1  * Nim 12:1-13Na mugana keva na ruana pida, muri ne huriki a Israel ri pe e Egipto ri made na tabeke i ngeki ne Sinai, lakea e BAKOVI DAGI i takia e Moses i ta maea, 2-3 “Ne ravulu a vana parava (14th) na keva iea, na malunga liu e huriki a Israel ri gi rabalaki a maka sipsip ge a nihabi, ri gi ratea a Habu na Nipagepolo ri gi luhoia a parava a pagepolo ria, a rabalaki e huriki a tabua ne Egipto. Ra parava iea, a parava muholi na habu. Mu ramai a maka vinara lobo vona mu kani.”

4 Lakea e Moses i taki e huriki a Israel ri gi ratea a habu iea, ne vona ni luhoi mule a parava a Vure i tuhori e huriki a Israel ri made kamumu. 5 Ri ratea a habu iea na malunga liu na parava i ravulu a polona i va na mugana keva na malala golea ne Sinai, i ramai a ngava e BAKOVI DAGI i vakuku e Moses vona.

6 Pali ranga bakovi ri padoi a podana bakovi i mate, lakea i uka ma ri matapado na matana Vure. I mavonga i uka ma ri kara ni ratana a habu na parava vona muholi. Na parava na habu ri lakea ne Moses e Aron, 7 ri ta maea, “Mi nugu a podana bakovi i mate, i uka ma mi matapado. Pali i navai i uka ma mi gi vapopo turane huriki mi gi habi a nihabi ne BAKOVI DAGI?”

8 Lakea e Moses i koli i ta maea, “Mu dava popote taro, ga nana taroa e BAKOVI DAGI.”

9 Lakea e BAKOVI DAGI i takia e Moses 10 ge taki e huriki a Israel, ge ta maea, “Na tahuna mua, e huriki a hamone mua ri nugu a podana bakovi i mate ri muto, o ri havai na tanga basi, ri kara ni ratea a Habu na Nipagepolo ne BAKOVI DAGI. 11-12  * Nim 12:46; Ion 19:36Pali na ruana keva na malunga liu ne ravulu a vana parava (14th), ri gi ratea a habu iea. Ri gi ramai lobo a maka vinara na habu iea. Ri gi kania a sipsip iea turana a bret i uka is, a kobo i lahaha. Nahea ri gi ru mule ranga bobona sipsip ge vona a hini kuduvi. Na tahuna ri poka a sipsip nahea ri gi biputu a tuhana. 13 Pali e rei a viri i matapado na matagu, o i uka ma i havai lakea na tanga basi, lakea i uka ma i ratea a habu iea na mugana keva. Ni gi tono tala ne huriki a tara nau, a vuhuna i uka ma i habi a nihabi nau na tahuna i rata a nihabi. I mavonga ge kaloho mulea a nimavana naro hale vona.

14 “Na tahuna a mosi tara i made turane mua i ngaru ni ratea a Habu na Nipagepolo ne BAKOVI DAGI turane mua, ra bakovi iea i kara, pali ge ramai lobo a maka vinara na habu iea. E huriki a tahotanga, a mosi ri gi ramai kunanea a vinara iea kunana.

15 Na parava ri vakapesi a kape na Ngava Dagi, a bubu i puru valai i kavitagua a Mailo na Vure. Na rodo ri masia a bubu i manga a kanono. 16 Na parava vakaroro a bubu i kavitagua a kape. Na rodo vakaroro a hubena kanono i kavitagua a kape. 17 Na tahuna a bubu i pe a kape i vano, e huriki a Israel ri bole a maki ne ria ri muri maia. Na tahuna a bubu i pesi na tabeke tara, e huriki a Israel ri rata a mada karaba na tabeke iea. 18 Na tahuna e BAKOVI DAGI i ta, e huriki a Israel ri pe a mada ri vano, na tahuna i ta tabu ri rata a mada karaba. Na tahuna a bubu i tababana ni pesi na Mailo na Vure, ri made kunana na mada. 19 Na tahuna a bubu i pesi tabaka na Mailo na Vure, e huriki bara ri ramai a nita ne BAKOVI DAGI ri made na mada. 20-21 Na parava ranga a bubu i pesi langa na Mailo na Vure na parava popote kunana, o na keva ranga, o na pida i taku, muri i malaga tabu i vano. Na tahuna a bubu i malaga i vano, e huriki a Israel ri masia ri malaga ri ramaia. I uka ma ri gi loho rua vona ni malaga na rodo o na haro. Na tahuna iea kunana bara ri malaga ri vano. 22 I uka ma ni lohopae vona ge balaka riva a bubu ge pesi na Mailo na Vure, ge harena na parava i rua, o na keva i taku, o na pida i taku, re huriki a Israel i uka ma ri gi malaga ri gi vano. Pali na tahuna a bubu i malaga i vano, ria ranga ri malaga ri pea a tanga ri laho. 23 Na tahuna e BAKOVI DAGI i vakuku e huriki a Israel, bara ri rata a mada. Na tahuna i vakuku tabu, bara ri bole a maka maki lobo ne ria, ri malaga, ri lakea na tabeke tara. E BAKOVI DAGI i habia ne Moses a nita iea, lakea e Moses i vakalongo e huriki, ri ramaia.