8
1 Sol ɛnawosɛ kədif ka Etiyɛn.
Sol ɔŋc-tɔrəs kəloŋkanɛ ka alaŋ Yesu
Dɔsɔk dadɔkɔ d’ anacop kətɔrəs kəloŋkanɛ ka alaŋ Yesu dəndo Yerusalɛm. Kɔ alaŋ fəp faŋan ŋasaməsər nde tɔf ya Yude kɔ Samari, mɛnɛ asom a Yesu. 2 Kɔ afum alomp alɔma ŋawup Etiyɛn, kɔ ŋambok kɔ bel-bel.
3 Kɔ Sol nkɔn ɛyɛfɛ kətɔrəs ka kəloŋkanɛ ka alaŋ Yesu, pəc-bɛrɛ dəwɔlɔ waŋan, pəc-wurɛnɛ ŋa, pəc-sumpər arkun kɔ aran, pəc-bɛr ŋa dəbili.
Filip kəcam kɔn moloku mɔtɔt atɔf ŋa Samari
4 Alaŋ aŋɛ ŋanasaməsər mɔ, ŋaŋc-cam moloku mɔtɔt mofo fəp mmɛ ŋaŋc-cepər mɔ. 5 Filip nwɛ ɛnator dare da Samari mɔ, ɛŋc-cam teta , nwɛ Kanu kəyɛk-yɛk kəyɔnɛ Wəbɛ mɔ. 6 Kənay k’afum kətəŋnɛ disrɛ ŋaŋc-cəŋkəl bel-bel tɔkɔ Filip oŋc-loku mɔ, ntɛ ŋaŋc-ne kɔ ŋac-nəŋk sɔ mɛgbɛkərɛ ma Kanu mmɛ ɔŋc-yɔ mɔ. 7 Yɔŋk yɛlɛc yoŋc-kulɛ-kulɛ kəwur afum alarəm dəris aka dare dadɔkɔ. Anataməs atorər kɔ afum alarəm akɔ ŋanafi wɛcək mɔ. 8 Kɔ pəbotu pɔpɔŋ pɛmbɛrɛ dare da Samari.
9 Wərkun wəlɔma ɛnayi di pac-we kɔ Simɔŋ. Ɛnawon dare dadɔkɔ, pəyɔnɛ dure, pəc-sɔŋɛ aka Samari cusu kəwos, pəc-wenɛ sɔ fum wəpɔŋ. 10 Afum fəp, kəyɛfɛ wanfɛt haŋ wəbeki ŋanaleləs kɔ, ŋac-loku: «Fum wəkawɛ ɔyɔnɛ fənɔntər fa Kanu, fənɔntər fəkɔ aŋwe ‹Fəpɔŋ› mɔ.» 11 Ŋanacəmɛ kɔ darəŋ, bawo ɛnawon kəwosəs ŋa cusu teta dureya dɔn. 12 Mba ntɛ ŋanalaŋ moloku ma Filip, nwɛ ɛŋc-cam moloku mɔtɔt ma dɛbɛ da Kanu kɔ tewe ta Yesu Krist mɔ, k’aŋgbət arkun kɔ aran dəromun. 13 Kɔ Simɔŋ nkɔn yati ɛlaŋ moloku ma Filip, k’owosɛ kəgbət dəromun. K’ɛŋcəmɛ Filip dəntɔf tɛm fəp. Ntɛ Simɔŋ ɛnəŋk mɛgbɛkərɛ kɔ mes mɛwɛy-wɛy ma Kanu mmɛ meŋc-yi mɔ, kɔ kusu kəwos kɔ.
14 Ntɛ asom a Yesu ŋanayi Yerusalɛm kɔ ŋane a aka Samari ŋawosɛ toloku ta Kanu mɔ, kɔ ŋasom Piyɛr kɔ Saŋ kəkɔ di. 15 Ntɛ Piyɛr kɔ Saŋ ŋantor dare da Samari mɔ, kɔ ŋantolanɛ ŋa ntɛ tɔŋsɔŋɛ ŋasɔtɔ Amera Ŋecempi ŋa Kanu mɔ, 16 bawo haŋ tɛm tatɔkɔ Amera Ŋecempi ŋɛnatorər fɛ nwɛ o nwɛ kərɛsna dəndo. Mɛnɛ kəgbət dəromun gbəcərəm kɔ ŋanasɔtɔ tewe ta Yesu Krist. 17 Awa Piyɛr kɔ Saŋ ŋandeŋər ŋa waca, kɔ ŋasɔtɔ Amera Ŋecempi ŋa Kanu.
18 Ntɛ Simɔŋ ɛnanəŋk a kədeŋər kəca ka asom a Yesu gbəcərəm kənasɔŋ afum Amera Ŋecempi mɔ, k’ɛŋkɛrɛ ŋa pəsam pəc-loku: 19 «Nəsɔŋ im ina sɔ kətam! Nwɛ o nwɛ indedeŋər waca mɔ, wəkayi pəsɔtɔ Amera Ŋecempi ŋa Kanu.»
20 Mba kɔ Piyɛr oloku kɔ: «Kanu kəsɔŋɛ məlɛcɛ kɔ pəsam pam, bawo məŋcɛm-cɛmnɛ kəsɔtɛnɛ pi kəpocɛ ka Kanu! 21 Məna məyɔ fɛ daka, məyɔ fɛ tofokəl nnɔ tes tantɛ disrɛ, bawo abəkəc ŋam ŋolomp fɛ fɔr ya Kanu kiriŋ. 22 Məluksərnɛ Wəbɛ Kanu, məlɛtsɛnɛ kɔ, mətola kɔ ntɛ tɔŋsɔŋɛ pəŋaŋnɛn’ am mɛcɛm-cɛmnɛ mɛlɛc ma abəkəc ŋam mɔ, kɔ Kanu kəwosɛ ti-ɛ. 23 Bawo inəŋk fɔ mɛcɛm-cɛmnɛ mɛlɛc ma kəraca mɛntam əm, kɔ kətɔ-lomp kəsekət’ əm.»
