1 Tɛm tatɔkɔ Sol pəc-beŋəsnɛ kədifət acɛpsɛ a Wəbɛ Yesu darəŋ, k’ɔŋkɔ ndena wəloŋnɛ wəpɔŋ wəka kəlɔ kəpɔŋ ka Kanu. 2 Kɔ Sol ewer wəloŋnɛ wəpɔŋ reka teta wɔlɔ wa dəkətola Kanu da aSuyif nde Damas, ntɛ tɔŋsɔŋɛ k’ɛmbəp di akin akin-ɛ, pəyɔnɛ arkun pəyɔnɛ aran aŋɛ ŋaŋcəmɛ dɔpɔ da Yesu darəŋ mɔ, pətam kəsumpər ŋa pəkekərɛ Yerusalɛm. 3 Dɔpɔ Sol ɛnayi pəc-lɔtərnɛ dare da Damas, gbəŋcana babɔkɔ kɔ pəmot pɛyɛfɛ dəkɔm, kɔ pɔsɔŋ pəwaŋkəra mpɛ pɛnakɛl kɔ mɔ. 4 K’ɛntɛmpɛnɛ dəntɔf. K’ene dim ndɛ dɛnayif kɔ: «Sol! Sol! T’ ake tɔ məntɔrəs em-ɛ?» 5 Kɔ Sol eyif kɔ, «Wəbɛ, məna an’ ɔfɔ-ɛ?»

«Ina, Yesu iyɔnɛ, nwɛ məyi kətɔrəs mɔ. 6 Mba məyɛfɛ, məbɛrɛ dare, aŋkɔ-lok’ əm tɔkɔ pəmar məyɔ mɔ.» 7 Kɔ arkun aŋɛ ŋanasol kɔ nkɔn Sol mɔ ŋaŋcəmɛ, ta ŋantam kəlok-loku-ɛ kənesɛ disrɛ, ŋac-ne dim mba ta ŋaŋnəŋk fum-ɛ. 8 Kɔ Sol ɛyɛfɛ dəntɔf pəmepi fɔr, mba ta ɛŋnəŋk paka o paka-ɛ. K’asumpər kɔ kəca, k’ambɛrsɛnɛ kɔ dare da Damas. 9 K’eyi di mata maas ta ɛŋnəŋk-ɛ, ɔfɔdi peri, ɔfɔmun.

10 Dəndo dare da Damas wəcɛpsɛ wəka Wəbɛ Yesu darəŋ wəlɔma ɛnayi di pac-we kɔ Ananiyas. Kɔ Wəbɛ oloku kɔ kənəŋk disrɛ: «Ananiyas!»

K’owosɛ: «Iyi nnɔ, Wəbɛ!»

11 Kɔ Wəbɛ Yesu oloku kɔ: «Məkɔ dɔpɔ dɔkɔ aŋwe ‹Dolompu› mɔ, məkɔ mətɛn nde kəlɔ ka Yudas fum wəkɔ aŋwe Sol mɔ, wəka dare da Tarəs ɔyɔnɛ. Bawo ontola Kanu, 12 kɔ Kanu kənamentər kɔ kənəŋk disrɛ fum nwɛ aŋwe Ananiyas mɔ pəbɛrər kɔ. K’endeŋər Sol waca, ntɛ tɔŋsɔŋɛ kɔ sɔ kənəŋk mɔ.»

13 Mba Ananiyas oluksɛ: «Wəbɛ, inenɛ afum alarəm ŋac-lɔm pəlɛc mpɛ fum wəkakɔ ɔyɔ afum am acempi nde Yerusalɛm mɔ. 14 Nnɔ kəfo kaŋkɛ yati kɔ aloŋnɛ apɔŋ aSuyif ŋanawurɛ Sol a pədesumpər nwɛ o nwɛ omboŋc tewe tam mɔ.»

15 Mba kɔ Wəbɛ oloku Ananiyas: «Məkɔ! Bawo fum wəkakɔ paka pɔ mpɛ inayɛk-yɛk kəkɔtɛnɛ tewe tem nnɔ abɛ a tɔf ya doru kɔ aka Yisrayel fɔr kiriŋ mɔ. 16 Ina yati in’ endementər Sol pəcuy fəp pɔkɔ pəmar pədecepərɛnɛ teta tewe tem mɔ.»

