Luda yã takada kũ Bisã yão NAANAA 48

Yakubu Ɛflaimu kũ Manaseo ditɛna a zĩda nɛ́nↄ ũ

1 Gↄrↄ pla gbɛra ò ò Yusufunɛ a de tɛn gyã kɛ, akũ à a nɛ́ gbɛ̃nↄn planↄ Manase kũ Ɛflaimuo sɛ̀tɛ à gɛ̀ɛ kũńwo. 2 Kũ ò ò Yakubunɛ a nɛ́ Yusufu sù a gwa, à kokari kɛ̀ à fùtɛ à vùtɛ a gádo musu. 3 À pì Yusufunɛ: Luda Gbãnasĩndapinkide bò à sùma zaa Luzu, Kanaanↄ bùsun, à arubarikaa dàmagu 4 à pìmɛnɛ áni tó mà nɛ́ i manamana, áni ma kara mà gↄ̃ burinↄ dizi ũ áni bùsuu pì kpá ma burinↄa ma gbɛra ń pↄ́ ũ ari gↄrↄ sĩnda pínki. 5 Tera sà nɛ́ gbɛ̃nↄn pla kũ n ń í Misila ari màgↄ̃ su n kĩnaanↄ ma pↄ́nↄmɛ. Ɛflaimu kũ Manaseo gↄ̃̀ ma nɛ́nↄ ũ lákũ Rubɛni kũ Simɛↄo de nà. 6 Nɛ́ kũ ĩni ń i ń gbɛranↄ mɛ́ onigↄ̃ de n pↄ́ ũ, oni ń túbi ble ń vĩ̀ninↄ kĩnaa. 7 Zaakũ kũ matɛn su kũ Mɛsↄpↄtamiao, n da Rahila gà zɛ́n Ɛflata kũ òdi pi tera Bɛtilihamu lɛ́i zaa Kanaanↄ bùsun, akũ ma a vĩ̀ zɛ́n gwe.

8 Akũ Isaraila Yusufu nɛ́nↄ gwà à pì: Dínↄn gwee? 9 À pì a denɛ: Nɛ́ kũ Luda ma gba lanↄn gwe. Akũ Isaraila pì: Ǹ mↄ́ kũńwo ma kĩnaa mà sa'olɛ kɛńnɛ. 10 Zĩkũna Isaraila wɛ́ bùsa àtɛn gu e manaro, akũ Yusufu nài kũ nɛ́ pìnↄ. Isaraila lɛ́ pɛ̀pɛḿma à ń kpá a kùla, 11 akũ à pì Yusufunɛ: Mádi da yã mà wɛ́ sinlɛ doro, akũ Luda tò ma n e kũ n nɛ́nↄ dↄ. 12 Yusufu ń gó a de gbála, akũ à kùtɛnɛ à a arɛ pɛ̀tɛ. 13 Akũ Yusufu a nɛ́nↄ kũ̀ ń pla ń pínki. À Ɛflaimu kũ̀ kũ ↄplao Yakubu ↄzɛ kpa, akũ à Manase kũ̀ ↄzɛ kpa Yakubu ↄpla kpa, akũ à nài kũ nɛ́ pìnↄ. 14 Akũ Yakubu a ↄ pã̀kↄ̃la à a ↄpla nà Ɛflaimu kũ à de dakũna ũ mìia, à a ↄzɛ nà Manase kũ à de daudu ũ mìia. 15 Akũ à sa'olɛ kɛ̀ Yusufunɛ à pì:

Luda kũ ma dizinↄ Ibrahĩ

kũ Isaakuo táa ò kãao,

Luda kũ à dòmɛnɛ arɛ

ma kunnaa gũn ari kũ a gbãrao,

16 a Malaika kũ à ma bo a vãnin pínki

à arubarika da nɛ́ díkĩnanↄgu,

à tó ògↄ̃ ń sísi ma tↄ́a,

kũ ma dizinↄ Ibrahĩ kũ Isaakuo tↄ́o,

à tó ògↄ̃ kↄ̃ manamana andunia gũn.

17 Kũ Yusufu è a de a ↄpla nà Ɛflaimu mìia, adi kɛnɛ nnaro. À a de ↄ kũ̀ de à go Ɛflaimu mìia à na Manase pↄ́a 18 à pì: Lɛnlo Baa, gbɛ̃ díkĩna mɛ́ à daudu ũ. Ǹ n ↄpla na a mìia. 19 Akũ a de gì à pì: Má dↄ̃ ma nɛ́, má dↄ̃. Àpi sↄ̃ ani gↄ̃ buri ũ, anigↄ̃ zↄ̃kↄ̃, ama a dakũna zↄ̃kↄ̃ nigↄ̃ deala, a buri nigↄ̃ dasi. 20 Zĩ kũ̀a à sa'olɛ kɛ̀ńnɛ à pì:

Isarailanↄ ni sa mana okↄ̃nɛ kũ á tↄ́o

oni pi Luda tó ǹ gↄ̃

lán Ɛflaimu kũ Manaseoo bà.

Lɛmɛ à Ɛflaimu dò Manasenɛ arɛ lɛ.

21 Akũ Isaraila pì Yusufunɛ: Ma ka gana, ama Luda nigↄ̃ kú kãáo, ani ɛra à tá kãáo á dizinↄ bùsun. 22 Sɛkɛmu bùsu mana kũ ma sì Amↄrinↄa kũ ma fɛ̃nɛdao kũ ma sáo, ma n gba, mↄkↄ̃n kũ ń de n vĩ̀ninↄla.