13
Iesu eniya ge butu gavida budo ami atopaposisina.
(Mark 4:1-9; Luke 8:4-8)
1 Deguta dá ainde Iesu mando dodo idegedo maundo ubutu demonda anumbesisina. 2 Edo embomai jisijisi bajina doregedo imo jinenembesitera. Awatedo imo un mada visido ainda anumbesiri embomai jisida awamane berari doregedo un bengida pepositera. 3 Ango edo imo rorae jiwae awa eniya gemi awamane atopaposisina. Edo atopaposite tedo sisina, “Giwo, buro embo da (1)mi rorae vero purara piain kundo maunsisina. 4 Edo imo vero purara pipisiri vero nenei begata beda duduritera. Awa nimi gundo injitera. 5 Edo nenei ganuma gajida duduritera edo ainda butu puruta ae, awatedo boraebé eroritera. 6 Ata iji visido veverami gaiesiri ambuye esitera. Edo awamaneda besinya butu tuda wotae, awatedo mumuya esitera. 7 Edo vero nenei awa kurere teoroda duduritera, edo kurere erido ami ipuda engoegetero ginene esitera. 8 Ata vero nenei butu daveda duduritera awa davebé erido be ekitera, nenei jiwaebé (100), nenei jiwae (60), nenei (30). 9 Edo imomane dengorode ingari tao gido, ingiwo! Ge ro tena awa bé gain edo awa gawa!”
Iesu ro embo ine eniya gemi embomai atopasido eiri awa esiri arapa esisina.
(Mark 4:10-12; Luke 8:9-10)
10 Ango edo ambodani Iesu da yai gundo imonde sitera, “Ro awaembo imo embomaida yai eniya gemi tedo esi?”
11 Edo ami ge mina awamanede sisina, “Aindabé utuda gisijiarida gebé onjigari* utuda gisijiarida gebé onjigari awa ‘God da onjigari gebé nongo edo imo ainda gisijiari buro aina.’ awa ano arapa ari gawa, ata awamaneda yai ano arapa ae. 12 Aindabé embo ainmi rorae ro isira awa, jiwae piaina, edo daginegedo bajinabé baina. Ata embo ainmi rorae ro itae awa, saka ro ainda yai isira awa dodo baina.† God mi embomai edo eira, edo ami embo enembo berarida yai ainda gebéda gari tegada tegada pisido eira. Awatedo embo ainmi God da gisijiarida gebé nei gain jipapa eira awa, God mi ainda yai gari awa piari jiwaebé gaina. Ata embo ainmi God da gisijiarida gebé nei gain jipapa ae awa, saka ro ainda yai isira awa dodo baina (Psalm 139:14-18; Rome 1:18-25). 13 Aindabé awamane jisimi nato buro gido era ata ainda mokabé gae, edo awamane nato ge ingido era ata ingae, edo ainda atopatari gae arapa ae, awatedo nane awamanede eniya gemi tedo ena. 14 Edo ge awa peroveta Isaiah mi matu awamaneda daoda sisina awa bé eira. Edo ainda ge awa engo:
‘Imomane nato ge awa ingawa,
ata ingeite mana arapa ari gawa.
Edo nato buro awa gawa,
ata goteiawo, ainda mokabé mana gawa.
15 Aindabé embomai einda do awa okain edo engiregesitera,
edo awamaneda dengoro dunjitera,
edo awamanemi awamaneda jisi akeimbesitera, awatedo ge awa tetena.
Awarata, edo awamane ango ainyae, awamaneda jisimi nato buro awa arapa ari gara,
edo awamaneda dengoromi nato ge arapa ari ingara,
edo awamaneda do pirigedo geda mokabé gara,
edo awamaneda jimbo dodo nato yai wareregaro,
edo nanemi awamane gao ano kaviegara.’ Isaiah 6:9-10
16 Ata imomane jisimi buro awa gotewa edo itomane dengoromi ge awa ingewa, awatedo God da dubodave itomane yai isira. 17 Aindabé eiwa gebé imondemane tena, iji matuda peroveta mane jiwae edo embomai wasiri dambu darari, awamane jisimi ro inemane gido ewa awa gain jipapa esitera ata gae, edo dengoromi ro inemane ingido ewa awa ingain jipapa esitera ata ingae.
