22
David nii depetmakbaujin pachis kantamamu
1 Saúl Davitan maatag tutai, Tuke Pujuu ayamjukui. Tuja tikich shiwag aidau maatag tiagtaishkam, Tuke Pujuu ayamjukbau asa Apajuín emematak juna aatus David kantamauwai.
2 Nuniak aatus tiuwai:
“Tuke Pujuuwah,
ametme mina kuitamjaumek,
ametme mina ejamataigmek,
mina agkanmitkagnumek.
3 Ametme mina Apajuígmek,
ametme kaya muunnum uumka ejamtayama imanmek,
ametme mina ejamaka uwemtaijuk.
Ametme senchimek, mina uwemtijinmek;
amek dekas shiig yakí,
mina uumka uwemtaijuitme.
Amek dekas shiig yakí mina ejamataijuitme,
ametme mina uwemtijin.
¡Aents magkagtin aidau mantuatag tuinakuish,
ame minak ayamjutkabiume!
4 Tuke Pujuuwa, ametme pegkejam
ememattaimek,
wika amina emematjame,
mina shiwag mantuatag tuinakui
amina untsuagme,
tusa tai ame ayamjutme.
5 “Jamain ishamainnum jeganbaijai;
tuja magkagtin aidaunum pachiinkan,
mantuinawapi tusan senchi ishamkamiajai.
6 Jamainnum egkemkamiajai.
¡Nunak shiwag aidau
maami tusag umigtukagmayi!
7 Nuna ishamakun Tuke Pujuun segabiajai,
mina Apajuíjun yainkati tusan segabiajai,
tusa tai niina pujutaijin pujus antugtukmayi.
¡Wi untsubaunak nii antukmayi!
8 “Untsuka ai nugka senchi uugkabi,
muja aidaushkam buchitjabi,
nunak ¡Tuke Pujuu kajeka imatikabi!
9 Tuke Pujuu nujinia bukuiti jiinmayi.
Tuja niina weninia jii keeka jiinmayi,
niina weninian jii kaiji kegaun nagkimayi.
10 Nayaimpik jáanchjai betek ichiinak nemaabi,
nuwiya akaikibi mina ayamjutkatatus.
¡Amek yujagkim ikiyamag
suwe wajasbaunum nuwi najamayume!
11 Amek mina ayamjutkatasam,
ángel querubignum ekemis,
nii nanaakmatai minatai tumain,
dasenum pachitkau taabiume.
12 Yujagkim ikiyamag suwe ishamainnum,
amek pachitkau taabiume.
13 Amina senchijum
chaagpijai betek keeka jiinmayi,
nuniai jii kegau yumijai betek yutibi.
14 Imaniamunum Tuke Pujuu Apajuí múunta nunú,
chichamun ipamtajai betekan antukagmayi.
15 Imatak akentaiji aidaun akenak
chaagpin ajuagmayi,
imatikak mina shiwag aidaunak,
uwakek ipisjabi.
16 Ame kajeka chichamin,
dase senchi dasentak,
nayantsa umpui buku emamtai,
nugka initke wantinkauwai.
17 “Apajuíyah,
ame minak nayaimpinum pujusam,
uwejum awentuntabiume,
dutikam nayantsa kunajinia
jiikim uwemtijugmayume.
18 Mina shiwag aidau,
mina nagkaetasu senchigtin
aidau kajegtiagmayi.
Tujash ame ayamjutkabiume.
19 Wi waitiakun pujai jetetkajabi,
tujash Tuke Pujuuwa, ame minak ayamjutkauwaitme.
20 Amek mina anentu asam,
uwemtijujam agkanmitkajuauwaitme.
21 Tuke Pujuuwah,
wika ame wakegamun takau asamtai,
ame minak pegkegnum akigkabiume.
22 Wika Tuke Pujuu tujutbaunak betek umikuitjai,
nii tujutbaun umitskek idaisachuitjai.
23 Wika niina chichame umiktina nunak,
ashí betek aneakjai,
nuadui ¡niina chichame umiktina nunak
makichkish umitskek idaisachuitjai!
24 Wika ame diismash
pegkegchaunak takamsachuitjai,
tuja tudau aina nunak tupanjauwaitjai.
25 Tuke Pujuu emtin
pegkegchaun takaschau asamtai,
nii minak pegkegnum yainkauwai.
26 “Tuke Pujuuwah,
amina betek umigtamainakuig,
ameshkam betek uminaitme.
