaikish yaigchamji”, tiajui. 43 Tusa tiagtai Israel wegantu aidau ditan chichajuinak:

“Ii ainaji dekas apu yaimaintik, wagki ii ima kuashat maki makichik wegantu dekapamak dieza imajin ainaji, tuja atumek ima makichik wegantua duke ainagme. Tuja nuigtushkam ii ainaji apu wakitki taati tusa untsukutik. Dutikau ajinig atumek tikima wainkauchia nunin anenkagtagme”, tiajui. Tujash Judá wegantu aidau Israel aents aidaun nagkaesau ima senchi pegkegchaun chichaidau.