17 Kɔ Ananiyas ɔŋkɔ. Ntɛ ɛmbəp kəlɔ kaŋkɔ mɔ, k’ɛmbɛrɛ, k’endeŋər Sol waca. K’oloku: «Sol Wɛŋc im, Wəbɛ Yesu, nwɛ ɛnawurər əm nde dɔpɔ ndɛ mənasolnɛ məc-der Damas mɔ, osom im ntɛ tɔŋsɔŋ’ am sɔ kənəŋk, a məlarɛ sɔ Amera Ŋecempi ŋa Kanu mɔ.» 18 Gbəŋcana babɔkɔ, kɔ ca yoŋkoŋɛ kɔ dəfɔr pəmɔ wokwok, kɔ fɔr yɔn yɛntam sɔ kəc-nəŋk. Kɔ Sol ɛyɛfɛ, k’ɔsɔtɔ kəgbət dəromun teta Kanu. 19 Ntɛ elip kədi yeri mɔ, k’ɔsɔtɔ sɔ fənɔntər.

Kɔ Sol eŋcepərɛnɛ mataka mɔlɔma kɔ acɛpsɛ a Wəbɛ Yesu akɔ ŋanayi dare da Damas mɔ. 20 K’ɛyɛfɛ kəcam katina dəwɔlɔ wa dəkətola Kanu da aSuyif, pəc-loku a Yesu Wan ka Kanu ɔyɔnɛ. 21 Kɔ pəŋciyanɛ afum fəp aŋɛ ŋaŋc-ne polok-loku pa Sol mɔ, kɔ ŋayif: «Bafɔ nkɔn nde Yerusalɛm ɛŋc-faŋ kəmələk aŋɛ ŋaŋc-boŋc tewe tantɛ mɔ ba? Bafɔ kəsumpər kəŋan k’ɛnaderɛnɛ nnɔ, pəkekərɛ ŋa nde aloŋnɛ apɔŋ ŋayi mɔ ba?» 22 Mba Sol pəc-yɔ kəyɔ dəm kətam pəc-sɔŋɛ aSuyif aŋɛ ŋanayi dare da Damas mɔ kəciyanɛ, kəc-mentər a Yesu ɔyɔnɛ Krist, wəbɛ wəyɛk-yɛk wəka Kanu.

23 Ntɛ mataka mɔlɔma meŋcepər mɔ, aSuyif aŋɛ ŋanayi Damas mɔ ŋantəŋnɛ kənim ka Sol. 24 Kɔ Sol ende pəcərɛ tɛtəŋnɛ taŋan. ASuyif ŋaŋc-bum daŋ kɔ pibi dəkəwur da dare ntɛ tɔŋsɔŋɛ ŋatam kənim kɔ mɔ. 25 Mba pibi papɔkɔ kɔ acɛpsɛ a Wəbɛ Yesu darəŋ ŋambɛr kɔ dəkəsaksaka, kɔ ŋayokɛnɛ kɔ damba da saŋka sa dare darəŋ.

26 Ntɛ Sol ɛmbɛrɛ Yerusalɛm mɔ, k’ɛŋsɛp kənɔŋkəlɛnɛ acɛpsɛ a Wəbɛ Yesu darəŋ. Mba fəp fəŋc-nesɛ kɔ, ta ŋalaŋ a nkɔn sɔ ɔyɔnɛ wəcɛpsɛ wəka Yesu darəŋ-ɛ. 27 Mba kɔ Barnabas ɛlɛk kɔ, kɔ ŋaŋkɔ nde asom a Yesu ŋayi mɔ. Kɔ Barnabas ɔlɔmər ŋa ntɛ Sol ɛnanəŋk Wəbɛ Yesu dɔpɔ, a kɔ Yesu olok-lokər kɔ mɔ, kɔ ntɛ tewe ta Yesu kənasɔŋɛ kɔ kəbaŋsɛ mɔ. 28 Sol ɔŋc-kɔ pəc-der kɔ ŋa dəndo Yerusalɛm pəc-lok-lokɛ kəlaŋ disrɛ tewe ta Wəbɛ Yesu. 29 Sol pəc-lok-loku, pəc-gbɛkəlɛnɛ kɔ afum aKresi, mba, ŋa sɔ, ŋac-tɛn kənim kɔ. 30 Ntɛ awɛŋc alaŋ ŋaŋcərɛ ti mɔ, kɔ ŋasɔŋɛ Sol kətor Sesari, k’ɛlɛk dɔpɔ k’ɔŋkɔ dare da Tarəs.

