1  * Levi 23:5; Gi 9:1-5; 28:16; Vin 16:1-2Na tahuna e Moses e Aron ru tababana o Egipto, e BAKOVI DAGI i taki rua, 2 “Ra keva iea, a mugana keva na pida. 3 O taki e huriki a Israel, na ravuluna parava na keva iea, a bakovi takutaku ge lavea tara tuna sipsip ge kania a kabu vona. 4 A kabu kiroko, i uka ma i kara ge kani kiria a tuna sipsip, ge takia tara kabu i made tabukoi ge valai ge kani turana. E huriki a bakovi, a ngatavine, a koma ri gi vaveru kamumu a bobona, ri gi kani. 5 Mu vulaki a sipsip a toga o a meme a toga gavutuvutu, a pida vona ge taku, pali naha ni lave a viri i tahoka a gilanga. 6 A maka sipsip a bulmakau ni gi matakari kamumu ge harena na parava ge ravulu a polona i va na keva iea. Na malunga liu, e huriki a Israel ri gi rabalaki a maka tuna sipsip. 7 A darana sipsip ni gi bole, ni gi kalu varago a dahana mataruma, a tabeke polomeli na mataruma. 8 Na rodo iea mu gutu na kanono a maka tuna sipsip turana a lahia lahaha, mu kani kinika na bret i uka is. 9 Naha ni hoda a bobona sipsip a bulmakau, naha ni nono na ulo. Mu gutu kunana na kanono a mapana, a vahana, a mahalana. 10 Naha ni ru ranga bobona sipsip a bulmakau ge palala taho a hini. A bobona mu kani kaleva, mu gutu ge vuro lobo liu. 11 Na tahuna mu kani, mu rea tata a varakia ne mua, mu rodo a vahapolo, mu nugu a kodo na nilaho. Mu kani malaviriri, a vuhuna ra kinani iea ne vona ni luhoi a parava iau e Bakovi Dagi a pagepolo mua, i uka ma a ratapile mua.

12 “Na rodo iea ga lakea na tabeke lobo ne Egipto, ga rabalaki e huriki a tabua bakovi, a tabua toga na sipsip, a bulmakau. Iau kunana e BAKOVI DAGI, bara ratapile a maka vure ne huriki a Egipto. 13 Ra dara mu kalu na mataruma ne mua ge tabuli ga kilakila ne mua. Na tahuna a matai a dara mu kalu na mataruma, bara pagepolo a ruma ne mua. Ra vuranga iea i uka ma ge padoi mua na tahuna a ratapile e huriki a Egipto.”

14  * Nim 23:15; 34:18; Levi 23:6-8; Gi 28:17-25; Vin 16:3-8Muri a Vure i ta maea, “Mu luhoi vaka­roroa ra parava iea na maka nivakasiri a rata ne mua. Na pida lobo e huriki a hamone mua, ria ranga, bara ri luhoi mulea a parava iea. Ra parava iea, a parava ne BAKOVI DAGI. 15 Na parava ge polorua mu kani a bret i uka ma ni vuli turana is. Na mugana parava mu vuroki a is i tabuli na ruma ne mua. E rei a viri i kani a bret i tahoka a is na parava nga, ni gi lili tala na kabu ne Israel. 16 Na mugana parava, na poloruana parava mu vapopo palupu mu vasileki. Naha ni leho vona a parava i rua nga, mu kisi puru kunana a kinani ge kani e huriki.

17 “Na pida lobo mu luhoia ra Parava Dagi na Bret i Uka Is, a vuhuna a vakamariu tala mua o Egipto na parava iea. 18 Na mugana keva mu kani a bret i uka is. Mu vakatubu na malunga na parava na keva i ravulu a polona i va, ge harena na malunga na parava na keva i ravulu rua a polona i taku. 19 Na parava ge polorua nahea a is ge tabuli na ruma mua. A viri i kani a bret i tahoka is, mu lili talea na kabu ne Israel. A mosi tara mu rata mavongea. 20 Na tahuna mu made na hini vai, na parava iea, naha ni kani a bret i tahoka a is.”

21 E Moses i gale palupu e huriki a gare ne Israel i taki ria, “Mu hamule mu vulaki a tuna sipsip na kabu takutaku, mu rabalaki ne vona a Habu na Nipagepolo. 22 Mu guru dili na tavila a dara. Mu putu a rahana kai a hisop, mu lutu na dara i tabuli na tavila, mu kalu varago a dahana mataruma, a hini polomeli na mataruma. Mu made pololilo na ruma ge harena na hatelanga. 23  * Hib 11:28E BAKOVI DAGI bara i lakea na tabeke lobo ne Egipto ge rabalaki e huriki a koma bakovi, a tabua. Na tahuna i matai a dara na mataruma ne mua, bara i pagepolo. I uka ma ge rudua a agelo vona ge dili na ruma ge ratapile mua.

