1 Pues entonces cꞌani umbꞌi tibꞌa: “¿Chojcobꞌ ca inyajrer tin e tuobꞌ e Israel umen e Dios?” Ma cocha erer. Pues nen xeꞌ Pabloen tuen e Israel, y tuen uchꞌajnar e Abraham xeꞌ turuan tama e onian tiempo, y nen chꞌajnaren tuaꞌ e Benjamín xeꞌ turuan tama e onian tiempo ubꞌan. 2 Pues Cadiosir machi uchoqui inyajrer e gente xeꞌ tuobꞌ e Israel xeꞌ sicbꞌabꞌirobꞌ umener tama ucajyesnibꞌir tunor era. Pues nox war inata lo que chꞌar tzꞌijbꞌabꞌir tama uyojroner e Dios tiaꞌ e profeta Elías cay ucꞌajti taca e Dios, y cay uyare e Dios que e gente xeꞌ tuobꞌ e Israel machi ixto war uyujtzꞌiobꞌ ut e Dios y che: 3 “Cadiosiret, e gente xeꞌ tuobꞌ e Israel era cꞌapa uchamsiobꞌ tunor e profetobꞌ, y cay utijresobꞌ tunor e altar tiaꞌ ojytzna oit y nen taca xeꞌ quetpen y nen ubꞌan cꞌani uchamsenobꞌ”, xeꞌ chꞌar tzꞌijbꞌabꞌir tama uyojroner e Dios. 4 Pero e Dios uyare e Elías y che: “Pues nen insicbꞌix 7,000 winicobꞌ xeꞌ ma tiaꞌ cotuanobꞌ tut e chamen dios xeꞌ ucꞌabꞌa Baal”, che e Dios. 5 Y esto coner ayanto cora winicobꞌ xeꞌ tuobꞌ e Israel xeꞌ quetpa sicbꞌabꞌirobꞌ tuaꞌ acorpesnobꞌ umen utacarsiaj e Dios. 6 Y jay tacar utacarsiaj e Dios sicbꞌabꞌirobꞌ e winicobꞌ era, entonces war che que matucꞌa erer uchiobꞌ tuaꞌ uchꞌamiobꞌ e corpesiaj era, porque jay tamar lo que war uchiobꞌ uchꞌamiobꞌ ani utacarsiaj e Dios, entonces asatpa lo que war che e ojroner tacarsiaj.

7 Entonces ¿tucꞌa numuy tama e gente xeꞌ tuobꞌ e Israel? Pues machi uchꞌamiobꞌ e corpesiaj lo que cay usicbꞌobꞌ. Pero tin e sicbꞌabꞌirobꞌ umen e Dios uchꞌamiobꞌ ixto e corpesiaj. Y tunor e inmojr gente xeꞌ tuobꞌ e Israel era qꞌuecꞌojsena uyalmobꞌ. 8 Bꞌan cocha chꞌar tzꞌijbꞌabꞌir tama uyojroner e Dios tamar e gente xeꞌ tuobꞌ e Israel xeꞌ machi war acꞌupseyanobꞌ tut e Dios que: “E Dios uche aquetpobꞌ macar uyalmobꞌ e gente era, y uyajcꞌu unacꞌut pero matucꞌa chequer tutobꞌ xeꞌ tuaꞌ e Dios, y uyajcꞌu uchiquin pero matucꞌa uyubꞌiobꞌ xeꞌ arobꞌnobꞌ umen e Dios, y bꞌan taca aquetpobꞌ esto coner,” che e Dios. 9 Y chꞌar tzꞌijbꞌabꞌir ubꞌan tamar e gente era xeꞌ tuobꞌ e Israel umen e David y che:

11 Pues cꞌani umbꞌi tibꞌa, conda e gente tuaꞌ e Israel qꞌuijnobꞌ tamar ucanseyaj e Cristo, ¿cucremobꞌ ca inyajrer? Pues ma cocha erer. Porque conda e gente xeꞌ tuobꞌ e Israel machi ucꞌupsiobꞌ e Dios entonces quetpa que e gente xeꞌ majax tuobꞌ e Israel jax tin e tuaꞌ uchꞌamiobꞌ e corpesiaj. Pero tamar era tin e tuobꞌ Israel, conda uwirobꞌ que tin e majax tuobꞌ e Israel war acorpobꞌ, axin ubꞌijnuobꞌ que jaxirobꞌ cꞌani uchꞌamiobꞌ e corpesiaj era ubꞌan. 12 Pues umen que e gente xeꞌ tuobꞌ e Israel uchiobꞌ e mabꞌambꞌanir e gente tara tor e rum cꞌotoy uchꞌamiobꞌ e corpesiaj tuaꞌ e Dios. Entonces jay umabꞌambꞌanirobꞌ e gente xeꞌ tuobꞌ e Israel era cꞌampa tuaꞌ ataresna e corpesiaj tut tin e majax tuobꞌ e Israel, entonces conda acꞌotoy e hora conda e gente xeꞌ tuobꞌ e Israel acꞌotoy uchꞌamiobꞌ e corpesiaj cꞌani achecta inteꞌ nuxi chojbꞌesiaj xeꞌ más nojta tut tunor e gente tara tor e rum.

13 Pues ayan lo que cꞌani inwareox nox xeꞌ majax tuox e Israel. Y cocha e Dios uyebꞌta tarien tuaꞌ inchecsu uyojroner e Dios tut tin e majax tuobꞌ e Israel, war intzay inche tunor e nuxi patnar era. 14 Pero jay umen que nox cay corpesnox conda iyubꞌi lo que cay inchecsu tiut ayan tin e tuobꞌ e Israel xeꞌ axin atzꞌuniobꞌ tamar e chojbꞌesiaj lo que war ichꞌami nox, bꞌajcꞌat ayan tin e axin uyusre uchꞌamiobꞌ e corpesiaj era ubꞌan. 15 Porque jay umen que cꞌotoy xejbꞌna utobꞌ tunor e gente xeꞌ tuobꞌ e Israel, checta tari e corpesiaj tuaꞌ e inmojr gente tara tor e rum, entonces war che era que cꞌani achecta watar inteꞌ nuxi tzayer más nojta tama e hora conda achꞌajmobꞌ e gente xeꞌ tuobꞌ e Israel era otronyajr. Y lo que cꞌani achecta watar tama e hora yajaꞌ jax era: Que tin e chamen cꞌani asujta abꞌixqꞌuesna tujam e chamenobꞌ.

16 Pues conda aloqꞌuesna imbꞌijc tama e cꞌum tuaꞌ aꞌjcꞌuna e Dios, war che era que tunor lo que alocꞌoy tama e cꞌum era tuaꞌ e Dios ubꞌan. Y jay uwir inteꞌ teꞌ aꞌjcꞌuna e Dios, entonces tunor ucꞌabꞌ e teꞌ era tuaꞌ e Dios ubꞌan. 17 Pues ayan tin e tuobꞌ e Israel xeꞌ larobꞌ cocha cora ucꞌabꞌ teꞌ xeꞌ ucꞌabꞌa olivo xeꞌ quetpa jecchubꞌir, y nox xeꞌ majax tuoxꞌ e Israel larox cocha cora ucꞌabꞌ teꞌ olivo pero xeꞌ ajcꞌopot. Entonces conda cꞌotoy ichꞌami ucꞌabꞌa Cawinquirar Jesucristo tzꞌacbꞌirox tama uwir e teꞌ olivo era. Y tamar era nox interox coner tacar uwir e olivo era y war ichꞌami ucuxtar e olivo era ubꞌan. 18 Pero ma erer ibꞌijnu que nox más ayan icꞌampibꞌir que e gente xeꞌ tuobꞌ e Israel. Porque jay ibꞌijnu que más ayan icꞌampibꞌir cocha era entonces war inajpes que majax nox xeꞌ war iwajcꞌu ucuxtar uwir e teꞌ, sino que jax uwir e teꞌ era xeꞌ war uyajcꞌox e cuxtar.