Iesu mi eniya ge butu gavida moka awa esiri arapa esisina.
(Mark 4:13-20; Luke 8:11-15)
18 “Awatedo ingiwo! Eniya ge vero purara piari embo ainda moka awa engo: 19 Embo ainmi gisijiarida ge awa ingido arapa ae edo eira awa ango butu begata beda vero duduritera ainda. Ge awa emboda doda durudo eira, ata embo beyaemi‡ embo beyae awa Satan (1 John 5:19). gupeite ainda doda burigi kundo maundo eira. 20 Edo embo nei awa ango butu ganuma gajida vero duduritera ainda. Embo emi ge awa ingeite boraebé yawade budo eira. 21 Ata ge awa ainda doda dave edo wotae, awatedo iji tupo akuta imo ge awa kera edo eira. Edo iji nonde ge awa kera eiuri buriya gumburi o ainda yai memesi neide kainde embomi pioro burigibé durudo eira. 22 Embo nei awa ango butu vero kurere teoroda duduritera ainda. Embo emi ge awa ingido eira. Ata butu roraeda kotembari jiwaemi ainda do buriya edo eira, edo ganu jiwae dada arida kotembarimi imo udumbedo eira. Awatedo kotembari angogomi erido ge awa engoegetero ginene eiworo imo be ekae edo eira. 23 Ata embo nei awa ango butu dave vero duduritera ainda. Embo emi ge ingido ainda moka arapa euri gido eira. Edo imo be dave edo ekesite piedo eira, nenei jiwaebé (100), nenei jiwae (60), edo nenei (30).”
Iesu mi eniya ge wheat ae vive beyae deda budo atopaposisina.
24 Edo Iesu mi awamaneda yai eniya ge nei sisina: “Utuda gisijiari awa engo.§ Utuda gisijiari awa engo da moka awa ‘Nongo edo God mi ainda sima ari daveda buro aini awa engo.’ (Ge dá ango Matthew 13:31, 33, 44, 45, edo 47 isira.) Embo da (1)mi rorae vero dave kundo ainda indari buroda purara pipisisina. 25 Ata muyaede embomai berari jitao aveite itero buro tutuda gitopo embo gupusina, edo ami vive beyae awa wheat teoroda purara piedo dodo maunsisina. 26 Edo amboda wheat vero awa erido bajina edo be tuturo edo ekero, vive beyae awa daedo erido arapa esitera.
27 “Ango edo buro embobo gundo buro tutude sitera, ‘Badari, imo vero dave akuta buro itoda purara pipitata. Nongo edo vive beyae buro ainda iteri?’
28 “Edo embo ami awamanede mina sisina, ‘Gitopo embomi buro eiwa eutara.’
“Edo buro embobomi ainde tedogositera, ‘Imo nanekare maundo vive awa utorote jipapa esita?’
29 “Ata ami ge mina sisina, ‘Ango ainyae. Gaegae edo inemane vive beyae awa usite wheat daedo utawa. 30 Dowo, tote (2) matawa inonoda badore. Edo maundo tokari iji ainde nanemi tokari embobode tano gara, “Vive bebegae awa gisi utedo sindari berari ewo, edo niyaoda dungave. Ata wheat awa dada ewo, nato rorae itari oroda kundo gumbave.” ’ ”
Iesu mi eniya ge masitet veroda budo atopaposisina.
(Mark 4:30-32; Luke 13:18-19)
31 Ango edo Iesu mi awamanede eniya ge nei sisina: “Utuda gisijiari awa masitet* masitet awa pingi ae. Awa ni Israel embomaimi buroda uredo esitera. Edo ainda vero mundedo unde baige edo awamaneda indarida saka saka piedo injido esitera. vero engo. Vero awa embo da (1)mi kundo maundo ainda buroda urisina. 32 Masitet vero awa nya vero nenei ango ae. Awa saka maibé. Ata iji nonde ami erido bajina aina awa, buroda nya nenei awa daginegedo ni ipu piedo papatu gataina. Awatedo ni waside ami baba edo gundo ainda papatuda ma piara.”
Iesu mi eniya ge bread badari siwoda budo atopaposisina.
