Luda yã takada kũ Bisã yão NAANAA 39

Yusufu kũ Pↄtifa nanↄo

1 Kũ Sumaila burinↄ kà kũ Yusufuo Misila, akũ Misila gbɛ̃ Pↄtifa a lùḿma. Firi'auna ìba kemɛ, àkũmɛ a dogarinↄ gbɛ̃ zↄ̃kↄ̃ ũ. 2 Dikiri kú kũ Yusufuo, akũ à sa'a kũ̀. À kú a dikiri Misila gbɛ̃ pì bɛa. 3 Kũ a dikiri pìi è Dikiri kú kãao àdigↄ̃ a dakarɛ kũ sa'ao yã kũ àtɛn kɛnↄ gũn pínki, 4 akũ Yusufu a pↄnna lè. Pↄtifa a dìtɛ a azia ũ à pↄ́ kũ à vĩnↄ nànɛ a ↄĩ pínki. 5 Zaa gↄrↄ kũ à a dìtɛ a azia ũ, Dikiri arubarikaa dà a bɛn Yusufu yãi. Dikiri arubarikaa dà pↄ́ kũ à de a pↄ́ ũnↄgu pínki, bɛ pↄ́nↄ kũ burapↄnↄn yá. 6 Akũ Pↄtifa a pↄ́ sĩnda pínki nà Yusufunɛ a ↄĩ. A bàka kú yãkeoro, tó adi kɛ pↄ́ble baasiro. Yusufu sↄ̃ bi gↄ̃ kɛfɛnnamɛ, akũ a zɛna mana.

7 Zĩkea Yusufu ni gɛ̃̀ a dikiri nanↄgu, akũ à pìnɛ: Ǹ wútɛ kũmao. 8 Akũ à gì à pì: Ǹ gwa, ma dikiri bàka kú yãkeo ↄn dí gũn doro, à pↄ́ kũ à vĩnↄ nàmɛnɛ ma ↄĩ pínki. 9 A gbãna demala ↄn dí gũnlo, adi gímɛnɛ kũ pↄ́keoro, sé mↄkↄ̃n, kũ ń de a nↄ ũ yãi. Mani fↄ̃ mà yã vãni bire taka kɛ mà durunna kɛ Ludanɛro. 10 Bee kũ nↄgbɛ̃ pìi dìgↄ̃ onɛ baabↄrɛ, adi we à wùtɛ kãaoro, à ye àgↄ̃ kú kãao sero.

11 Zĩkea kũ Yusufu gɛ̃̀ kpɛ́n a zĩ kɛ, à sù à lè ↄn zĩkɛri ke kú kpɛ́ gũnlo. 12 Akũ nↄgbɛ̃ pì a kũ̀ a utaa à pì: Ǹ wútɛ kũmao. Akũ Yusufu a uta tònɛ gwe à bàa lɛ̀ à bò bàai. 13 Kũ nↄgbɛ̃ pìi è à a uta tòarɛ à bàa lɛ̀ à bò bàai, 14 akũ à ↄn zĩkɛrinↄ sìsi à pìńnɛ: À gwa, ò sùwɛrɛ kũ Eberuo, akũ àtɛn dↄkɛ kũoo. À gɛ̃̀mai à wútɛ kũmao, akũ ma wiki lɛ̀. 15 Kũ à mà ma wiki dↄ̀awa, akũ à a uta tò katɛna ma sarɛ à bàa lɛ̀ à bò bàai. 16 Akũ nↄgbɛ̃ pìi uta pìi kàtɛ a sarɛ ari Yusufu dikirii sù, 17 akũ à pìnɛ: Eberu zↄ̀ kũ n su kãaowɛrɛ dↄkɛ̀ kũmao à gɛ̃̀mai. 18 Kũ ma wiki dↄ̀a, akũ à a uta tò katɛna ma sarɛ à bàa lɛ̀ à bò bàai. 19 Kũ nↄgbɛ̃ pì yã pìi ò a zãnɛ à pì, lákũ n zↄ̀ↄ kɛ̀mɛnɛ nàn gwe, akũ Yusufu dikiri pↄfɛ̃̀ manamana. 20 Akũ à pì ò Yusufu kũ ò a da kpɛ́siran, gu kũ gbɛ̃ kũ kína bàa dↄ̀ḿmanↄ kátɛn, akũ à gↄrↄ pla kɛ̀ gwe.

21 Bee kũ abireo Dikiri kú kãao à gbɛ̃kɛ kɛ̀nɛ à tò a yã kà purusunanↄ dãkpãrigu. 22 Akũ dãkpãrii pì purusunanↄ nà Yusufunɛ a ↄĩ ń pínki, òdi yãke kɛ a sariro. 23 Purusunanↄ dãkpãrii pìi bàka dìgↄ̃ kú Yusufu yãoro, kũ Dikiri kú kãao yãi, akũ àdigↄ̃ a dakarɛ kũ sa'ao yã kũ àtɛn kɛ gũn pínki.