Sepinien xa diamu te
Hibru
?Visi iaxa tetis uvei ak?
Moletin tovuol vakil kuh visi iaxa tetis sepinien ak. E lakila xa moletin ak tehe Siu tei✡ Hib 1:1 e tenapus ti Iesu ni meten xati mu e metuveen tova.✡ Hib 2:3 Ma, tenave Pol ti iaxa tetisi. E moletin ak be vat tei te sias xa mikil kuh Vanuvei Eo. Rut moletin xil lanemi labit Banabas iaxa tetis uvei ak. Xil lanemi mak vengan xa xi tehe Siu tei xa tehe pris tei xa testal texo vatimol xa mahulong na Livae.✡ Pol 4:36 Xi tehe vat tei te sias xa tekakao e tepol vituei tetel Pol huram xil holu.✡ Pol 11:25-26; 13:1–15:41
E, xosali, moletin xil holu lake reitin en xa Apolos iaxa tetisi. Apolos tehe Siu tei te taon te hal Aleksandria xa tesukul kuhi e tekil kuh Vanuvei Eo na Hi. Xi tehe vat te sias xa mikila vasepin kuhi e vapispis kuhi ni mi moletin xil xa Hi tehosei Iesu mei tehe Mesaea nae.✡ Pol 18:24,28 E tave ti neta xa ratakil kuh ti xa visi tetis uvei ak te Hibru, Kristin xil vus xa latevuli mei duxoh xosali lapus kila xa metisouen xa di en nggo visal Hi.
Moletin tovuol xa vakil kuh melele xati xa latetis sepinien ak. Lakila tang xa latetisi tetiamu ni huram 70 AD (huram xil xa tetutou ni melele xa Iesu tepot en) vengan xa, e melele nen ak, moletin te vaeen xil te kavmen te hal Rom latemei e latehu lelen taon te hal Serusalem e Nim Eo na Hi xa da en. E, e uvei te Hibru ak, moletin xa tetisi tesepin texoni ngan taxa pris xil di tamu latesa sanien eo e Nim Eo ak.✡ Hib 5:1-11; 8:3-5
?Visi iaxa tevuli uvei ak tetiamu?
Uvei ak, latetisi teha mi Kristin xil xa latehe Siu.✡ Hib 1:1 Vengan xa huram xil holu tetavi ngamu, xil holu latestokovein neketen nae e Iesu tengan latilomun e lavusil xat rae na Siu xil.✡ Hib 6:4-6 Latetis uvei ak tengan vapisen ni mi Siu xil xa Iesu be eilep mak mu mili sen holesok xil xa di latehusili tetiamu, e tehe xi iaxa tesak ni naha xa Hi teling xati tengan istal mei be reitin. Ma, momal tengan Kristin xil lihur xat neketen nae e Iesu e liloh ixeih e lohen te neketen nae itel sien.✡ Hib 12:1
?Latetis uvei ak veneh?
Latetis uvei ak tengan vapisen ni xa Iesu be eilep mak mu mili holesok xil vus xa Siu xil di laling neketen nae di en.