(Luke 13:20-21)
33 Edo Iesu mi daedo eniya ge nei awamaneda yai sisina: “Utuda gisijiari awa bread badari siwo engo. Eutu da (1)mi ou bajina palawami beda arida bread badari siwo saka awa baige esisina. Edo siwomi esiri palawa berari bajido duga esisina.”
34 Rorae eiwa berari Iesu mi eniya gemi embo jisijiside sisina. Imo ge da (1) nondawa tepo tae, ata berari eniya gemi awamanede tedo esisina. 35 Ango edo ge eiwa perovetami amboda gumaina sisina, awa gundo bé esira:
“Nane eniya ge jigamo ana,
Nane ge ro onjigesitena butu gambae gisida awa karigano gawa.” Psalm 78:2
Iesu mi eniya ge vive beyae ainda moka esiri arapa esisina.
36 Edo Iesu embo jisijisi awa piesiri dodo mambero mando doda totorisina. Edo ainda ambodani gundo ainde sitera, “Vive beyae ami buroda eroritera, ainda eniya geda mokabé awa namondekare tewasi arapa ari gore.”
37 Edo Iesu mi awamanede ge mina sisina, “Embo vero dave purara piedo eira awa Embo da Mai. 38 Edo indari buro awa butu berari. Vero dave awa embomai God mi gisijido eira.† embomai God mi gisijido eira. Gurikida ge awa ‘gisijiarida mamai’. Ata vive beyae awa embomai embo beyaemi gisijido eira.‡ embomai embo beyaemi gisijido eira. Guriki da ge awa ‘embo beyaeda mamai’. Edo embo beyae awa Satan (Matthew 13:19). 39 Edo gitopo embo vive beyae purara pipisisina awa Binei.§ Binei awa Satan da dao nei. Edo tokari iji awa iji beao arida, edo tokari embobo awa anelamane. 40 Awatedo dá tokari embobomi vive bebegae dada edo niyaoda dungedo era ango, anelamanemi iji einda beao arida iwata ango ara. 41 Embo da Mai mi ainda anelamane piari idegedo maundo awamanemi rorae bebegae berari ainda gisijiari yaida itera, edo embomai ainkainmi wasiri bebegae edo era ainde awa dada ara. 42 Ango edo anelamanemi awamane augaro yai beyae niyao matawa aveite isira ainda mambara. Edo yai ainda ji site ji vegeiaro kitoru katoru taina. 43 Edo embomai wasiri dambu darari awa ijimi parara datembedo eira ango, awamanemi parara datembara awamaneda Mamo da gisijiari yaida. Edo imomane dengorode ingari tao gido, ingiwo! Ge ro tena awa bé gain edo awa gawa!
Iesu mi eniya ge gaiapa onjigarida budo atopaposisina.
44 “Edo daedo, utuda gisijiari awa engo gaiapa onjigari buroda doda isinesina. Iji da (1)de embo da (1)mi gaiapa awa tapusina, edo ami tekago onjigesisina. Ango edo imo yawa eite maundo ainda rorae berari piesiri embo neimi oriedo ganu pietero kundo maundo buro awa ine oriesisina.
Iesu mi eniya ge kau darigabéda budo atopaposisina.
45 “Edo daedo, utuda gisijiari awa engo origarori ari embo da (1)mi kau darigabé kakowa edo esisina. 46 Edo iji ainde imo kau da (1) tega ikanebé tamundo, ami maundo ainda rorae berari piesiri embo neimi oriedo ganu pietero kundo maundo kau awa ine oriesisina.
Iesu mi eniya ge monga wo bararida budo atopaposisina.
47 “Edo daedo, utuda gisijiari awa ango wo bararida monga. Iji da (1)de wo iro ari embo neneimi awamaneda monga ubutuda augetero un wo neide kainde monga doda ekitera. 48 Edo monga awa womi beda esiri, wo iro ari embobomi dumbero gundo korada esisina. Ango edo awamane anumbedo wo davegave awa doregedo kambia bajina neneida sisiritera, ata bebegae awa augesitera. 49 Awatedo iji beao arida, iwata ari engo idegaina. Anelamanemi gundo wasiri bebegae ari embomai avekave embomai wasiri dambu dararida teoroda itera awa kundo evekara ara. 50 Ango edo augaro yai beyae niyao matawa aveite isira ainda doda mambara. Edo yai ainda ji site ji vegeiaro kitoru katoru taina.”
