1 Qinee Pauroosa karaambaiqa Yisuna ainaini marunnana akiaqara Roomma maqannaa karabusaki maridaqa. Qinee karabusaki maridaqa inniara afeekaikamandee qimannimidaqa. Anutufa inni naaramasoofaqa innee asauku mundirana saqariki maru kamuqooqari inneeqa nirana mariranara andeeqasee marianifee qimasee inni naarama minaki quqeenoo. Inneeqa marirafa mina amanakai marianifeera qinee qeeqa qimuqusa ookiqari afeekaikamandee qimannimidaqa.

2 Sia Anutufa quqaqoo andeeqarana minnisee moomau fuaqa, innee maqee maqee sia urinaaqaraaqa oorudupimasee mariaqa, sia aanooiaqa, ireeda kai pisoopisoomandee mariaqa sia faiqí aanaaseera qusa ufa qimasee aanooiaqa kisaaqasaa ireeda kai idaaqammannimaqaaqa. Innee faiqí aanaaseera nimuqusinanoo nidimarinaqa mifa kooroo ianifee qimasee narinni narinni dadaaqifanoo mifa kooroo iani.

3 Anutuna maraquna fannoo inni moodaanaki mara quqasaifaqa mariafanoo innikina asooarafa inni moodaanaki afapita qumaraifaqa mariafanoo innee mina moodaanaki marirana amiqimasee rakisiaqa, rakee iani. 4 Maasa Yisuna ufa irimariasa moodaa nifaaqara foora maridaqa, Anutuna maraquna faqa moodaa maridanoo Anutufa moodaa ainainara afeesiranaki inni rarisama quqeenoo. 5-6 Karaambaiqa moodaa kai maridanoo, Yisuna saqarikirafa moodaa kai maridanoo, amaana nammari moodaa Yisuna auqusaa kai rumannimaqarafa maridanoo maasa aiqama maqa maaqakinaasa nikoofa Anutufa moodaa kai maridanoo, aiqamausa karaambaiqa mifa kai maridanoo mifa narí ufara suqimariasa aiqama naunduraki maridanoo aiqamausakiaqa ainainidanoo.

7 Asauku mundirafa nimira dadaaqira afeeka maasa aiqamausa qiminau narí moomoo dadaaqiranakinaana qiminau. Moo dadaaqira afeeka moo fasiqa aminau, moo dadaaqira afeeka moo fasiqa anaasee niminau. Nimisoofaqa minannai Yisuna saika maraaqeera niminau. 8 Ooqeenaa tamummaqara fasiqa asauku mundirafa dadaaqira afeeka qimianinnanara maaqi qimasee akara rinau.

9 Mi tamummaqara fasiqana ufa kooroo irafa Yisunara maaqimminoo maridanoo. 10 Mifa narí maqusai meerai ooru funara maaqi qidanoo, mifa naaree meemai maqa ameemaanai ooqureenoo miqooqari mifa kai innaaruna maarini aiqama innaaruna maarinni oorureenoo narí marirana narí auqu amana kai marianifeera aiqama atinai narí irirana narí auqu amana kai quqasanau.

11 Mifa kaqi nimira dadaaqira afeeka faiqí anaasee niminau, mi dadaaqira afeekafa ainainirana akoofasaikiaqee qimasee akaqausee niqiqoo fasiqausa akoofasaikirana niminau, akaqausa faiqí anaasee qimannimirana akoofasaikirana niminau, akaqausa aamina maqannaasa qimannirana akoofasaikirana faqa paatoo saika akoofasaikirana faqa ufasaa rakisirana akoofasaikirana faqa niminau. 12 Anutufa sia fifaufau mi dadaaqira afeekana niminau, faiqí anaasee Yisuna ufara suqimariasa Yisuna afaaqara foora afeekaikamasee mariaqeera mi dadaaqira afeekana oosana oosana maasa qiminoo qinau, innee maa dadaaqira afeekana marasee minannai qini ufara suqimariasa afeekaikamannisaaqee qinau. 13 Maasa miqimamaree fidaqa maasa kasooqaqee moodaanaki kianaura. Anutuna amaakuara irirana faqaa irirana minasaa rusirana faqa miqiananannai mi moodaanaki kirafa amana kambiqaannoo, mikari maasa faiqí firaasa iriranara foora maraanauranoo maraseeqa asauku mundirana firaa irirana amana kai ooru mundufuanauranoo. 14 Mikari maasa sia faiqi aanaaqiara foora aiqama oosana oosana amaana ufa iriseeqa munari minari ianaura unna ufa qimaria fasiqausa nári nikaruqira finnai akaqausa aaqaranaki rarisama quqaidaqa maasa misa ufa iriseeqa sia ufaira foora aiqama saqari udammi udammianaura. 15 Maasa sia miqiaqa, maaqiaqa, nariara nariara qimudaoo qimasee ridaqa minaki maridaqa nariara nariara sia unnufa qiaqa, anoona ufa kai qidaqa maasa miqianannai faiqi aanaaqiara foora asauku mundirana maasa qikiaqa amanakai innooqamaree ooru mundufuanaura.

