1 Tɛm tatɔkɔ tɔ wəbɛ wəka atɔf Herodu ɛnatəpsər afum alaŋ alɔma waca teta kətɔrəs kəŋan. 2 K’endifɛ Sak wɛŋc ka Saŋ dakma. 3 Ntɛ Herodu ɛnanəŋk a mɔyɔ mɔn mamɔkɔ mɔŋc-bɔt aSuyif mɔ, k’ɛŋcɛm-cɛmnɛ sɔ kətəp Piyɛr waca, ntɛ tɔŋsɔŋɛ pəcaŋər kɔ mɔ. Mataka ma kəsata kəpɔŋ ka aSuyif mɛnayi: Kəsata ka cəcom cətɔnɔŋkəl lebin. 4 Ntɛ Herodu osumpər Piyɛr, k’ɛmbɛr kɔ dəbili mɔ, k’ɔsɔŋ cəgba maŋkəlɛ ca asɔdar kəbum kɔn, kəgba o kəgba kənayɔ asɔdar maŋkəlɛ. Ɛŋc-cɛm-cɛmnɛ kəbocər Piyɛr kiti fɔr ya afum fəp kiriŋ kɔ kəsata ka Pak kəŋcepər-ɛ.

5 Aŋc-bum Piyɛr dəbili, mba afum alaŋ ŋaŋc-tolanɛ kɔ bel-bel nnɔ Kanu kəyi mɔ tɛm fəp.

6 Ntɛ dɔsɔk ndɛ Herodu ɛnacɛm-cɛmnɛ kəbocər Piyɛr kiti dɛmbəp mɔ, pibi papɔkɔ, pakotɛ Piyɛr gbekce mɛrəŋ, pəfəntərɛ pəc-dirɛ asɔdar mɛrəŋ dacɔ. Nde dəkumba, asɔdar ŋanacəmɛ sɔ dəndo ŋac-bum bili. 7 Gbəŋcana babakɔ, kɔ wəsom wəka dareŋc, mɛlɛkɛ ma Wəbɛ, mender, kɔ pəmot pɔsɔŋ pəwaŋkəra bili disrɛ. Kɔ mɛlɛkɛ mmɛ mentimi Piyɛr k’oc-sut-sut kɔ kəsək, kɔ moloku kɔ: «Məyɛfɛ katəna!» Kɔ gbekce yoŋkoŋɛ kɔ dəwaca.

8 Kɔ mɛlɛkɛ moloku kɔ: «Məlɛk yamos yam, məbɛrnɛ cɔfta cam!» Kɔ Piyɛr ɔyɔ mamɔkɔ fəp. Kɔ mɛlɛkɛ moloku kɔ sɔ: «Məbɛrnɛ yi, məcəm’ em darəŋ!» 9 Kɔ Piyɛr ɛŋcəmɛ mɛlɛkɛ mmɛ darəŋ. Ɛnacərɛ fɛ a kəmar ka mɛlɛkɛ kaŋkɔ a kaŋce kɔ: kənəŋk ka dareŋc kɔ nkɔn ɛnacɛm-cɛmnɛ. 10 Ntɛ ŋaŋcepər abum acɔkɔ-cɔkɔ kɔ aka mɛrəŋ mɔ, kɔ ŋambəp kumba ka fɛc nkɛ kənatɛfərnɛ dare mɔ. Kɔ kumba kəŋgbitɛ ki sərka fɔr yaŋan kiriŋ, kɔ ŋawur, kɔ ŋasumpər dɔpɔ dɔlɔma. Gbəŋcana babɔkɔ, kɔ mɛlɛkɛ mɛsak Piyɛr.

11 Ntɛ pəndecɛrŋɛ Piyɛr mɔ, k’oloku: «Iŋcərɛ oŋ a Wəbɛ osomna mɛlɛkɛ mɔn, mede mɛbaŋ’ im waca wa Herodu disrɛ, kɔ pəlɛc pɔkɔ aSuyif ŋanafaŋ em mɔ fəp.»