Iesu be eilep mak mu mili provet xil tetiamu.✡ Hib 1:1-3
Iesu be eilep mak mu mili masxaxa xil.✡ Hib 1:4-14; 2:5
Iesu be eilep mak mu mili Mosis.✡ Hib 3:1-6
Iesu be eilep mak mu mili Sosua.✡ Hib 4:6-11
Iesu be eilep mak mu mili vatixar na pris xil.✡ Hib 5:1-10; 7:26–8:2
Iesu be eilep mak mu mili pris xil xa lapol e Nim Eo.✡ Hib 6:20–7:25
Polien na Iesu be eilep mak mu mili polien xil vus xa latepol ni e Nim Tavolin na Hi.✡ Hib 8:3-6; 9:1-28
Re Iesu tesak ni hitxatien hu na Hi mei tehos mak mu teli hitxatien matu nan.✡ Hib 8:7-13
Sanien eo te meulien na Iesu bos mak mu mili sen sanien eo xil vus xa tetiamu.✡ Hib 10:1-14
Nggo Iesu, ulixir takan ti tengan ramei visal Hi vaxoni ngan xa mol‑Isrel xil tetiamu ulixil tekan pupu tengan lamei visali e Vathu Senae.✡ Hib 12:18-24
Latetis uvei ak tengan vasel xat Kristin xil tengan lisoh ixeih e neketen nae - Kristin xil holu xa latehe Siu latehur sakpurunien xil holu texo he Siu sav xil xa latehit rae xil te hitxatien te xeih matu na Hi tehos mak mu. Xil latehisu mi sakpurunien xil texo he ngan xil xa latave Siu ti xa latehit hi xil labe holu e iexil tehei tengan lavusil sexien tesa xil. E latehisu mi sakpurunien xil texo he ngan xil te kavmen te hal Rom xa di latehiteni latehit tehe Kristin xil iaxa di latelihi an tesa xil temei xa tesak ni mae kekaten xa mahulong di teat moletin xil. Ma, xil latepurun Kristin xil e latehas xil holu latelel. E uvei ak te Hibru di misel xat Kristin xil tengan listokovein nenexoen e tesaen nae xil vus, e liloh ixeih e lohen te neketen xa Hi teling xil en tetel nenemien xa lituxoh hoxalite teni.✡ Hib 12:1
Vatit nenemien tei te uvei ak de Hibru 1:1-3
Tetiamu, Hi tesepin mi avu nar xil melele xil holu e texo suse xil holu texo provet xil. E, e Melengien Kor xil xa radi en xiak, Hi tesepin mi xir texo Natneli xa tepeas kokot ni holesok xil xa ladi. E tehosei Natneli tengan iling holesok xil vus ak ihe hen. Xi nggoni Hi e rin xil vus, e di pisen minehinen te xeihen na Hi nggoni kilas tei xa di pisen minehinen te eai. Del xeihen te sepinien nan, Natneli di misak ni holesok xil vus xa tepeas ni mei di tak duxoh xosali nggusil nenemien nan. E melele xa Nat Hi tepol vuol ni holesok xil tengan vakas moten moletin xil mei lamese ra tesaen nae xil tengan Hi vaketeh vahos rilomun mi xil, xi teha tetotan e ut nesao e rin metu te von xeihen na Hi xa minehinen te xeihen nan eilep pupu.
?Naha iaxa di e uvei ak?
1. Naha xa Hi tepisen ni mi xir nggo Natneli bos mak mu mili naha xa tepisen ni texo provet xil tetiamu. (1:1-4)
2. Iesu be eilep mak mu mili eilep xil tetiamu. (1:5–7:28)
a. Iesu be eilep mak mu mili masxaxa xil. (1:5–2:18)
b. Iesu be eilep mak mu mili Mosis. (3:1–4:13)
c. Iesu be eilep mak mu mili pris xil xa lastal langgo vatimol na Eron. (4:14–7:28)
3. Polien na Iesu nggoni vatixar na pris xil bos mak mu mili polien xil vus xa latepol ni tetiamu e Nim Tavolin. (8:1–10:18)
a. Hitxatien te xeih hu bos mak mu mili hitxatien te xeih metu. (8:1-13)
b. Nim Eo e ut nesao xa Iesu di pol en bos mak mu mili Nim Tavolin tetiamu. (9:1-10)
c. Sanien eo na Iesu bos mak mu mili sanien eo xil vus xa tetiamu. (9:1–10:18)
4. Sexien xil xa di ranggusil Hi nggo suse te neketen bos mak mu mili sexien xa di rasak pisi tengan ravusili nggo suse te rae xil na Siu xil. (10:19–12:29)
a. Selxatien tengan ulixir nakan ti tengan rave visal Hi. (10:19-25)
b. Selxatien tengan rinastokovein neketen nar ti. (10:26-31)
c. Selxatien tengan risoh ixeih e neketen nar. (10:32–12:13)
d. Selxatien tengan meulien nar imese tevi. (12:14-17)
e. Selxatien tengan rilong xat Iesu e rinasin hitxatien te xeih hu na Hi ti. (12:18-29)
5. Sepinien kor. (13:1-25)
1
Hi tesepin mi moletin xil texo Natneli
1 Tetiamu, Hi tesepin mi avu nar xil melele xil holu e texo suse xil holu texo provet xil. 2 E, e Melengien Kor xil xa radi en xiak, Hi tesepin mi xir texo Natneli xa tepeas kokot ni holesok xil xa ladi. E tehosei Natneli tengan iling holesok xil vus ak ihe hen. 3 Xi nggoni Hi e rin xil vus, e di pisen minehinen te xeihen na Hi nggoni kilas tei xa di pisen minehinen te eai. Del xeihen te sepinien nan, Natneli di misak ni holesok xil vus xa tepeas ni mei di tak duxoh xosali nggusil nenemien nan. E melele xa Nat Hi tepol vuol ni holesok xil tengan vakas moten moletin xil mei lamese ra tesaen nae xil tengan Hi vaketeh vahos rilomun mi xil, xi teha tetotan e ut nesao e rin metu te von xeihen na Hi xa minehinen te xeihen nan eilep pupu.
