2
Iesu tepot e ut etan
Mat 1:18-25
1 E melengien xil ak xa Sion tepot en, Okastas tehe Sisa te hal Rom. Xi tesa rae nan teha mi eilep nan xil te kavmen tehit ha litis xat his moletin xil ngasen te ut xil vus tengan 2 Ngan ak tehe pupuluen kokot vari xa latepol ni e melele xa Karinias tehe eilep te kavmen te hal Siria xa provins te hal Sudea da en.
3 Misak ni, moletin xil ngasen latetilomun latehe metimal xati na vatimol nae tengan ngan xil te kavmen lakila livuli kuh xil e lihur hisexil. 4 Misak ni, e melele nen ak, Siosep mea, be reling metimal te hal Nasaret xa de provins te hal Kaleli. Di, nggusil suse xa teviei* Nasaret duxol Betlehem, suse nen teviei mili kilomita handred tei (100 km), e lakakao mili wik tei tengan laduxoli. ba be Betlehem xa de provins te hal Sudea. Be Betlehem vengan xa be metimal xati na suv toto Deved, e Siosep be vatimol tei nan.
5 Siosep nggur Meri lukakao lube Betlehem, vengan xa tesikoe xole ngamu tengan ihuri mei ihe atou nan. Meri, navehi ti iling tuvava.✡ Luk 1:27 6 E melele xa ludi tamu e metimal te hal Betlehem, melengien nan pipin tengan valing tuvava. 7 Xalu luba ludi e nim ma vongoro xil vengan xa ut sav tovuol e nim tengan laloti en. E inggak, Meri miling muimol nan xa be malohos. Pis xole ni kaliko tei, di milingi pat e rute xa di laling husmunae a vongoro xil en.✡ Mat 1:25
Masxaxa xil labithiten usil poten na Iesu mi ngan xil xa di lalaxat sipsip xil
8 E vongien nen tak, moletin tatei xil di lalaxat sipsip xil e valkesao tei sangas visal metimal te hal Betlehem. 9 Vatei takes, masxaxa tei na Iahova bemei mistal mi xil, e minehinen te xeihen na Hi mileluv xol moletin xil ak. Xil latemanin e uli mikan pupu. 10 E masxaxa biteni mi xil bit, “!Ulimim nakan ti! Namei del longeongen hos tei xa isak ni moletin xil ngasen mei lipolu ni sien. 11 Taxeak, e hal Betlehem, metimal na suv toto Deved tetiamu, moletin te teh meulien en pot tuei ve xamim. Xi be Mesaea xa Iahova tehit xati xa isa ni imei. 12 Suse xa mupus kila en imak: mukamet tuvava tei xa lapis xole ni kaliko tei e lalingi pat de rute xa di laling husmunae a vongoro xil en.”
13 Melele xa masxaxa di tamu misepin, vatei takes, vanut masxaxa tei xa mahulong pupu langgo ut nesao e mei lastal. E pe met moletin xil ak, lames Hi nggo kikeien labit,
14 “Merereen mi Hi xa de ut nesao,✡ Luk 19:38
e ut etan tomat iti
mi moletin xil ngasen
xa Hi memaal ve xil.”
15 Melele xa lakikei bus, masxaxa xil labe reling xil e ladilomun labe ut nesao. Di, moletin xil xa di lalaxat sipsip xil lasem xil labit, “Rave Betlehem, rava rapus ti neta xa Iahova tehiteni mi xir.” 16 Ma xil latemanon laba e lakamet rute xa Meri xal Siosep ludi en. E lapus tuvava nalu di pat de rute xa di laling husmunae a vongoro xil di en.
17 Melele xa moletin xil ak lapus tuvava Iesu, labit mesen sepinien xa masxaxa tehiteni mi xil usil tuvava ak mi xalu.✡ Luk 2:10-12 18 E ngan xil vus xa lalong tumulen nae lamesep pupu ni. 19 E melele xa Meri milong sepinien xil ak, miling xat kuhi e nenemien nan, e di minem usili vehakut.✡ Luk 2:51
20 E melele xa moletin te sipsip xil ladilomun, xil lames Hi e lapet rat hisen ve holesok xil xa latelonge e latepusi. Vengan xa holesok xil ak testal texoni ngan xa masxaxa tehiteni mi xil.