16 Asauku mundirafa narí ufa ameemaanai mariasa rakisimarifaqa misa minara maasa qikiaqa fee qidaqa. Faiqí afaaqa sia moodaa ainaina maridanoo oosana oosana afaaqa ati fannoo aadu aadu ainaina akoofasaikirana moodaanaki ootupamafifanoo moodaa fasiqa maridanoo. Asauku mundirafa maasa qikiaqa marifa maasa rakisimarifaqa maasa faqa miqi kai iqa faiqí afaaqa fooqaana aadu aadu akoofasaikirausa moodaanaki ootupanoo marifaqa maasa qikiaqa Yisunasaa atooaqa maridaqa mina afaaqaikiqa maridaqa. Maasaki aiqamausa naadu naadu nariqa saikirana andeeqasee maridaqa sia nariara nariara nikooqaani nariara nariara rinnanannai moodaanaki innooqafinoo amiqimmandee kambiqafi fuannoo.

17 Miqi marianara qinee Pauroosa Karaambaiqa auqusaa inni qimannimidaqa afeekaikamandee kafaa kafaa qimannimidaqa, sia Anutunara aamina maqannaasa naanna raaqa. Misa irirafa fifau faafaumminoo maridanoo. Innee andeeqasee mariaqa. 18 Misa nitikurakinaa irirafa asukunaki maridanoo Anutufa nimimari marirana sia misa kaqikaaqoo maraidaqa aanaamuruara foora sia maraidaqa, misa kaaqa irirana siaisa furufari mariasa nári qimaqaamau kai fimariasa, minara kai asukunaki maridaqa. 19 Misa nisaurirana taikarausa maridaqa nári nifaaqa marirana mandoosanai kai ubeekaidaqa oosana oosana nisaurimaria ainainna sia nisauridaqa fanandidaqa kaqi umaraidaqa.

20-21 Innee Eefeesusa maqannaasa miqira mandoosana sia asauku mundirana saaqaraana iriafanoo, innee minara irisee Yisuna aiku asauku kambiqafufaqa andeeqara irirana faqaasa inni mina anoona ufa inni qimannimiafaqa irimariafanoo. 22 Minara innee inneeqa ooqeenaa marirana nirana fatika aqusaaqa inni ooqeenaa marirafa inniqa mareeqeenoo inniqa manda nikaruqira nidiranaki quqasoofaqa miqoo innee inneeqa kai kuridimariafanoo. 23 Inni nimuqusaki manda nidira nidimarina faqa nitikura mandirira irimariana faqa taikasee innaarunaindaraana fuka amiqirafa kai mariani. 24 Inni innaarunaindaraa fuka marirafa Anutuna narí miqirafa maridanoo, mina anoona ufaki andeeqasee marirana faqa Anutuna ufa ameemaanai marirana faqa mina amooqirana faqa mi fuka marirafa anoona maridanoo, innee mi marirana kai qamunnara foora afisusee minaki maraqa nuaqa.

25 Doo minara maaqooqari sia unna ufa kafaa mariani, taikaani, aiqama narinni narinni anoona ufa kai narí qimami narí qimami qiaqa, maasa aiqamausa moodaa nifaaqara foora kai marunnanara naríndi naríndi marunnanara unna ufa sia qiaqa anoona ufa kai qiaqa.

26-27 Ani aanooirafa kambiqafinoo sia ani rarisameeqee mandainainaki quqaani, anee aanoo qinana doo mi faasaanasaa mi suanina keeqarana namufaqa taikaseena faiqaa sia kisaaqasaa aanooida maria, dauni taikaa, Sadannafa minaki keekafinoo mandainaina uqeeraandoora.

28 Ainaina ummuari mari fasiqafa ummuarirana taikaani, taikasee quandaki andeeqasee narí ainainamasee narí narana namasee kudi fasiqauqa faqa naida niminaqa naaqa.

29 Sia putaa ainaina afunda ainainara ufa qiaqa, faiqí anaasee pooduqamannimaqaida dadaaqimaria ufana kai qimasaifaqa misa iriseeqa amiqirana adiafaairana mareefaranoo.

30 Manda ufa qinanoo Anutuna naaquqara maraquna fannoo iriseenoo akooqaanoo. Anutuna maraquna fannoo inni faqa marifa Anutuna akarara foora naríndi fee qidanoo inniki akara rinoo maridanoo. Mi maraquna akarafa maaqi qimasee inniara qima afeekaikidanoo kasooqaqee Anutufa qinanoo Yisufa qumuree inniara qinindi fee qimasee maraannoo.

31 Doo maqee aukuana aiqama sukaqara ufa faqa qusufa qimasee darara qirafa faqa naunduraki mari aanooirafa faqa fatika aquaqa. Nariara nariara firaa kari nameera ufasaa niqimariafa faqa aquraree mariannana faqa sia kafaa mariani naundurakinaa nariara nariara fidiaqaa ira irirafa faqa taikaani.

32 Sia miqiaqa, maaqiaqa, nariara nariara ireeda kai nimuqusa reendeenirafa faqa dadaaqirafa faqa mariani, narinni narinni mandainaina minnisaaqa. Maasa oosana oosana ainainannai Anutuna mandaikamma amaqaafanausa marifanoo Anutufa asauku mundiranannai maasa darirana minniqisanau. Doo innee minara iriseeqa mina amana kai doo inniqa niqoonausa mandaikamma nimaqarana narí minnisee narí minnisee iaqa.