1 Qinee Pauroosa minara iriseeqa inni Eefeesusa maqannara Anutufinnai innaaru qidaqa. Qinee inni aanaamuruara qimannimunnana akiaqara asauku mundirana Yisuna rumbaranara foora Roomma maqannaasa rumbaranaki marunausa maridaqa inniara innaaru qidaqa. 2 Anutufa narí afaariranannai inni aanaamuru dadaaqiaqee qimasee qimunara innee amiqimmandee minara irimariafanoo. 3-4 Anutufa Yisunara ooqaindari kukeeqanoo marunara maqee aukuana qini kooroomaqimaqeenoo. Qinee maa pasanaki kaqikaaqoo minara inni qimannimiqa, innee mina asaana rumaseeqa iriqa qiniara asauku mundirana kukeeqara irirana amiqimmandee iridanoommifoo qifaranoo.

5 Ooqai narí kukeeqara irirana Anutufa sia kooroo inau, doo maqee narí maraqunannai amiqira niqiqoo fasiqausa faqa tamummaqara fasiqauqasaa faqa qimanniminoo. 6 Mina kukeeqara ufa maaqimminoo maridanoo. Yuda maqannaasa Anutuna amiqi amiqiranaki maridaqa, Yisuna amiqira fasaasa ufa fannoo inni aanaamuru faqa oonu mareeqeenoo Yuda maqannaa amiqi amiqiranaki quqannisaidanoo. Innee aanaamuru mariasa maqee Yuda maqannaasa saimbaqa moodaa nifaaqara foora maridaqa asauku mundirana Yisunakiqari Yuda maqannaasa qima afeekaikammaqoofa innee aanaamuru misa saimbaqa minaki marida maree mariafanoo.

7 Anutufa narí afeekannai naakaparana akoofasaikirana moo qimufaqa qinee minannai Yisuna amiqira fasaasa ufa saikira faiqikiqa maridaqa. 8 Qinee Anutuna aiku asauku maqasaa fasiqaki oorudupirausa marunanoo Anutufa sia minara irinoo kaqi mi naakaparana qiminoo diqiqamaqimaqeenoo asauku mundirana, innaarunai nimira amiqi amiqira ainaina moomoo ainaina sia amana asaana rirana amana mi ufanara aanaamuru qimannimiranaki qini quqaqisaifaqa maridaqa. 9 Anutuna ooqai kukeeqara irirafa maqee kooroommasee faiqí anaasee amiqimmandee iriaqeera faqa qini minaki faqa quqaqisaifaqa maridaqa. Anutufa aiqama ainaina auquqoofanoo marufa miqooqari moomoo aukuana narí kukeeqara irirana Yisunara kisaaqasaa rafaaqafuqoofanoo marinau. 10 Maqee aukuana kooroo ianifeera qimasee Yisuna ufara suqimariasa misannai Anutufa narí irirana quandaqaandidanoo uqannifiqaifaqa qafaidaqa mina amiqi amiqiranara innaarunai ameemaanai mariasa misa uriqararausa faqa rakisirausa faqa maqee uqannifiqaanifeera Yisuna kooroo idanoo.

11 Anutufa narí naaru naaru mariranaki maridanoo mi ainainna auquanauree qimaqoona maqee auqinau, narí asauku mundirana Yisunannai mi ainainna, narí ufara suqimariasakina narí irirana kooroo ianifeera auqinau. 12 Maasa Yisunasaa atooaqa marianannai faqa maasa mina saqarikiranannai faqa sia maasa nisaurida rufiaanaura, paasoosamasee Anutuna afusaa fuannanara mi eedoo qirafa maasaindi maridanoo. 13 Qinee Pauroosa minara irisee inni afeekaikamandaida qimannimidaqa. Qinee Yisuna ufa qimannimunaqa misa minara fifau qini karabusaki quqeeqa. Inni Eefeesusa maqannaasa qinee karabusaki marunna aupuraranara iriseeqa sia Yisuna ufa minniseeqa kudoosaapaaqa, innee minara maaqi qiaqa Pauroona karabusaki marirana maasa Eefeesusa maqusanaasa amiqimaqimaqaidanoo fee qimasee asasiaqa.

14 Qinee minara iriqa maasa qikoona Anutunara iriseeqa qiqoori saunarafiqa kummara mafi inniara qeeqa qimuqusannoo innaaru qidaqa. 15 Innaarunai mariasa faqa maqasaa mariasa faqa aiqamatia Anutunasaaqaraana nariqa nuqu uqanna maraidaqa. 16-18 Mi Anutunara inniara innaaru qidaqa, asauku mundirana innee saqarikiranannai mifa anireenoo inni naunduraki maaqakiara foora ani keeqaanifeera. Mifa narí maraqunannai narí areenarana firaanakiqari inni naunduraki afeeka niminaqa mapukusee mariaqa. Qinee inniara maaqi qidaqa innaaru qidaqa, innee inneeqa atukara foora faqa faakanara foora faqa nariara nariara nimuqusiranaki mapukusaaqa, innee Eefeesusa maqannaasa faqa Anutuna aiku asauku moo maqannaa mariasa saimbaqa afeeka marinaqa minannai asauku mundirana inniara amuqusinoo aidirana firaana iriaqeera innaaru qidaqa. Mifa inniara amuqusinoo aidirana mina kisaaqasaa aidirana faqa mina qusa kamu faqa mina meerai sandaaqaira faqa mina meemai farumara foora marirana faqa mina firaatiara iriaqeera qinee innaaru qidaqa. 19 Eeoo innee mina inniara amuqusirana firaanara iriaqeera innaaru qidaqa, sia amana moo fannoo firaaqoo iriannoo, firaafa maridanoo, mina amuqusirana firaafa maridanoo, innee mina amuqusirana firaana iriseeqa Anutuna umbiqarafa innikina umbiqaanifeera inniara innaaru qidaqa.

20 Anutuna afeeka fannoo maasaki saikiranannai naunduraki amiqi amiqirana nimiannoo, mina naunduraki dadaaqirafa maasa sia amana minara iramasee qimiannee qianaura sia amana maasa minara irianaura firaa ainainatia maridanoo. 21 Yisuna ufara suqimariasa nariqa asauku mundiranasaa atooaranannai Anutuna amooqirafa maqee kamuqoo faqa naaru naaru faqa mariani.