Iesu mi eniya ge mando tutuda budo atopaposisina.
51 Edo Iesu mi ainda ambodanide tedogosisina, “Imomane rorae berari eiwa gewo arapa esirita?”
Awamanemi embo ainde mina sitera, “Een Badari, nakare arapa esira.”
52 Edo ami awamanede ge sisina, “Awa dave, awatedo Aodarida atopapasigari berari da da utuda gisijiarida atopatari* utuda gisijiarida atopatari awa God da sima ari daveda atopatari (Matthew 3:2da kondade ari ge daedo giwo.). bira, awa ango embo mando tutumi ainda roviravi itari yaida gaiapa teteka ae mamatu de kundo idegedo eira.”
53 Edo iji ainde Iesu eniya ge eiwa piedo itae edo yai ainda awa dodo maunsisina.
Nasaret embomaimi Iesu ajiregesitera.
(Mark 6:1-6; Luke 4:16-30)
54 Ango edo imo ainda nasi topobéda gundo, tuturo edo awamaneda benunu oroda embomai awa atopaposisina. Edo awamane korebé edo sitera, “Embo emi dubogari eiwa ae buro babain ari eiwa de yai nonda biri? 55 Eiwa oromando ari emboda mai rita? Awa gebé. Edo ainda aida dao Mary tedo era awa rita? Gebé. Edo ainda nanonameji awa James, Joses, Simon ae Judas† Judas einda awa Judas Iscariot ae, ata embo eve. Judas einda awa Joseph ae Mary deda mai. Judas Iscariot awa Simon da mai (John 13:2 giwo.). de rita? Gebé. 56 Edo ainda ruaimono berari awa kaenamonde einda iterita? Een, gebé. Embo emi rorae berari eiwa yai nonda biri?” 57 Awaembo awamanemi imo jipapa ae esitera.
Ata Iesu mi awamanede sisina, “Peroveta awa yai neneida tou edo era. Ata ainda nasi topobé doda edo ainda orobe doda awamanemi imo tou ae edo era.” 58 Edo awamaneda gebé ari ainda yai piae, awatedo ami yai ainda buro babain jiwae ae.
*13:11 utuda gisijiarida gebé onjigari awa ‘God da onjigari gebé nongo edo imo ainda gisijiari buro aina.’
†13:12 God mi embomai edo eira, edo ami embo enembo berarida yai ainda gebéda gari tegada tegada pisido eira. Awatedo embo ainmi God da gisijiarida gebé nei gain jipapa eira awa, God mi ainda yai gari awa piari jiwaebé gaina. Ata embo ainmi God da gisijiarida gebé nei gain jipapa ae awa, saka ro ainda yai isira awa dodo baina (Psalm 139:14-18; Rome 1:18-25).
13:15 Isaiah 6:9-10
‡13:19 embo beyae awa Satan (1 John 5:19).
§13:24 Utuda gisijiari awa engo da moka awa ‘Nongo edo God mi ainda sima ari daveda buro aini awa engo.’ (Ge dá ango Matthew 13:31, 33, 44, 45, edo 47 isira.)
*13:31 masitet awa pingi ae. Awa ni Israel embomaimi buroda uredo esitera. Edo ainda vero mundedo unde baige edo awamaneda indarida saka saka piedo injido esitera.
13:35 Psalm 78:2
†13:38 embomai God mi gisijido eira. Gurikida ge awa ‘gisijiarida mamai’.
‡13:38 embomai embo beyaemi gisijido eira. Guriki da ge awa ‘embo beyaeda mamai’. Edo embo beyae awa Satan (Matthew 13:19).
§13:39 Binei awa Satan da dao nei.
*13:52 utuda gisijiarida atopatari awa God da sima ari daveda atopatari (Matthew 3:2da kondade ari ge daedo giwo.).
†13:55 Judas einda awa Judas Iscariot ae, ata embo eve. Judas einda awa Joseph ae Mary deda mai. Judas Iscariot awa Simon da mai (John 13:2 giwo.).