24 “Mu longo kamumu! Ra nita nga ge tabuli vakaroro turane mua, turane huriki a hamone mua. 25 Na tahuna mu dili vona a malala e BAKOVI DAGI i ta muholi vona ge habia ne mua, mu ratea a habu iea, mu luhoi mulea a parava iea. 26 Na tahuna e huriki e tune mua ri gi nana, ‘I navai a vuhuna ra habu iea?’ 27 Mu koli mu ta maea, ‘Si ratea a Habu na Nipagepolo iea, si habi a nihabi ne Bakovi Dagi, a vuhuna si luhoi mulea a parava i pagepolo a ruma ne hita, i rabalaki e huriki a koma bakovi, a tabua, ne Egipto.’ ” Muri ri lolu puru ri kavurikea a Vure. 28 E huriki a Israel ri rata lobo a maki e BAKOVI DAGI i taki e Moses e Aron ru gu rata.

29  * Nim 4:22,23Na kururodo e BAKOVI DAGI i rabalaki e huriki a tabua bakovi ne Egipto. I vakatubu na tabua ne Parao i harena na tabua ne huriki a vorakato. A tabua a toga na maka bulmakau a sipsip, ngi ranga i rabalaki. 30 Na rodo iea kunana, e Parao turane huriki a bolekori vona, e huriki a Egipto, ri hadongo ri matai e huriki a tabua bakovi ri mate. Na tabeke lobo ne Egipto e huriki lobo ri rata runga, a vuhuna a ruma takutaku i tahoka a matenga.

31 Na rodo iea kunana, e Parao i gale e Moses e Aron i taki rua, “Muru vano malaviriri turane huriki a Israel, mu pe mule e huriki a viri nau. Mu vano mu kavurikea e BAKOVI DAGI, i manga a ngava mu taki iau vona. 32 Mu bole a maka sipsip, a meme, a bulmakau mu vano. Iau tara mu vasileki na Vure ge rata kamumu iau.”

33 E huriki a Egipto ri turahari e huriki a Israel ri gi vano, ri ta maea, “Mu vano malaviriri, ma ge uka, mia lobo mi gi mate.” 34 Lakea e huriki a Israel ri bole a bret i uka ma ni vuli turana is, ri ru na tavila ri kavitagu na kala, ri kaloho, ri vano. 35  * Nim 3:21-22Ri nongi ne huriki a Egipto a maka varakia, a maki ni rata na gol a silva, i ramaia a nitane Moses i taki ria vona. 36 E BAKOVI DAGI i rata e huriki a Egipto ri habi tavula a maka mahala ne ria. Na naro iea kunana e huriki a Israel ri bole lobo a mahala ne Egipto.

37 E huriki a Israel ri malaga o Rameses ri lakea o Sukot. E huriki ri mariu ri ala 600,000, a ngatavine a koma i uka ma ni gi. 38 E huriki i uka ma ria a Israel ranga ri dili turane ria ri vano turana a maka sipsip a bulmakau ne ria. 39 Na tahuna ri gutu a bret ri gi bole turane ria, i uka ma ri vuli turana is, a vuhuna e huriki a Egipto ri turahari ria, i uka ma ri kisi kamumu a kinani.

40  * Vuh 15:13; Gal 3:17E huriki a Israel ri made na pida i 430 na robo e Egipto. 41 Muri na pida i 430, na parava iea kunana, e huriki a tara ne BAKOVI DAGI ri pe a robo e Egipto, ri mariu tala. 42 Na rodo iea kunana e BAKOVI DAGI i matakari kamumu e huriki a Israel, i bole tala ria o Egipto ri vano. Na pida lobo e huriki a hamone ria ri gi luhoi mulea ra rodo iea, ri gi kavurikea e BAKOVI DAGI.

43 E BAKOVI DAGI i taki e Moses e Aron, “A vinara na Habu na Nipagepolo i maea, ‘E huriki a mosi nahea ri gi kani na habu. 44 A vorakato ni kona i kara ge kani na habu, na tahuna ni pala pali a kulina. 45 A viri i made popote turane mua, a viri i leho ni gi kona, nahea ge kani na habu.’

46  * Gi 9:12; Ion 19:36“E huriki ri kani a tuna sipsip ri gi kani palupu kunana na ruma ni gutu a kinani vona. Naha ni bole tala ranga bobona. Naha ni raputu ranga tuhana. 47 E huriki a Israel ri gi rata palupua a habu iea.

48 “A bakovi basi i made turane mua i ngaru ni dili na Habu Nipagepolo ne BAKOVI DAGI, ni gi pala taro a kulina. Muri bara i manga a tahotanga, i dili na habu. A viri i uka ma ni pala a kulina, nahea ge kani na habu. 49 A vinara i taku kunana ge ramai e huriki a tahotanga e huriki a mosi ra ri made turane mua.”

50 E huriki a Israel ri ramai kunanea a vinara e BAKOVI DAGI i taki e Moses e Aron vona. 51 Na parava iea kunana e BAKOVI DAGI i vakamariu tala o Egipto e huriki a Israel.