10
1 Pues entonces niwermanuox, lo que unsre tama niwalma y lo que war incꞌajti taca e Dios iraj iraj jax era: Que incꞌani tuaꞌ acorpesnobꞌ e gente xeꞌ tuobꞌ e Israel. 2 Pues ayan lo que erer inware tamarobꞌ xeꞌ jax era: Que jaxirobꞌ ayan inteꞌ nuxi useriaj tama e Dios, pero uchebꞌiobꞌ que atzꞌacta tuaꞌ taca acꞌupseyanobꞌ tut uley e Moisés. 3 Pues machi unatobꞌ cocha tuaꞌ aquetpa erach inteꞌ taca e Dios. Y tamar era ixin usicbꞌobꞌ e Dios bꞌan taca cocha ubꞌijnuobꞌ uchiobꞌ, pero machi cꞌani uwirobꞌ que ucꞌani tuaꞌ umanxujres ubꞌobꞌ tut e Dios tuaꞌ uyubꞌi aquetpobꞌ erach tacar. 4 Porque e Jesucristo cꞌapa uche tunor lo que ucꞌani uley e Moisés conda ixin chamay tuaꞌ ucorpeson, y tamar era jaxir uche que tunor tin e axin acꞌupseyanobꞌ tamar, axin aquetpobꞌ erach taca e Dios.
5 Pero tin e cꞌani aquetpa erach taca e Dios tacar taca uley e Moisés ucꞌani ani tuaꞌ uche bꞌan taca cocha chꞌar tzꞌijbꞌabꞌir umen e Moisés conda che: “E winic xeꞌ acꞌapa uche tunor lo que chꞌar tzꞌijbꞌabꞌir tama uley e Moisés cꞌani uchꞌami e cuxtar xeꞌ bꞌutꞌur taca uchojbꞌesiaj e Dios”, xeꞌ chꞌar tzꞌijbꞌabꞌir umen e Moisés. 6 Pero che tama uley e Moisés que inteꞌ erer aquetpa erach taca e Dios jay axin acꞌupseyan tamar, y que ma intran ani porque chꞌar tzꞌijbꞌabꞌir que: “Ira aware tama awalma y che, ¿chi tuaꞌ atꞌabꞌay axin tut e qꞌuin?” xeꞌ war che ¿chi tuaꞌ axin tut e qꞌuin tuaꞌ uyemse e Jesucristo tuaꞌ watar tara tor e rum tuaꞌ ucorpeson? 7 Y machi tuaꞌ aware: “¿Y chi tuaꞌ ecmay axin tama e chꞌen tiaꞌ aquetpobꞌ e chamenobꞌ?” xeꞌ war che ¿chi tuaꞌ axin tut e chꞌen era tuaꞌ utꞌabꞌse watar e Jesucristo tujam e chamenobꞌ tuaꞌ aquetpa tara tor e rum tuaꞌ ucorpeson? 8 ¿Y tucꞌa war che e ojroner xeꞌ che: “Pues e ojroner tama e corpesiaj toit turu; turu tama awej y turu tama awalma?” Y e ojroner era jax lo que ayan tama e cꞌupesiaj. Y jax era lo que war cachecsu tut e gente axin. 9 Porque jay achecsu taca awej que e Jesucristo jax Awinquirar y icꞌupseyan tama awalma que e Dios usuti ubꞌixqꞌues e Jesús tujam e chamenobꞌ, net tuaꞌ icorpesna. 10 Porque tama cawalma cacꞌupseyan tama e Jesucristo tuaꞌ caquetpa erach tut e Dios, y tama cawej cachecsu que e Jesucristo jax Cawinquirar tuaꞌ cacorpesna.