Ya amina chichamjumin betek umiawa,
nunú amek shiig kuitamnaitme.
27 Aents dekaskenum chichau aina duka,
ameshkam dutiksamek kuitamnaitme.
Untsu aents waitjin aina duka ameshkam dutiksamek iikuame.
28 Amek aents ememachu aidau uwemtiknaitme,
untsu ememau aina duka
wainka dushiktai emame.
29 Tuke Pujuuwah,
ametme mina tsaaptinug,
mina Apajuíjuh, ametme wi suwenum wekagaish
tsaaptin etugtaumek.
30 Ame yaintsamin,
mina shiwag aina nujaig maaniattajai,
nunikan depetkan amuktatjai.
31 “Apajuíyah, ame dutikamu
aina duka ashí pegkejai.
Ame anagkagtuamua nunak dekaskeapi tajai.
Tuke Pujuuk ya niyai
dekaskeapi tuinawa nuna kuitamui.
32 Tuke Pujuuwah,
ima ameketme Apajuímek.
Ame kuitamkagtinaitam
imanuk tikichik atsawai.
33 Apajuíyai senchigtin mina kuitamjinuk,
nii minak pujutji pegkeg ati tusa jintinjinai.
34 Apajuí minak shiwag amaigkai tusa,
japa amaimainchau tupikaina iman etawai.
Wi shiwag amaintukai tusan,
muja titijin wakamtaish, ame minak kuitamjinaitme.
35 Ame minak shiwagjai maanitash jintinjame,
ametme flecha ekenka
nagkimtai jiju bronce najanamun,
japiki nagkimati tusam senchimtijaumek.
36 Ametme shiwag aidau jetetuinakuish
uwemtijinmek, ame yaintu asamin,
tikich aidaush eme anenjuinawai.
37 Ame wi wekaebaunmak kuitamjame,
nuadui atakuinjanush iyagchabiajai.
38 Mina shiwag aidaun pataetukan
ashí ijinamiajai,
dutika ijinan ima wiki wakitkimiajai.
39 ¡Shiwagnak ashí ijinawabiajai!
¡Makichik iwakukesh juwakchabi!
40 Ame senchimtijuawamin
shiwaajujai maaniawabiajai.
Wijai shiwagmagaidaush
mina nii ijinati tusam idaitugsabiume.
41 Ame mina shiwag aidauk,
wisha wainaig ipisja ishiakuitme.
Tujash wi pataetuka amainagkan
mina kajegtuidaunak ijinawabiajai.
42 Dutika ijinai,
tikich aents aidaun egayanme yainkatnume tusag,
tujash makichkish yaigchajabi.
Tuke Pujuuwah,
aminash egapayanume,
tujash yaigchabiume.
43 ¡Nugka tsaimaina imatikan tsaikamiajai!
Tsakus wajatua najamaina imatikiajai ditanak.
44 Mina pataag aidauk
pempeentugkiag shiwagmatuinakuish,
ame ayamjuttsamin depetkamiajai.
Ame minak Israel aents aidau apuji,
nuigtu tikich aents aidau apujishkam etiuwaitme.
Aents wi wainajakchamu aidau
mina umigtuinak takagtuinawai.
45 Wi tabaunak betek umigtuinawai.
Aents tikich nugkanmaya aidau,
mina inataig waigkag emematjuinawai.
46 Aents tikich nugkanmaya aidauk,
wijai maaniatag takush sapigmainawai,
nuninak uumak batsatu kujaukmaikia
jiinkiag mantuawaipa tujutuinawai.
47 “¡Tuke Pujuuwah,
amek tuke pujuuwaitme!
¡Ameketme mina ejamataigmek!
¡Ashí aents aidautijum
mina uwemtijina nunú ememattajum!
48 Apajuíyah, ame mina
shiwag aidauk ijinabiume,
ame minak kuashat tikich aents aina nunashkam
apuji etiuwaitme.
49 Mina shiwag kajegtuinak mantuatag
tuinakuish, ame minak uwemtijame.
¡Tuke Pujuuwah,
aents pegkegchau aidau mantuatag tujutiagmayi,
tujash ame ayamjutkauwaitme!
50 Nuadui tikich aents
ii wegantuchu aina nuna emtinish
amina emematjame,
tuja amina etsagkeakun kantamjai.
51 Ame apu ati tusa etegtuau asam,
depetmatak tuké sujame.
Ame minak, tuja mina uchig wegantujai
amina anenkagmin tuké kuitamjame.”