1 Asom a Yesu kɔ awɛŋc aŋa alaŋ aŋɛ ŋanayi atɔf ŋa Yude mɔ ŋane a acikəra, aŋɛ ŋantɔyɔnɛ Suyif mɔ, ŋawosɛ toloku ta Kanu. 2 Ntɛ Piyɛr ɛnapɛ Yerusalɛm mɔ, kɔ afum aŋɛ anakəŋc mɔ ŋayɛfɛ kənal kɔ, 3 ŋac-loku: «Məmbɛrɛ ndena afum aŋɛ antɔkəŋc mɔ, kɔ məndi yeri kɔ ŋa, bawo aSuyif ŋanamɔnɛ ti!»

4 Awa kɔ Piyɛr ɛyɛfɛ kəlɔmər ŋa tin tin tin mes mɔkɔ mɛnacepər mɔ: 5 «Ina, nde dare da Yope inayi, dɔsɔk dadɔkɔ ic-tola Kanu kɔ kənəŋk kənder im. Ti disrɛ, k’inəŋk paka pɔlɔma poc-tor powurɛnɛ kɔ manta pasumpər pi moŋkubut maŋkəlɛ, kɔ pontor kəyɛfɛ dəkɔm haŋ nnɔ inayi mɔ. 6 Ntɛ inagbətnɛ pi disrɛ mɔ, k’inəŋk sɛm ya wɛcək maŋkəlɛ, sɛm ya dop, yeliŋɛ-liŋɛ, kɔ bɛmp ya dəkɔm. 7 K’ine sɔ dim doc-lok’ im: ‹Məyɛfɛ Piyɛr! Mədif, məsɔm.›

8 K’iloku: ‹Ala Wəbɛ! Tɔlɔm o tɔlɔm tɛntasɔŋɛ f’em kəbɛr paka pɔtɔcemp dəkusu, mpɛ Kanu kəmɔnɛ kədi mɔ.›

9 Kɔ dim ndɛ dɔŋgbɔkərɛ sɔ kəyɛfɛ dəkɔm: ‹Paka mpɛ Kanu kəŋcempəs mɔ, ta məna məlokɛ pi kətɔ-cemp!› 10 Kɔ teyi kəmaas, pəwon fɛ kɔ ca nyɛ fəp yolukus sɔ dəkɔm.

11 Gbəŋcana babɔkɔ, kɔ arkun maas aŋɛ anasom nde nderem kəyɛfɛ dare da Sesari mɔ, ŋander ŋacəmɛ dəkusuŋka ka kəlɔ kəŋkɔ sənayi mɔ. 12 Kɔ Amera Ŋecempi ŋolok’ im a səsol səkɔ kɔ ŋa, ali inesɛ fɛ. Kɔ awɛŋc asu aŋa alaŋ camətətin aŋɛ ŋacəm’ em darəŋ, kɔ səŋkɔ səbɛrɛ ndena Kɔrneli. 13 Kɔ Kɔrneli oloku su ntɛ ɛnanəŋk mɛlɛkɛ nde ndɔrɔn, kɔ moloku kɔ: ‹Məsom fum dare da Yope pakɔ wen’ am Simɔŋ, wəkɔ andeŋər tewe ta «Piyɛr» mɔ. 14 Nwɛ endelok’ əm moloku mmɛ mendeyac’ əm, kəbəp aka kəlɔ kam disrɛ fəp mɔ.›

15 Iyi kəlok-loku, kɔ Amera Ŋecempi ŋa Kanu ŋontorər ŋa pəmɔ ntɛ ŋɛnatorər səna sɔ dəkəcop mɔ. 16 Awa k’iŋcɛm-cɛmnɛ toloku ta Wəbɛ ntɛ ɛnaloku: ‹Saŋ ɛnagbətɛ afum domun, mba nəna Amera Ŋecempi ŋa Kanu ŋɔ nəndesɔtɔnɛ kəgbət teta Kanu.› 17 Kɔ pəyɔnɛ fɔ kəpocɛ kin kayi kɔ ŋanasɔtər Kanu pəmɔ səna aŋɛ səlaŋ Yesu Krist mɔ-ɛ, anɔ inatam kəyɔnɛ-ɛ ntɛ iŋkɔyamsər Kanu mɔ?»