Nat Hi be eilep mak mu mili masxaxa xil
4 Hi tesak ni Natneli mei be eilep mak mu mili masxaxa xil. Vengan xa his xa Hi tesa ni mini be eilep mak mu mili hisexil. ✡ Efes 1:21; Plp 2:9 5 Ngan ak be reitin vengan xa Hi tenaviteni ti mi masxaxa tova tenavit,
“Xouk obe Natuxoli,
E mi masxaxa tova mun, Hi tenaviteni ti tenavit,
“Inou nihe Tamen,
6 Di, melele xa Hi tesil muimol nan temei e ut etan, tehiteni tehit,
7 E, e rin te masxaxa xil, tehiteni tehit,
“Hi misak ni masxaxa xil labe rute xa di misil xil laba en nggoni ngan xa labe votiang xil.
E labe moletin te polien nan xil xa di misa xeihen mi xil nggoni ngan xa labe upang xa di minggan.” (Sam 104:4)
8 E usil Natneli, Hi biteni bit,
“Lelaxatien nam, O Hi, ita vehakut xa vehakut tang.
Xouk di olaxat kuh moletin nam xil nggusil naha xa momal.
9 Iem bei holesok xil xa momal
e iem nggat sexien xil xa mikavui.
Mak, ma inou, Hi nam, natehosei xouk tengan uhur merereen e sien
xa ileli ngan xa ngan xil xa ladi visaluk latehuri.” (Sam 45:6-7)
10 E xi tehiteni mun tehit,
“O Suv, tetiamu, otepeas ni ut etan,
e otepol ni tilang hat tetel holesok xil xa ladi en.
11 Tave ti neta xa holesok xil ak likesae, e xouk uta vehakut.
Holesok xil ak mei lihe neta metu e limerer lixoni talmusu xil.
12 Reitin, xouk uso viton xil lixoni talmusu xil e uso xil liha.
E uxoles xil ixoni labe eising xil tang
e upol ni holesok xil vus mei lihe neta hu.
E xouk utat imak tang vehakut,
meulien nam navus ti vatova.” (Sam 102:25-27)
13 Hi tenaviteni ti mi masxaxa tova tenavit,
“Xouk mei utotan e von xeihen inggak e riuk metu
ituxoh melele xa niling ngan xil xa labe elu nam liti pe hem.” (Sam 110:1)
14 ?Masxaxa xil labe naha? Xil labe ninin xil xa di lapol mi Hi. E xi di misil xil laba tengan latutou ni ngan xil xa xi tehosei xil tengan iteh meulien e xil.✡ Sam 34:7; 91:11
✡^ Hib 5:1-11; 8:3-5
✡^ Hib 1:4-14; 2:5
✡^ Hib 5:1-10; 7:26–8:2
✡1:5: 1Kron 17:13
✡1:6: Sam 97:7
✡1:14: Sam 34:7; 91:11