Tuvava Iesu be vexahu, laling his en, e langguri be Nim Eo tengan lapol ni sanien eo e rin nan
21 Melele xa melengien na tuvava Iesu be tol e he sav (8), nggusil sexien na Siu xil, tamen xal ninen lungguri be vexahu. E melele nen ak, luling hisen be ‘Iesu’ nggoni ngan xa masxaxa tehiteni mi Meri melele xa tenati ni tuvava ti mu.✡ Sen 17:12; Lev 12:3; Luk 1:59; 1:31
22-24 Melengien hanutap lu (40) dutou ni melele xa Iesu tepot en, Siosep xal Meri lunggur tuvava Iesu latobe Serusalem tengan lalopol ni sanien eo tei e rin na Meri tengan mei vamese rilomun vaxoni ngan xa rae na Mosis tehiteni.† Nggusil sexien na Siu xil, atou xa miling tuvava tei tenamese ti pe met Hi ve ra te pesisen. Misak ni, xi itat tim ituxoh melele xa melengien hanutap lu (40) mei itavi. Ti, mei lisa sanien eo tei mi Hi e rin nan tengan mei imese rilomun pe meten (Lev 12:1-8). Ma, xalu luleh mae lu be Nim Eo e lasa mae xalu ak lube sanien eo‡ Rae na Mosis bit lalisa sulut sipsip tei itel mae tei. E xosxa atou ak, mani nan tapin ti, ma mikila vasa mae lu tang (Lev 5:11). nalu mi Hi.
E melele nen ak mun, lunggur tuvava Iesu tengan ha lalipisen ni mi Iahova tengan pris tei ituxol xati ixoni ngan xa rae nan biteni xa bit, “Muimol xil ngasen xa labe horamue, lihe horamue eo na Iahova.” (Eks 13:2,12)
Moletin lu lubit lelen ni xa Iesu be Mesaea xa Hi tehit xati mi mol‑Isrel xil
25 Melele xa Meri, Siosep del Iesu latdi tamu e Nim Eo, moletin tei de rute ak, hisen Simeon. Sexien nan xil momal e eheien nan di e Hi. Di datil melengien xa Hi isa Mesaea imei isak ni mol‑Isrel xil limeluv ra he kavmen sav xil. Ninin Eo di mi Simeon✡ Aes 40:1; 49:13 26 e tehiteni mini xa namat ti mu ituxoh melele xa ipus Mesaea xa Iahova tehit xati tengan isa ni imei.
27 E melele xa Meri xal Siosep lunggur Iesu be vioh te Nim Eo tengan lalikamet pris tova tengan vatuxol xat tuvava nalu vaxoni ngan xa rae na Hi biteni, Ninin Eo tehiteni mi Simeon tengan ihe rute ak. 28 E melele xa Simeon pus xatel, po xat tuvava Iesu. E melele xa di poe, xi memes Hi bit,
29 “Suv, inou nabe moletin te polien nam.
E taxeak, ukila umaen ni nou nimat e tomat,
vengan naha xa otehit xati minou mistal ngamu.
30 Inou napus horamue ak tuei ni metok,✡ Aes 40:5; 52:10; Luk 3:6; Taet 2:11
ngan xa iteh meulien e moletin nam xil.
31 E upol ni moletin xil vus e ut etan lipusi.
32 Xi isak ni ngan xil xa latave Siu ti liti e miehen nam,✡ Aes 42:6; 49:6; 46:13
tengan xil lipus kil xouk e limerere ni xouk.
E ipet rat his mol‑Isrel xil xa labe moletin nam xil.”
33 Melele xa tame Iesu xal ninen lulong naha xa Simeon tehiteni, lumesep pupu. 34 Di, Simeon misa tuxolxatien tei mi xatel e biteni mun mi Meri bit, “Tuvava nam isak ni moletin holu te hal Isrel lihusil xat Hi, e isak ni rute e xil lihiles ra ni. Tuvava ak mei ihe simeleleen tei na Hi xa moletin holu lisin ni.✡ Aes 8:14; 1Kor 1:23; 1Pit 2:8 35 Isak ni nenemien xuxus xil na moletin xil limei kesao. E naha xa istal mini isak ni xouk mun ulonge isa, ixoni ngan xa tiei tei di misal vinuk.”
36 E melele nen tak, provet tei de vioh te Nim Eo, hisen Anna. Xi be tovolih ngamu, e tamen be pris Vanuel xa nggo vatimol na pris Aser. Melele xa Anna di tamu tehe ate maxoe, teteli. E melele xa huram lu e he sav (7) tang mei tetavi, tiramue nan temat.✡ 1Tim 5:5 37 Misak ni, tehe tunau teha vuma … huram nan mei be hanutap hat e hat e he tei mun (84). E melengien xil ngasen, makoe ba duxoh vongien, xi di mot mi Hi e vioh te Nim Eo, e melengien hao di bal ni anien e di misis.