18 Ntɛ ŋane moloku mamɔkɔ mɔ, kɔ bəkəc yontor ŋa, kɔ ŋaŋkor-koru Kanu, ŋac-loku: «Kanu kəsɔŋ sɔ acikəra aŋɛ ŋantɔyɔnɛ Suyif mɔ kətam kəsəkpər bəkəc, ntɛ tɔŋsɔŋɛ ŋasɔtɔ tecepərɛnɛ doru ntɛ Kanu kəfaŋ mɔ!»

19 Ntɛ andif Etiyɛn mɔ, k’ aŋcop kətɔrəs afum alaŋ kɔ tɔsɔŋɛ ŋa kəsaməsər. Alɔma ŋanakɔ atɔf ŋa Fenisi, alɔma ŋakɔ Sipər, alɔma ŋakɔ haŋ Antiyɔk, ŋaŋc-luksɛ fɛ nwɛ o nwɛ sɔ toloku ta Kanu mɛnɛ aSuyif gbəcərəm. 20 Afum akakɔ dacɔ, alɔma ŋanayi, aŋɛ ŋanader dare da Antiyɔk kəyɛfɛ ka sədare sa Sipər kɔ Sirɛn mɔ, ŋaŋc-lok-lokər aka kusu ka Kresi, ŋac-loku ŋa toloku tɔtɔt ta Wəbɛ Yesu. 21 Kəca ka Wəbɛ Yesu kənayi alaŋ akakɔ kəroŋ. Kɔ afum alarəm ŋayɔnɛ alaŋ, kɔ ŋaŋkafəli bəkəc yaŋan nnɔ Wəbɛ Yesu eyi mɔ.

22 Kɔ moloku mamɔkɔ mɛmbɛrɛ kəloŋkanɛ ka alaŋ Yesu ka Yerusalɛm dələŋəs, k’asom Barnabas Antiyɔk. 23 Kəbɛrɛ kɔn di, ntɛ ɛnadenəŋk pətɔt kɔ pəbotu mpɛ Kanu kənayɔnɛ alaŋ a Antiyɔk mɔ, kɔ pəmbɔt kɔ. K’eŋgbiŋər ŋa kəgbɛkər ka Wəbɛ Yesu mera yaŋan fəp kəlaŋ disrɛ. 24 Barnabas fum wətɔt ɛnayi. Kəlaŋ kənayi kɔ dɛbəkəc kɔ Amera Ŋecempi ŋa Kanu ŋeyi kɔ sɔ darəŋ. Kɔ afum alarəm ŋaŋcəmɛ dɔpɔ da Wəbɛ Yesu darəŋ.

25 Kɔ Barnabas ɔŋkɔ dare da Tarəs kəlɛk Sol. 26 Ntɛ Barnabas ɛnəŋk Sol mɔ, k’eŋkekərɛ kɔ Antiyɔk. Teren tin camcam, ŋac-təŋnɛ kəloŋkanɛ ka alaŋ, kɔ ŋaŋtəksɛ kənay ka afum. Dəndo Antiyɔk, difɔ anacop tɔcɔkɔ-cɔkɔ kəwe acɛpsɛ a Wəbɛ Yesu darəŋ «aka Krist.»* «Kretiyɛn,» itɔ tɔkɔ kusu ka Kresi «kristianos», itɔ ’mentər cəBaka «awurɛnɛ a Krist.», pəyɔnɛ fɛ ti-ɛ, «aka Krist.»

27 Mata mamɔkɔ, kɔ adəŋk a Kanu alɔma ŋantor dare da Antiyɔk kəyɛfɛ Yerusalɛm. 28 Wəkin ɛnayi ŋa dacɔ pac-we kɔ Akabus, k’ɛyɛfɛ, kɔ Amera Ŋecempi ŋɔsɔŋɛ kɔ kədəŋk a dor dendeyi doru fəp. Dor dadɔkɔ dɛnader deyi tɛm ntɛ Kəlod ɛnayɔnɛ wəbɛ ka tɔf ya Rom fəp mɔ. 29 Kɔ acɛpsɛ a Yesu ŋaŋcɛm-cɛmnɛ kəfɛk teta kəmar ka awɛŋc aŋa alaŋ aŋɛ ŋanayi atɔf ŋa Yude mɔ, nwɛ o nwɛ kɔ ntɛ ɛnatam kəfɛk mɔ. 30 Itɔ ŋanayɔ: Kɔ ŋasom Barnabas kɔ Sol kəkenɛ ki abeki aŋɛ ŋanayi kəloŋkanɛ ka alaŋ a Yude mɔ.