Luda yã takada kũ Bisã yão NAANAA 40

Yusufu purusunanↄ nana bↄkↄtɛnaa

1 Abire gbɛra Misila kína Firi'auna wɛ̃kpaatɛri kũ a burodikɛriio taari kɛ̀nɛ. 2 A pↄ fɛ̃̀ a ìba gbɛ̃nↄn pla pìnↄi, a wɛ̃kpaatɛriki kũ a burodikɛrikio. 3 Akũ à ń ká kpɛ́siran a dogarinↄ gbɛ̃ zↄ̃kↄ̃ bɛa, kpɛ́ kũ ò Yusufu dàn. 4 Dogarinↄ gbɛ̃ zↄ̃kↄ̃ pì Yusufu dìtɛ àgↄ̃ ń gwa, akũ ò gↄrↄ pla kɛ̀ kpɛ́ pìn gwe.

5 Gwãani dokↄ̃nↄa Misila kína wɛ̃kpaatɛri kũ burodikɛrii pìio nana ò ń gbɛ̃nↄn pla ń pínki, baadi kũ a pↄ́o kũ a bↄkↄtɛnaao. 6 Kũ Yusufu sù ń gwa kↄnkↄ, à è ń ãnn sìsi. 7 Akũ à ń lá à pì: Bↄ́ yã mɛ́ à tò á ãn sisina gbãraa? 8 Ò wèa ò pì: Nanan o ò, gbɛ̃ke kú la kũ à a àlesi owɛrɛro. Akũ à pìńnɛ: Luda mɛ́ à nana àlesi bↄkↄtɛna vĩroo? À á nana pìnↄ omɛnɛ mà ma. 9 Akũ wɛ̃kpaatɛriki a pↄ́ ònɛ à pì: Ma nana gũn ma geepi lí è ma sarɛ. 10 Geepi lí pì ↄnɛ aakↄ̃mɛ. À lá bò à vú kɛ̀ à nɛ́ ì à mà. 11 Má Firi'auna toko kũna, akũ ma geepi nɛ́ pìnↄ sɛ̀ ma fɛ̃̀ a toko pìi gũn ma kpàa. 12 Yusufu pìnɛ: Nana pìi bↄkↄtɛnan dí. Lí'ↄnɛ aakↄ̃ pìnↄ bi gↄrↄ aakↄ̃mɛ. 13 Gↄrↄ aakↄ̃ gbɛra Firi'auna ni n mì sí. Ani ɛra à n da n zĩ gũn, ĩni ɛra ǹgↄ̃ wɛ̃ bonɛ lákũ ndìgↄ̃ kɛ nà yã. 14 Tó yã bò kũnwo nna, ǹ tó ma yã gↄ̃ dↄngu. Ǹ gbɛ̃kɛ kɛmɛnɛ ǹ ma yã o Firi'aunanɛ de à ma bo kpɛ́sira dí gũn. 15 Zaakũ ò ma kũ kpãni zaa Eberu bùsun, akũ bee Misila la mádi yãke kɛ à kà ò ma da wɛ̀ɛ dí gũnlo.

16 Kũ burodikɛriki è Yusufu nana pìi àlesi'onaa bò kũ wɛ̃kpaatɛriio nna, akũ à pìnɛ: Ma nana gũn sↄ̃ ma è má burodi sɛna tãnko aakↄ̃ dikↄ̃ana. 17 Tãnko kũ à kú musu, burodi buri dasi kũ ma kɛ̀ Firi'aunanɛ ká a gũn, akũ bãnↄ tɛn ble ma musu. 18 Yusufu pìnɛ: A bↄkↄtɛnan dí. Tãnko aakↄ̃ pìnↄ gↄrↄ aakↄ̃mɛ. 19 Gↄrↄ aakↄ̃ gbɛra Firi'auna ni n mì zↄ̃ à n loko lía, bãnↄ ni n ble.

20 A gↄrↄ aakↄ̃de sↄ̃ Firi'auna igↄrↄ là kↄ̃kↄ̃mɛ, akũ à pↄ́ble kɛ̀ a ìbanↄnɛ. À wɛ̃kpaatɛriki kũ burodikɛrikio bↄ̀tɛ kpɛ́n a ìbanↄ wára. 21 Akũ à ɛ̀ra à wɛ̃kpaatɛriki dà a zĩn à ɛra àgↄ̃ í boarɛ. 22 Akũ à burodikɛriki lòko lía lákũ Yusufu ń nananↄ bↄkↄtɛnaa òńnɛ nà. 23 Yusufu yã dí dↄ wɛ̃kpaatɛrikin doro, a yã sã̀agu.