24 Kɔ Simɔŋ oloku kɔ: «Nətolan’ em Kanu Wəbɛ, ntɛ tɔŋsɔŋɛ mamɛ nəloku mɔ ta tɔlɔm o tɔlɔm tɔsɔt’ em.»
25 Piyer kɔ Saŋ ŋaŋcam ntɛ ŋananəŋk kɔ tɔkɔ ŋanane teta Yesu mɔ, kɔ ŋalukus Yerusalɛm, ŋac-cam toloku tɔtɔt ta Kanu sədare səlarəm sa Samari.
Filip kɔ wərkun wəpɔŋ wəka atɔf ŋa Ecopi
26 Mɛlɛkɛ ma Wəbɛ mɔlɔma mender nde Filip eyi mɔ moc-loku: «Məkɔ ntende kəca-kətɔt, məsolnɛ dɔpɔ deyer-yer ndɛ dɛŋyɛfɛ Yerusalɛm doc-tor Kasa mɔ.» 27 Kɔ Filip ɛyɛfɛ katin, k’ɛntas. Wərkun wəpɔŋ wəka Ecopi ɛnayi pabanɛ kɔ. Nkɔn ɛnatɔmpər kəcəmbər-cəmbər ka daka da Kandas, wəbera wəka atɔf ŋa Ecopi fəp. Ɛnader Yerusalɛm kədekor-koru Kanu. 28 Kəlukus k’ɛŋc-ndɛ ndɔrɔn pəndɛ pɛyɛksɛnɛ pɔn kəroŋ, pəc-karaŋ pəpɔŋ buk ba aŋnabi Esayi. 29 Kɔ Amera ŋa Kanu ŋoloku Filip: «Məcɔŋnɛ məlɔtərnɛ pəyɛksɛnɛ mpɛ.»
30 Kɔ Filip ɛyɛksɛ kəkɔ dəndo, k’ene wəka Ecopi nwɛ pəc-karaŋ buk ba aŋnabi Esayi. K’eyif kɔ: «Məŋcərɛ ntɛ məyi kəkaraŋ mɔ ba?»
31 Kɔ wəEcopi nwɛ oloku Filip: «Cəke c’ intam ti kəcərɛ-ɛ, k’intɔyɔ nwɛ ɛntəks’ em mɔ?» K’oloku Filip a pəpɛsɛ pəndɛ kɔ kəsək pɛyɛksɛnɛ pɔn kəroŋ.
32 Moloku ma kitabu mmɛ ɛŋc-karaŋ mɔ mɛnayɔnɛ mmɛ:
«K’aŋkekərɛ kɔ dəkədif pəmɔ aŋkesiya.
Pəmɔ aŋkesiya ŋowut nŋɛ ŋɔntɔkulɛ-kulɛ wəfon wəka ŋi dəntɔf mɔ,
ɛnawani fɛ kusu.
33 Owosɛ kətorɛ kɔn baŋca, k’ ambaŋər kɔ kaŋce kɔn.
An’ endetam kəlɔm teta kəbənda ka dokom dɔn-ɛ?
Bawo anim kiyi kɔn doru antɔf ŋaŋɛ kəroŋ.»* Esayi 53:7
34 Kɔ wərkun wəbanɛ nwɛ eyifnɛ Filip: «Ilɛtsɛn’ am, məlok’ im: Tes ta ana tɔ sayibɛ səloku tantɛ-ɛ? Ta nkɔn wəsərka ba, ka fum wəcuru?» 35 Kɔ Filip ɛlɛk moloku k’oŋcop dəmoloku ma kitabu mamɔkɔ, k’oloku kɔ toloku tɔtɔt ta Yesu.
36-37 Ntɛ ŋanasolnɛ dɔpɔ ŋac-kɔ mɔ, kɔ ŋaŋkɔ ŋabəp domun. Kɔ wərkun wəbanɛ oloku: «Domun dɔ dandɛ: Ak’ endeyaməs oŋ kəgbət kem dəromun teta Kanu-ɛ?»† Yecicəs yɔlɔma aŋdeŋər moloku mɔlɔma: Kɔ Filip oloku: «Kɔ məlaŋ abəkəc ŋam fəp-ɛ, səntam ti.» Kɔ wəEcopi wəbanɛ oloku: «Ilaŋ a Yesu Krist ɔyɔnɛ Wan ka Kanu.» 38 Kɔ Filip oloku a pacəmbər pɛyɛksɛnɛ, kɔ ŋantor dəromun. kɔ Filip ɛŋgbət kɔ dəromun teta Kanu. 39 Ntɛ ŋampɛ dəromun mɔ, kɔ Amera Ŋecempi ŋa Wəbɛ Kanu ŋɛmpɛnɛ Filip. Ti disrɛ, wəbanɛ wəka Ecopi nwɛ ɛnəŋk fɛ kɔ sɔ, k’osolnɛ dɔpɔ dɔn abəkəc ŋobotu disrɛ. 40 Kɔ Filip ɔŋkɔ pənəŋknɛ dare da Asot. K’oloku moloku mɔtɔt ma Kanu sədare fəp nsɛ eŋc-cepər mɔ, haŋ k’ɔŋkɔ pəbəp dare da Sesari.