31 Kəloŋkanɛ ka alaŋ Yesu a atɔf ŋa Yude, atɔf ŋa Kalile kɔ atɔf ŋa Samari, ŋa fəp ŋanayi pəforu disrɛ. Alaŋ Yesu ŋaŋcəpəsɛnɛ bəkəc, ŋayinɛ kənesɛ ka Wəbɛ Kanu disrɛ. Amera Ŋecempi ŋa Kanu ŋɛŋc-marəs kəloŋkanɛ ka alaŋ Yesu, ti disrɛ ŋaŋc-la kəla dəm.

32 Piyɛr nwɛ ɛŋc-cepər sədare sasɔkɔ fəp mɔ, ɛnader pətor sɔ ndena afum acempi aŋɛ ŋanandɛ dare da Lida mɔ. 33 K’ɔŋkɔ pəbəp di fum nwɛ aŋc-we Eney mɔ, ta ɔŋkɔt-ɛ, pəfəntərɛ debik meren camət-maas disrɛ. 34 Kɔ Piyɛr oloku kɔ: «Eney, Yesu Krist ɛntaməs əm! Məyɛfɛ məna wəsərka mənɛp abik ŋam!» Gbəŋcana babɔkɔ k’ɛyɛfɛ, k’ɛŋcəmɛ. 35 Ntɛ aka Lida kɔ aka Sarɔŋ fəp ŋanəŋk kɔ mɔ, kɔ ŋaŋkafəli mera yaŋan nnɔ Wəbɛ Yesu eyi mɔ.

36 Wəran wəcɛpsɛ ka Wəbɛ Yesu darəŋ wəlɔma ɛnayi dare da Yope, pac-we kɔ Tabita. Kusu kəŋan disrɛ aŋc-we kɔ sɔ Dorkas, ti tɔyɔnɛ «were». Wəran wəkakɔ ɔŋc-yɔ mes mɔtɔt mɛlarəm, kɔ kəmar. 37 Mata mamɔkɔ disrɛ, k’ɛfəntərɛ docu, k’efi. K’ambikɛ kəbel kɔn, k’ampɛnɛ ki nde dukulɔ da kəlɔ dareŋc. 38 Ntɛ acɛpsɛ a Wəbɛ Yesu darəŋ ŋane a Piyɛr eyi Lida ndɛ dɔlɔtərnɛ dare da Yope mɔ, kɔ ŋasom arkun mɛrəŋ kəkɔ-lɛtsɛnɛ kɔ: «Ta məwon kəcepər nde ndorosu.»

39 Kɔ Piyɛr ɛyɛfɛ kɔ ŋaŋkɔ kɔ asom aŋɛ mɛrəŋ. Ntɛ ŋambɛrɛ mɔ, k’ampɛnɛ kɔ nde dukulɔ da kəlɔ dareŋc. K’acəbokəra fəp ŋander ŋabəp kɔ ŋac-bok, ŋac-mentər kɔ səbrumus kɔ yamos nyɛ Dorkas ɛnalompəs ntɛ ɛnayi kɔ ŋa mɔ.

40 Kɔ Piyɛr owurɛnɛ afum fəp nde doru, k’ɛŋcəp suwu, k’ontola Kanu tetɔn. Ntɛ elip mɔ, k’ɛŋkafəlɛ nde kəbel kəyi mɔ, k’oloku: «Tabita, məyɛfɛ!» Awa kɔ Tabita emepi fɔr, ntɛ ɛnəŋk Piyɛr mɔ, k’ɛyɛfɛ, k’ɛndɛ. 41 Kɔ Piyɛr ɔsɔŋ kɔ kəca, k’eyekti kɔ. K’ewe afum acempi kɔ acəbokəra, k’ementər ŋa Tabita pəyi wəyeŋ. 42 Kɔ aka dare da Yope fəp ŋaŋcərɛ ti, kɔ alarəm ŋaŋcop kəlaŋ Wəbɛ Yesu. 43 Kɔ Piyɛr eyi dare da Yope mataka mɛlarəm, ndena Simɔŋ wəlɔma nwɛ ɛŋc-bəc kata mɔ.