38 E melele xa Siosep xal Meri ludi tamu e Nim Eo del tuvava Iesu, Anna bemei visal xatel e memes Hi ve tuvava ak. E dutou ni, ba di mitumul usil tuvava ak mi moletin xil ngasen xa di ladatil melele xa Hi isa Mesaea nan imei tengan isak ni Serusalem itel moletin nan xil limeluv ra xeihen na kantri sav xil.✡ Aes 52:9
Melele xa Iesu mei be horamue, moletin xil lapus kila xa polu ni metisouen na Hi
39 Melele xa Siosep xal Meri lupol sen naha xa rae na Iahova biteni, xatel latdilomun latbe Nasaret, metimal natel xati xa de provins te hal Kaleli.✡ Mat 2:23 40 E tuvava Iesu di matu, e ven mei nggeih. E melele xa di matu mak, moletin xil lapus kila xa polu ni metisouen e tuxolxatien na Hi di en.✡ Luk 2:52; 1:80
41 E huram xil vus, tame Iesu xal ninen lube Serusalem tengan lalopol ni Anien te Tavien en.✡ Eks 12:24-27; Dut 16:1-8 42 Ma, melele xa huram na Iesu be lu e le tei (12), lube anien ak nggoni ngan xa di lupol vehakut ni, e lunggur Iesu latoba. 43 Melele xa Anien te Tavien mei mitavi, tame Iesu xal ninen lunggur suse tengan laltilomun lalihe tim, e lutakil ti xa Iesu da tamu e hal Serusalem. 44 Ma xalu lukakao melengien tevi tei del vanut moletin xil vengan lunemi xa Iesu di nggusil timue tei mu moletin sav tei e vatimol nae. E melele xa ut maluxoluk, lulang vesi sung. 45 E melele xa lutakameti ti e vanut moletin xil xa ludi en, xalu ludilomun lube Serusalem tengan lalolang vesi e rute ak.
46 Lulang ves Iesu melengien tol (3), di lukameti sung xa dotan de vioh te Nim Eo. Xi di miteong ni pispisien na titsa xil na Siu xil e di misis pilei xil usili. 47 Xil vus xa lalong sepinien na horamue Iesu lamesep ve kilakilen xa di pisen ni melele xa misa rilomun ni sepinien mi titsa xil.
48 Melele xa Siosep xal Meri lukameti, lutemanin pupu. E ninen biteni mini bit, “?Natuxoli, veneh ma opol ni mak mi xamel? Opol ni xamel manexo pupu e di malang vesuk e ut ngasen.”
49 E Iesu bit rilomun ni mi xalu bit, “?Mullang ves nou veneh? ?Mutakil ti xa inou ti nite nim ma Tata navan?”✡ Sion 2:16 50 E xalu lutakil ti koute te sepinien nan. 51 E nine Iesu miling kuh naha xa mistal de nenemien nan, e di minem usili vehakut.✡ Luk 2:19
Di, horamue Iesu dilomun be Nasaret del xalu, e milong xat xalu. 52 Xi matu, e mei be moletin xa polu ni metisouen. E Hi del moletin xil mun lamaal ven.✡ 1Saml 2:26; Pro 3:4; Luk 1:80
*2:4: Nasaret duxol Betlehem, suse nen teviei mili kilomita handred tei (100 km), e lakakao mili wik tei tengan laduxoli.
✡2:21: Sen 17:12; Lev 12:3; Luk 1:59; 1:31
†2:22-24: Nggusil sexien na Siu xil, atou xa miling tuvava tei tenamese ti pe met Hi ve ra te pesisen. Misak ni, xi itat tim ituxoh melele xa melengien hanutap lu (40) mei itavi. Ti, mei lisa sanien eo tei mi Hi e rin nan tengan mei imese rilomun pe meten (Lev 12:1-8).
‡2:22-24: Rae na Mosis bit lalisa sulut sipsip tei itel mae tei. E xosxa atou ak, mani nan tapin ti, ma mikila vasa mae lu tang (Lev 5:11).
✡2:25: Aes 40:1; 49:13
✡2:30: Aes 40:5; 52:10; Luk 3:6; Taet 2:11
✡2:32: Aes 42:6; 49:6; 46:13
✡2:34: Aes 8:14; 1Kor 1:23; 1Pit 2:8
✡2:38: Aes 52:9
✡2:41: Eks 12:24-27; Dut 16:1-8
✡2:52: 1Saml 2:26; Pro 3:4; Luk 1:80