19 Pues bꞌajcꞌat iꞌxin aware cocha era: “Bꞌan pue, pero ucꞌabꞌ e teꞌ era quetpa jecchubꞌir tuaꞌ uyubꞌi insajca nen tama e teꞌ olivo era.” 20 Bꞌan yaꞌ. Pero jecchuna ucꞌabꞌ e teꞌ era umen que matucꞌa ucꞌupesiaj, y net tzꞌacbꞌiret tama uwir e teꞌ umen taca que net ayan acꞌupesiaj tama e Jesucristo. Y tamar era ira atattzꞌi abꞌa que net más nojtet que ucꞌabꞌ e teꞌ era xeꞌ jecchubꞌir sino que awiric abꞌa tuaꞌ machi iloqꞌuesna tama uwir e teꞌ era ubꞌan. 21 Porque jay Cadiosir machi uyacta bꞌan taca ucꞌabꞌ e teꞌ xeꞌ tuach ani e olivo, machix tuaꞌ uyactet ubꞌan jay machi ache abꞌa imbꞌutz era. 22 Bꞌijnun que nojta ucꞌunersiaj e Dios, pero nojta uqꞌuijnar e Dios ubꞌan. Pues jaxir qꞌuijna taca tin e cucremobꞌ, pero toit net incꞌun uwirnar. Pero net ucꞌani tuaꞌ iquetpa tama ucꞌunersiaj, porque jay machi, net ubꞌan tuaꞌ iloqꞌuesna. 23 Pero e gente tuaꞌ e Israel jay asutpa acꞌupseyanobꞌ tama e Dios otronyajr, entonces axin atzꞌajcobꞌ otronyajr ubꞌan. Pues e Dios ayan ucꞌotorer tuaꞌ asutpa utzꞌaquiobꞌ otronyajr. 24 Porque net xeꞌ majax tuet e Israel bꞌanet cocha inteꞌ ucꞌabꞌ teꞌ xeꞌ ajcꞌopot olivo, pero tzꞌacbꞌiret tama inteꞌ teꞌ olivo xeꞌ bueno xeꞌ majax bꞌan cocha ucꞌani ani tuaꞌ achena. Pero e gente tuaꞌ e Israel xeꞌ bꞌan cocha ucꞌabꞌ e teꞌ xeꞌ tuach e olivo xeꞌ bueno erer ixto atzꞌajcobꞌ otronyajr tama uterarobꞌ era.

25 Pues entonces niwermanuox, ayan lo que cꞌani inwareox era tuaꞌ inata tamar ubꞌijnusiaj e Dios xeꞌ mucur ani ticoit tamar e gente xeꞌ tuobꞌ e Israel era. Y cꞌani inwareox tunor era tuaꞌ machi ibꞌijnu que tunor war inata. Y e bꞌijnusiaj jax era: Que qꞌuecꞌojsena uyalmobꞌ e gente tuaꞌ e Israel tuaꞌ machi acꞌupseyanobꞌ tama e Jesucristo, pero machi tuaꞌ aquetpobꞌ bꞌan taca, sino que watar e día conda cꞌani acꞌotoy acꞌupseyanobꞌ tama e Jesucristo. Pero machi tuaꞌ anumuy tunor era este que acꞌapa acꞌupseyanobꞌ e gente xeꞌ sicbꞌabꞌirobꞌ umen e Dios xeꞌ majax tuobꞌ e Israel. 26 Y tamar era conda achecta watar e día era tunor e gente xeꞌ tuobꞌ e Israel cꞌani acorpesnobꞌ. Bꞌan cocha chꞌar tzꞌijbꞌabꞌir tama uyojroner e Dios:

28 Pues coner war cawira que e gente tuaꞌ e Israel war uxejbꞌiobꞌ ut e ojroner tama e corpesiaj, y tamar era war uxejbꞌiobꞌ ut e Dios ubꞌan. Pero umen que bꞌan uchiobꞌ nox ajcꞌunox e lugar tuaꞌ ichꞌami e corpesiaj coner. Pero Cadiosir warto uyajta utobꞌ e gente era xeꞌ tuobꞌ e Israel porque sicbꞌabꞌirobꞌ utata viejobꞌirobