Luda yã takada kũ Bisã yão NAANAA 47

Isarailanↄ vutɛna Misila

1 Yusufu gɛ̀ɛ à yã ò Firi'aunanɛ à pì: Ma vĩ̀ninↄ bò Kanaanↄ bùsun kũ ń sãnↄ kũ ń blènↄ kũ ń zùnↄ kũ pↄ́ kũ ò vĩnↄ pínki, ò sù Gosɛ̃ bùsun. 2 Akũ à a vĩ̀ninↄ sɛ̀ gbɛ̃nↄn sↄↄro à ń mↄ́ Firi'aunanɛ. 3 Firi'auna ń lá à pì: Bↄ́ zĩn adì kɛɛ? Ò wèa ò pì: Ókↄ̃nↄ n zↄ̀blerinↄ, sãdãrinↄn ó ũ lán ó dizinↄ bà. 4 Akũ ò pìnɛ: O su vutɛ bùsun la gↄrↄ plamɛ, zaakũ nà kú Kanaanↄ bùsun manamana, sɛ̃̀ kun kũ ó sãnↄ blero. Ókↄ̃nↄ n zↄ̀blerinↄ, ǹ ó gba zɛ́ ò vutɛ Gosɛ̃ bùsun. 5 Akũ Firi'auna pì Yusufunɛ: Lákũ n de kũ n vĩ̀ninↄ sù n kĩnaa nà, 6 ǹ ń kátɛ Misila gu manan. Ò vutɛ Gosɛ̃ bùsun. Tó laakaridenↄn kú ń tɛ́, ǹ ma pↄ́nↄ nańnɛ ń ↄĩ.

7 Akũ Yusufu a de Yakubu sɛ̀ à gɛ̀ɛ à mↄ̀ Firi'aunanɛ. Akũ Yakubu sa mana ònɛ. 8 Firi'auna a là à pì: N ka wɛ̃̀n gbaa? 9 À wèa à pì: Ma kunna andunia gũn wɛ̃̀ basuddo akuriden dí. Ma wɛ̃̀ dí ká ma dizinↄ pↄ́ ũro, akũ à yã'ũmmana vĩ. 10 À sa mana ò Firi'aunanɛ dↄ, akũ à bò a kĩnaa.

11 Yusufu a de kũ a vĩ̀ninↄ kàtɛ Misila bùsu gu manan à ń gbá bùsu kũ Ramɛsɛ de a wɛ́ra ũ lákũ Firi'auna ò nà. 12 Yusufu pↄ́blewɛ kpà a dea kũ a vĩ̀ninↄ kũ a de bedenↄ ń pínki ↄn kũ ↄnnwo ń dasi lɛ́n.

Nà gbãnakũnaa

13 Nàa kɛ̀ gbãna, pↄ́blewɛ kú gukearo. Misilanↄ kũ Kanaanↄ gbãna làka. 14 Òtɛn pↄ́blewɛ lú, akũ Yusufu ↄgↄ kũ à kú Misila kũ Kanaao sì pínki à tào Firi'auna bɛa. 15 Kũ Misilanↄ kũ Kanaanↄ ↄgↄ làka, Misilanↄ sù Yusufu kĩnaa ń pínki ò pì: Ɔgↄ kun doro. Ǹ ó gba pↄ́blewɛ. Ǹsun tó ò ga n wáraro. 16 Yusufu pì: Lákũ ↄgↄ kunlo nà, à su kũ á pↄ́kãdenↄ, mani pↄ́blewɛ kpááwa a musu. 17 Akũ ò sù Yusufunɛ kũ pↄ́kãdenↄ, akũ à pↄ́blewɛ kpàḿma sↄ̃nↄ kũ sãnↄ kũ blènↄ kũ zùnↄ kũ zaakinↄ musu. Wɛ̃̀ birea à pↄ́blewɛ kpàḿma ń pↄ́kãdenↄ musumɛ.

18 Kũ wɛ̃̀ bire gɛ̃̀tɛ, akũ ò sù a kĩnaa a wɛ̃̀ làa ò pìnɛ: Dikiri, óni fↄ̃ ò yãke utɛnnɛro. Ɔgↄ làka, akũ ó pↄ́kãdenↄ gↄ̃̀ n pↄ́ ũ. Pↄ́ke dí gↄ̃ ò kpámmaro, ókↄ̃nↄ kũ ó buranↄ baasiro. 19 Ǹsun tó ò ga n wára kũ ó buranↄro. Ǹ ó lú kũ ó buranↄ ǹ fĩna bo kũ pↄ́blewɛo ò gↄ̃ Firi'auna zↄ̀nↄ ũ, ókↄ̃nↄ kũ ó buranↄ. Ǹ ó gba pↄ́blewɛ de òsun garo ògↄ̃ kun, akũsↄ̃ de ó buranↄ sún gↄ̃ tàraga ũro. 20 Akũ Yusufu Misila buranↄ lù Firi'aunanɛ pínki, zaakũ Misilanↄ baadi a bura yìa, kũ nà ń kũ gbãna yãi, akũ bùsuu gↄ̃̀ Firi'auna pↄ́ ũ. 21 Yusufu Misilanↄ sì zↄ̀nↄ ũ ń pínki zaa ń bùsu lɛ́n la gɛna a lɛ́ dire. 22 Ama adi sa'orinↄ buranↄ lúro, zaakũ Firi'auna dìtɛ àgↄ̃ pↄ́blewɛ kpáḿma gↄrↄ sĩnda pínki. Lákũ ò kú kũ pↄ́blewɛ kũ Firi'auna dì kpáḿmao nà, odi ń buranↄ yíaro.

23 Akũ Yusufu pì gbɛ̃nↄnɛ: Ma á lú kũ á buranↄ sà, a gↄ̃ Firi'auna pↄ́ ũ. Pↄ́blewɛn dí. À gɛ́ à tↄ̃. 24 Pↄ́kɛ̃gↄrↄ àgↄ̃ a lɛu sↄↄrode kpá Firi'aunaa, a kpara ni gↄ̃árɛ pↄ́wɛ ũ kũ pↄ́bleo. Àgↄ̃ abire ble kũ á nɛ́nↄ kũ á bedenↄ á pínki. 25 Akũ ò pì: N ó sura bà. Ǹ tó ò n pↄnna le dikiri, ò gↄ̃ Firi'auna zↄ̀nↄ ũ. 26 Akũ Yusufu yã dìtɛ Misila à pì, burapↄ lɛu sↄↄrode nigↄ̃ de Firi'auna pↄ́ ũ. Yã pì kun ari kũ a gbãrao. Sa'orinↄ bùsu mɛ́ adi gↄ̃ Firi'auna pↄ́ ũro ado.

Yakubu wɛ́kɛna zã

27 Isarailanↄn kú Gosɛ̃ bùsun zaa Misila. Ò ń zĩda zĩtɛ vĩ gwe, akũ ò nɛ́ ì ò kàra manamana. 28 Yakubu kɛ̀ wɛ̃̀ gɛ̃ro awɛɛpla Misila, a wɛ̃̀ pínkipinki basuppla awɛɛsupplamɛ. 29 Kũ à kà gana, à a nɛ́ Yusufu sìsi, akũ à pìnɛ: N yã nna! Tó ma n pↄnna lè, ǹ n ↄ da ma gbáda gbáru ǹ gbɛ̃kɛ kũ náanio yã kɛmɛnɛ. Ǹsun ǹ ma vĩ Misilaro. 30 Tó ma ka ma dizinↄla, ǹ ma sɛ́ ǹ bo kũmao Misila la ǹ ma vĩ ma dizi pìnↄ miran. Akũ Yusufu pìnɛ: Mani yã kũ n ò kɛnnɛ. 31 Akũ Yakubu pì: Ǹ la damɛnɛ. Kũ à la dànɛ, akũ Yakubu gbãna lè a gòoa à donyĩ kɛ̀.