1 E Isu i taki e huriki a murimuri vona i ta maea, “A bakovi na mahala tara i tahoka a bolekori i matakari a mahala vona. Pali e huriki ranga ri takia ra bolekori i rata marogo a mahala vona. 2 Lakea i gale vilia a bolekori i nanea, ‘A ra maki a longoa ta o ratea? O vakalongo iau ngane, o matakari navai a mahala nau, a vuhuna bara o lobo na leho.’

3 “A bolekori i luhoi lege lae, lakea i luhoi maea, ‘A bakovi a leho vona bara i vakalobo iau ngane na leho. A ra ga ratea ngane? A uka a nitora ga leho ga keli a malala. A maruhu ni nongi a maki na viri tara. 4 A luhoi ngane a maki ga ratea na tahuna ga lobo na leho. Bara ratea tara naro, lakea e huriki a bakovi bara ri vivi ni matakari iau na ruma ne ria.’

5 “Lakea a bolekori i gale takutaku e huriki ri bole a kinori na bakovi dagi vona. Lakea i nanea a viri i muga, ‘I riva a kinori vomu o bole na bakovi dagi nau?’

6 “I ta maea ia, ‘Iau a bole a namona oliv, a nimavana i 800 galen.’

“Lakea a bolekori i takia, ‘O bolea a raukea o made puru malaviriri, o here puru a kalavana ge 400 galen kunana. Muri o koli.’

7 “Muri i nanea a viri tara, ‘Pali ioe i riva vomu a kinori?’

“I ta maea ia, ‘Iau a bole a kulopi na vit i 100.’

“Lakea i takia, ‘O bolea a raukea, o here puru a kalavana ge 80 kunana. Muri o koli.’

8 “A bakovi dagi i kavurikea a naro hale na bolekori vona, a vuhuna i matakari mule kamumu hateka ia. E huriki a bakovi na uvo ri lohoka hateka ne huriki a bakovi na nipara na ni matakari mule ria. 9 I mavonga, a taki mua, mu hatebalala, mu habi lae a mahala ne mua, lakea e huriki bara ri ngaru a vilone mua. Muri, na tahuna i lobo a mahala, bara mu tahoka a tanga meli na hunu mu gu made vona vakaroro.

10  * Luk 19:17-26“E rei a viri i matakari kamumu a maki kiroko, bara i matakari kamumu a maki dagi. E rei a viri i tatami na maki kiroko, bara i tatami na maki dagi. 11 I mavonga kunana, mua i uka ma mu matakari kamumu a mahala na malala, i uka tara viri ge luhoi mua mu gu matakari kamumu a mahala muholi. 12 Pali mua i uka ma mu matakari kamumu a mahala na viri tara, i uka tara viri ge habi a mahala mua mu gu matakari.

13  * Mat 6:24“A vora i uka ma ge vora na bakovi ala rua, a vuhuna bara i koi vona tara, i ngarua tara. Bara i habi a hatena na bakovi tara, i biu a bakovi tara. I uka tara viri ge vora varago na Vure, a moni.”

14 E huriki a Pariseo ri longo a ngavane Isu, ri padikedea e Isu, a vuhuna ri ngaru hateka a moni. 15  * Mat 23:28; Luk 18:9-14Lakea e Isu i taki ria, i ta maea, “Mua kunana ra mu ngaru e huriki ri gi matai mua, ri gi luhoi ta mua a bakovi kamumu. Pali a Vure i lohoka ne mua, a vuhuna a maki e huriki a bakovi a ngatavine ri luhoi ta a maki kamumu hateka, a Vure i marikoi hateka vona.

16  * Mat 11:12-13“Hosi si ramai a vinara, a hinere ne huriki a propet. Pali na tahuna e Ioanes i valai, i vakatubu vonga, a Velenga Kamumu na harikianga na Vure ni vakalongo lae. E huriki lobo ri varede ni dili. 17  * Mat 5:18A hunu a malala bara ru lobo. Pali i uka tara vinara na Vure ge velu.

18 “E rei a bakovi i pilea e girihina, i parangi tabu a ngatavine tara, ra bakovi iea i mole. E rei a bakovi i parangi a ngatavine i pilea e girihina, ia tara i mole.

19 “A bakovi tara, a bakovi na mahala, i bagetu vakaroro na varakia kamumu. I vivi ni kani na parava vakaroro a kinani kamumu. 20 Polovavo na ruma vona, a matasia tara, a rane Lasarus, i mahita mavonga na logona nure. I tuvu lobo vona a ngarava a kulina. 21 A maka ligo ri valai bala, ri dame a ngarava vona. I ngaru ni kani a momona kinani i boru puru polotano na dede na bakovi na mahala. Pali a bakovi na mahala i uka ma i dodoa ranga.

22 “Na parava tara a matasia iea i mate. E huriki a agelo ri valai, ri bole sikea, ri taparakia ge made turane Abraham. Muri a bakovi na mahala i mate, ni tanu. 23 I made na kanono, i bole a nimadihi dagi. I mata sike, i masia e Abraham i made basi hateka. E Lasarus i made turana. 24 Lakea i gale tala, i ta maea, ‘O tata Abraham, o dodo iau, o rudu vilia e Lasarus ge lutu a kukulimana na naru, ge vakamalupea a tabelegu, a vuhuna a bole hateka a nimadihi koea na kanono.’

25 “Pali e Abraham i koli, i ta maea, ‘O tugu, o luhoi mule na tahuna o mahuri vona. A maka maki kamumu i bele vomu. Pali a maka maki hale kunana i bele ne Lasarus. Pali ngane ia i made kamumu ieni, o bole a nimadihi iene ke. 26 Pali a maki tara tabu. Na kurukurune tarua i tahoka a golu dagi ni ru. Mia koea bara mi ngaru ni lakene, bara mi keri. Mua iene ranga, bara mu ngaru ni valai, bara mu keri.’

27 “Muri i koli i ta maea, ‘Pali o tata, o rudua e Lasarus ge hamule lakea na ruma ne tata, 28 ge matai e turagu ala lima vonga. Ge taki tora tou nahea to go muri mai iau vona ra tanga na nimadihi.’

29 “Pali e Abraham i koli, i ta maea, ‘A vinara ne Moses a hinere ne huriki a propet i tabuli pali. A ngaru to go ramai.’

30 “Pali i koli ia, i ta maea, ‘I uka, o tata Abraham. A viri tara i mate pali bara i hamule mai tou, bara to pulo a vilone tou.’

31 “E Abraham i koli, i ta maea, ‘Ri koi ni longo mai e Moses, e huriki a propet, lakea i uka ma ri gi longo mai a viri ge mahuri mule na nimate.’ ”