11 Pues chꞌar tzꞌijbꞌabꞌir tama uyojroner e Dios y che: “Tin e acꞌotoy acꞌupseyanobꞌ tama e Jesucristo ma tiaꞌ tuaꞌ asubꞌajrobꞌ conda acꞌotoyobꞌ tut e Dios.” Bꞌan chꞌar tzꞌijbꞌabꞌir tama uyojroner e Dios. 12 Pues mamajchi xeꞌ intiach uwirnar tut e Dios, motor jay tuaꞌ e Israel o motor jay majax tuaꞌ e Israel. Pues inteꞌ taca Cawinquirar y jaxir Uwinquir tujor tunor e winicobꞌ tara tor e rum, y jaxir tuaꞌ axin uchojbꞌes ut tunor tin e axin upejca ucꞌabꞌa. 13 Porque chꞌar tzꞌijbꞌabꞌir tama uyojroner e Dios y che: “Tunor tin e axin upejca ucꞌabꞌa Cawinquirar cꞌani acorpesnobꞌ.” Bꞌan chꞌar tzꞌijbꞌabꞌir tama uyojroner e Dios. 14 Pero ¿cocha tuaꞌ axin upejcobꞌ ucꞌabꞌa Cawinquirar Jesucristo jay ma tiaꞌ cꞌupseyanobꞌ tamar? ¿Y cocha tuaꞌ acꞌotoy acꞌupseyanobꞌ tama Cawinquirar Jesucristo jay ma tiaꞌ uyubꞌiobꞌ oꞌjron inteꞌ tamar? ¿Y cocha tuaꞌ uyubꞌiobꞌ e ojroner tama e corpesiaj era jay mamajchi acꞌotoy tutobꞌ tuaꞌ uchecsu tunor era? 15 ¿Y cocha tuaꞌ axin inteꞌ tuaꞌ uchecsu e ojroner tama e corpesiaj tut e gente era jay mamajchi uyebꞌta axin? Bꞌan cocha chꞌar tzꞌijbꞌabꞌir tama uyojroner e Dios y che: “Galan ucꞌoter tunor tin e uchecsu e ojroner tama e jiriar tut e gente y xeꞌ uchecsu tutobꞌ tunor e ojroner xeꞌ imbꞌutz tama e corpesiaj.” Bꞌan chꞌar tzꞌijbꞌabꞌir tama uyojroner e Dios.
16 Pero majax tunor e gente xeꞌ cꞌani uchꞌami e ojroner tama e corpesiaj conda achecsuna tutobꞌ. Pues chꞌar tzꞌijbꞌabꞌir umen e Isaías tama e onian tiempo y che: “Cawinquiraret, mamajchi war ucꞌupse e ojroner lo que war cawareobꞌ.” Bꞌan chꞌar tzꞌijbꞌabꞌir tama uyojroner e Dios. 17 E cꞌupesiaj watar tut inteꞌ conda war uyubꞌi uyojroner e Dios, y lo que war uyubꞌi era jax e ojroner tama e corpesiaj tama Cawinquirar Jesucristo.
18 Pero cꞌani umbꞌi tibꞌa: “¿Uyubꞌi ca e gente tuaꞌ e Israel e ojroner tama e corpesiaj?” Pues uyubꞌiobꞌ ixto yaꞌ. Porque chꞌar tzꞌijbꞌabꞌir tama uyojroner e Dios y che:
Pues obꞌna unucobꞌ ojron tic taca tama tunor or e rum tiaꞌ turobꞌ e gente tuaꞌ e Israel,
y tunor uyojronerobꞌ era cꞌotoy esto tama e lugar xeꞌ más innajt tama tunor or e rum era.
Bꞌan chꞌar tzꞌijbꞌabꞌir tama uyojroner e Dios. 19 Pero cꞌani umbꞌi tibꞌa otronyajr era: “¿O war ca unatobꞌ tin e tuobꞌ e Israel que e ojroner tama e corpesiaj era quetpa tuaꞌ tunor e gente tara tor e rum?” Pues chꞌar tzꞌijbꞌabꞌir umen e Moisés y che:
Cꞌani inche tuaꞌ ixqꞌuijna upater meyra gente,
xeꞌ majax inteꞌ chinam umen que jaxirobꞌ war uchꞌamiobꞌ meyra chojbꞌesiaj tuaꞌ e Dios y nox matucꞌa war ichꞌami,
y cꞌani inqꞌuijnesox upater inteꞌ chinam que matucꞌa ani unatobꞌ tama e Dios.
Bꞌan chꞌar tzꞌijbꞌabꞌir tama uley e Moisés. 20 Y ojron e Isaías y che:
Tin e machi ani war usicbꞌen utajwien,
Y cay inchectes nibꞌa tut tin e machi war usicbꞌen,
xeꞌ chꞌar tzꞌijbꞌabꞌir umen e Isaías. 21 Pero conda ojron tama e gente tuaꞌ e Israel ojron e Isaías y che: “War impejca e gente era tunor e día pero jaxirobꞌ machi cꞌani acꞌupseyanobꞌ taniut y matucꞌa ucꞌaniobꞌ tanibꞌa.”