1 Muri e Isu i taki e huriki a muri­muri vona, turana e huriki ri vapesihi vonga, i ta maea, 2 “E huriki a mari na vinara na lotu, e huriki a Pariseo ri made na murine Moses ri vara mua na vinara. 3  * Mal 2:7-8Mu longototo a vinara ne ria. Pali naha ni muri mai a vilone ria, a vuhuna i uka ma ri muri mai a ngava ri vara vona. 4 Ri habi a vinara ne huriki i gutu ni ramai, i manga a viri i rotu a maka galesi dagi, i vakakaloho e huriki a bakovi vona. Pali ria ri koi hateka ni tuhori popote e huriki.

5  * Nim 13:9; Gi 15:38-39; Vin 6:8; Mat 6:1 “A maki lobo ri rata, ri vakaholi kunana, e huriki ri gi matai. Ri tama na dumene ria a maka puhu na nitana hinere, ri bole na limane ria ranga. Ri rata a varakia na nivasileki ne ria i ola, i bola. 6 Ri ngaru ni made mugamuga na gula kamumu na habu, na gula kamumu na roho na vaponga. 7 Ri ngaru hateka e huriki ri gi togo ria, ri gi tagui ria na mada. Ri ngaru hateka e huriki ri gi gale ria ‘a mari ni tovo.’

8 “Pali mua, nahea tara viri ge gale mua ‘a mari ni tovo,’ a vuhuna a mari ni tovo ne mua i taku kunana. Pali mua e maki turana mai. 9 Nahea mu gu galea tara viri na malala ge tamane mua, a vuhuna e Tamane mua i taku kunana, ra i made na hunu. 10 Nahea tara viri ge gale mua ‘a bakovi dagi,’ a vuhuna a Bakovi Dagi ne mua i taku kunana, re Kristo. 11  * Mat 20:26; Mrk 9:35; Luk 22:26A viri i muga ne mua ge ia a vora ne mua lobo. 12  * Jop 22:29; Snd 29:23; Luk 14:11; 18:14E rei a viri i bibi rike mulea, a Vure bara i vakakiroko ia. Pali e rei a viri i vakakiroko mule ia, a Vure bara i kavurikea.

13-14 “Mua e huriki a Pariseo, a mari na vinara na lotu mu tabele rua hateka! A Vure bara i ratapile mua! Mu tukari a logo na harikianga na hunu, i uka tara viri ge dili. Mu koi ni dili vona, pali mu hatekakari e huriki ranga ri ngaru ni dili.* Ves 14 i uka ma i tabuli na hinere na maka puhu hosi. I tabuli kunana na maka puhu karaba. I maea: 14 Mua e huriki a Pariseo, a mari na vinara na lotu mu ngava naru hateka! A Vure ge ratapile mua! Mu tami e huriki a havuri mu panaho a ruma ne ria. Mu tero kunana vona a nivasileki i ola mu rata.

15 “Mua e huriki a Pariseo, a mari na vinara na lotu, mu tabele rua hateka! A Vure bara i ratapile mua! Mu laho lae basi, mu page poloa a dari mu gu tuli a viri ge ramai mua. Pali na tahuna i ramai mua, a rabu hale vona i rangi a rabu hale ne mua, lakea bara i puru turane mua na imperno.

16  * Mat 15:14 “Mu ngaru ni vakasiri e huriki na dala, pali mu kepa. A Vure bara i ratapile mua! A ngava mu takia i maea, ‘E rei a viri i ta muholi, i kaba, i kurahia a roho na Vure, a maki tavula. Pali a viri i ta muholi, i kaba, i kurahia a gol i tabuli na roho na Vure, ge ramai a ngava i takia.’ 17 Mu kepa, mu manga! I vai a maki i dagi? A gol tavula, o a roho na Vure ra i ratea a gol i tabuli herehere, ge ne vona a leho na Vure?

18 “Pali a ngava tara mu takia i maea, ‘A viri i kaba na dede, a maki tavula. Pali a viri i kaba na nihabi, ge ramai a ngava i takia.’ 19 Mu kepa! I vai a maki dagi: a nihabi, o a dede ra i ratea a nihabi i vaperesi, ge ne vona a leho na Vure? 20 I mavonga kunana, a viri i kaba na dede, i kaba vona turana maki i tabuli langa vona. 21 A viri i kaba na roho na Vure, i kaba vona turana viri i made pololilo vona. 22  * Ais 66:1; Mat 5:34 A viri i kaba na hunu, i kaba na gula hariki na Vure, i kaba na viri i made langa vona.

