1 Na tanga e Ikonium e Paulus e Barnabas ru dili na roho na vaponga, i manga a rabune rua ru rata vakaroro. A nivara ne rua i kavakava hateka, lakea e huriki a Iuda ala kupo ri luhoi torea e Kristo. E huriki a bakovi a ngatavine ala kupo i uka ma ria a Iuda, ria ranga ri luhoi tora. 2 Pali e huriki a Iuda ranga ri koi ni luhoi e Isu, ri piurike e huriki i uka ma ria a Iuda ri gi tepu e huriki ri luhoia e Kristo. 3  * Mrk 16:20; Hib 2:4I mavonga e Paulus e Barnabas ru made na parava i kupo vonga. I uka ma ru mangenge. Ru vara pagapaga ne Bakovi Dagi. Na tahuna ru vara, e Bakovi Dagi i vakasiri e huriki vona a ngava ru taki na naro kamumu vona i muholi hateka, i habi a nitora ne rua ru rata a maka nivakasiri. 4 E huriki vonga na tanga dagi ri vapida na niluhoi. E huriki ranga ri taga ne huriki a Iuda. Pali e huriki ranga, ri taga ne vikirua, a apostolo. 5  * Apo 14:19Lakea e huriki a Iuda, e huriki i uka ma ria a Iuda, turana e huriki a kakaina tanga ri varodo a ngava ri gi ratapile rua, ri gi padi rua na kedo.

6 Pali ru lohoka vona a naro ta ri gi rata virihi ru vona, lakea ru ha lakea na tabeke ne Likonia na tanga dagi e Listra e Derbe, na maka tanga ri pesi tabukoi ne rua. 7 Na tahuna ru bele vonga, ru vara na Velenga Kamumu.

8 A bakovi tara i made o Listra, a vaha hale. A vahana i hale na tahuna ni poda ia vona, lakea i uka ma i laho kilala. 9 A bakovi iea i made vonga i talangakia e Paulus i vara. Lakea e Paulus i mata tamoro lokovonga vona, i masia i luhoi torea e Isu ge vakamahuria, 10 lakea i gale tala i ta maea, “O pesi rike.” I malaviriri kunana i pesi rike, i vakatubu ni laho.

11  * Apo 28:6Na tahuna ri masia a maki e Paulus i ratea, ri gale tala na nita Likonia, ri ta maea, “A bakovi nga, a vure ru vulo manga bakovi, ru puru valai ne hita!” 12 E Barnabas ri galea e Seus, e Paulus ri galea e Hermes, a vuhuna ia a viri i habi a ngava. 13 A roho na vure e Seus i pesi tabukoi, polovavo na tanga dagi. Lakea a prister ne Seus i bole valai na poridala na tanga dagi a maka bulmakau, a hurumade ni basi. Ge a nihabi na apostolo nga.

14 Pali na tahuna a apostolo e Barnabas e Paulus ru longo vona a maki ri ngaru ni ratea, ru rape a varakia ne rua,* Ru rata mavonga, a vuhuna ru marikoi e huriki ri gi kavurike rua. ru nunu lakea ne ria, ru gale tala, ru ta maea, 15  * Sng 146:6; Apo 10:26“I navai mu rata mavonga? Maria a bakovi tavula kunana manga mua! Miri valai koea miri ngaru ni vakalongo mua vona a Velenga Kamumu, mu gu ha taro a maka maki tavula nga, mu gu ramai a Vure mahuri, a viri i ratarike a hunu, a malala, a dari, turana maki lobo i tabuli ne tou. 16  * Apo 17:30Hosi i matataro e huriki i uka ma ria a Iuda ri ramai kunana a ningaru ne ria. 17  * Jer 5:24Pali i uka ma i kapiloho liu, ge uka a viri ge lohoka vona. I vakasiri vakaroro a ningaru vona ne mua: I vakaboru vilia na hunu a vala, i rata a maka maki ni kani kamumu ri koru rike, ri ramai a parava ne ria. I habi a maki ni kani i kupo ne mua, i rata mua mu vivi.” 18 Ru rata a ngava nga, pali e huriki ri tabana ri ngaru ni habi a nihabi ne rua.

19  * Apo 17:13; 2Ko 11:25Pali e huriki a bakovi ranga o Iuda ri valai o Antiok o Ikonium, ri piurike e huriki, ri padia e Paulus na kedo. Ri pahaluhoia ta i mate, lakea ri lalu talea na tanga dagi. 20 Pali na tahuna e huriki a murimuri ri pesi haluia, i pesi rike, i dili tabu na tanga dagi. Na parava muri i vano turane Barnabas, ru lakea o Derbe.

21 E Paulus e Barnabas ru vara na Velenga Kamumu na tanga e Derbe, lakea e huriki ala kupo ri luhoi torea e Kristo. Muri ru hamule lakea na tanga e Listra, e Ikonium, e Antiok, 22  * Apo 15:32; 1Tes 3:3ru vakatora a niluhoi ne huriki a murimuri vonga ri gi pesi tora na niluhoi torea e Kristo, ru ta maea, “Bara si bole a nimadihi i kupo muga ni dili na harikianga na Vure.” 23 Na tanga takutaku na tabeke ne huriki ri luhoia e Isu, ru vulaki ranga bakovi ge ria a matakari na lotu. Ru peremu na ni kani, ru vasileki, ru habi ria na limane Bakovi Dagi, ra viri ri luhoi torea.

24 Ru laho poloa pali a robo e Pisidia, muri ru bele na tanga e Pampilia. 25 Ru vara na Velenga Kamumu na tanga e Perga, muri ru puru lakea na tanga e Atalia.

26  * Apo 13:1-2Muri ru rike na aga vonga, ru hamule lakea na tanga e Antiok, ra tanga muga e huriki a kabu ne Kristo vonga ri habi rua na naro kamumu na Vure ru gu ratea a leho. Ngane ru vakaloboa pali. 27  * Apo 15:4,12Na tahuna ru bele o Antiok ru gale palupu e huriki a tara ne Kristo, ru vakalongo ria vona a maka maki a Vure i rata na limane rua. Ru vakalongo ria vona a Vure i vakasiri a dala ne huriki i uka ma ria a Iuda, ri gi luhoi torea e Kristo. 28 Muri ru made tabaka vonga o Antiok turana e huriki a murimuri.