12 Ntɛ ɛŋcərɛ ti oŋ mɔ, k’ɔŋkɔ nde kəlɔ ka Mari, iya wəka Saŋ, nwɛ aŋc-deŋər tewe ta «Mark» mɔ, nde afum alarəm ŋanaloŋkanɛ ŋac-tola Kanu mɔ. 13 Ntɛ Piyɛr osut-sut kumba ka dəkəbɛrɛ mɔ, kɔ wəyecəra wəlɔma pac-we kɔ Rodu, ɔŋcɔŋnɛ kəkɔ-cəŋkəl. 14 Kɔ Rodu ɛnɛpəl dim da Piyɛr, mba pəbotu disrɛ ɛŋgbiti fɛ kumba. K’ɛyɛksɛ kəkɔ-loku afum aŋɛ ŋanayi dəkəlɔ mɔ a Piyɛr ender, k’ɛŋcəmɛ dəkumba.

15 Kɔ afum ŋaloku Rodu: «Məna məntamnɛ fɛ!» Mba k’ɛŋgbəc a tɔkɔ oloku mɔ itɔ teyi. Kɔ ŋaloku: «Mɛlɛkɛ mɔn mɔ!»

16 Piyɛr nkɔn pəc-sut-sut kəsut-sut dəm kumba. Ntɛ ŋaŋgbiti kumba kɔ ŋanəŋk Piyɛr mɔ, kɔ cusu cəwos ŋa. 17 K’olok-lokərɛ ŋa kəca a ŋacaŋk, k’ɔlɔmər ŋa ntɛ Wəbɛ owurɛ kɔ dəbili mɔ. K’oloku: «Nəloku ti Sak kɔ awɛŋc asu.» K’owur k’ɔŋkɔ kəfo kəlɔma.

18 Ntɛ dec dɔsɔk mɔ, kɔ pəyama-yama pɔpɔŋ peyi asɔdar dacɔ: Ake ’sɔtɔ Piyɛr-ɛ, Deke eyi-ɛ? 19 Kɔ Herodu osom a patɛn Piyɛr, mba ŋananəŋk fɛ kɔ. K’ombocər asɔdar akakɔ ŋaŋc-bum Piyɛr mɔ kiti, kɔ Herodu oloku a padif ŋa. Ntɛ telip mɔ, kɔ Piyɛr ɛyɛfɛ atɔf ŋa Yude, k’ontor dare da Sesari kəkɔ-cepərɛnɛ di tɛm tɔlɔma.

20 Herodu ɛnayi kəyɛfərɛnɛ kɔ aka sədare sa Tir kɔ Sidɔŋ. Mba kətəŋnɛ disrɛ aka sədare sasɔkɔ ŋander ŋabəp Herodu. Ntɛ ŋasɛp kəsɔtər Bəlastus nwɛ ɛnayɔnɛ wətɔmpər ka mes ma dukulɔ dɔn kəwosɛ kəyac ŋa mɔ, kɔ ŋantola wəbɛ Herodu pəforu, bawo nde atɔf ŋɔn difɔ yaŋan yɔŋc-sɔtɔ yeri.

21 Ntɛ tataka taŋan tɛtəŋnɛ tɛmbəp mɔ, kɔ Herodu ɛmbɛrnɛ yamos yɔn ya dɛbɛ, pəndɛ nde aŋgbaŋcan ŋɔn pəc-lok-lokər ŋa. 22 Tɛm ntɛ afum fəp ŋaŋc-kulɛ-kulɛ, a ŋac-loku: «Bafɔ dim da fum dɔ dandɛ, mba da kanu dɔ!» 23 Gbəŋcana babɔkɔ kɔ mɛlɛkɛ ma Wəbɛ mosut kɔ, bawo ɛnayek-yekəs fɛ Kanu, kɔ yɛt yoŋcop kəsɔm kɔ, k’efi.

24 Toloku ta Wəbɛ tɛŋc-sam oŋ kəsam dəm tɔc-kɔ kiriŋ.

25 Barnabas kɔ Sol ntɛ ŋalip kəkɔtɛnɛ kəsom kəŋan nde dare da Yerusalɛm mɔ, kɔ ŋalukus, ŋac-lɛkɛnɛ Saŋ, nwɛ aŋc-deŋər tewe ta «Mark» mɔ.