23  * Levi 27:30; Mai 6:8 “Mua e huriki a Pariseo, a mari na vinara na lotu, mu tabele rua hateka! A Vure ge ratapile mua! A maki lobo ne mua mu ru na naguna i ravulu, lakea mu bole talea a naguna i taku mu habia na Vure. A maka maki tavula ranga, manga a kobo mu rata mavonga. Pali mu mata taro a maka ngava dagi na vinara. Mu mata taro a naro ni rata virihi e huriki lobo ge ramai a vilone ria. Mu mata taro a naro na nidodo, a naro ni luhoi torea a Vure. I kamumu mu gu ramai a vinara kiroko. Pali naha ni longokaburungi tabu a maka vinara dagi. 24 Mu ngaru ni vakasiri e huriki na dala, pali mu kepa mua! Mu ramai a maka vinara tavulavula, pali mu mata kepa vona a maka vinara dagi. Mu rata mavonga, mu manga a bakovi i bole talea na kikei na naru vona a lango, pali i mata kepa vona a kamel, i todoa.

25  * Mrk 7:4 “Mua e huriki a Pariseo, a mari na vinara na lotu, mu tabele rua hateka. A Vure ge ratapile mua! Mu ramai a vinara ni loi a tabeke polovavo na kap, a tavila. Pali a maki mu ru dili na kap, a tavila, mu bole na naro ni panaho, na naro ni raha. 26 Mu kepa! Mu pelekado taro a hatene mua. Muri a narone mua bara i malamala.

27  * Apo 23:3 “Mua e huriki a Pariseo, a mari na vinara na lotu, mu tabele rua hateka! A Vure ge ratapile mua! Mu manga a lovo ne huriki ri mate, ni kalu keakea. I mata kamumu a hini polovavo, pali a hini pololilo i vona a tuha, a berana huriki ri mate. 28  * Luk 16:15I mavonga kunana e huriki ri matai mua, ri luhoi mua ta mu malamala. Pali a hini pololilo ne mua i vona a naro na tabele rua, a naro na ni longotaro a vinara na Vure.

29 “Mua e huriki a Pariseo, a mari na vinara na lotu, mu tabele rua hateka! A Vure ge ratapile mua, a vuhuna mu hae a murina tuhana e huriki a propet, e huriki a bakovi malamala hosi, mu vakabagetu. 30 Mu rata mavonga, a vuhuna mu luhoi maea, ‘Mia bara mi made hosi na tahuna e huriki a gare ne hita ri made na malala, i uka ma mi gi kori ria, mi gi rabalaki e huriki a propet nga.’ 31  * Apo 7:52I mavonga mu vakasiri mua, mua a hamone huriki ri rabalaki e huriki a propet. 32 Pali ngane mu vakalobo a leho e huriki e tubune mua ri doko hosi.

33  * Mat 3:7; 12:34; Luk 3:7 “Mua e huriki a mata! Mua e huriki a mata hale! A Vure ge rudu mua mu gu lakea na imperno, bara mu keri ni ha taroa. 34 I mavonga, ga rudu lakea ne mua e huriki a propet, e huriki a bakovi na lohokanga, e huriki a mari na vinara na lotu. Bara mu rabalaki ranga, mu paditata na kai tavalavala ranga. Bara mu lagu pololilo na roho na vaponga ranga, pali e huriki ranga bara mu lili lae ria na maka tanga. 35  * Vuh 4:8; 2Sto 24:20-21Na naro iea kunana bara mu rare na matenga ne huriki a bakovi malamala ni rabalaki, i vakatubu na bakovi malamala e Abel, i valai i harena ne Sakarias, e tune Berekia, ra mu rabalakia na roho na Vure, na kurukuruna tabeke ni gamai, a dede. 36 A taki muholi mua, mua e huriki na tahuna mona bara mu bole a nimadihi, a vuhuna e huriki a bakovi nga ni rabalaki.

37 “Ierusalem, Ierusalem! Mu rabalaki e huriki a propet, mu rabalaki na kedo e huriki a rudu valai ne mua. Balaka kupo a ngaru ni kalipopo palupu mua, i manga a kinana kureko i kavitagu a maka tuna na karapana, ga matakari mua. Pali mu koi mua. 38  * 1Ki 9:7-8; Jer 22:5A Vure i pea pali a roho ne mua. 39  * Sng 118:26Ngane a taki mua, i uka ma mu gu matai tabu iau ge harena na parava mu gu ta maea, ‘Si gi kavurikea a viri i valai na rane Bakovi Dagi.’ ”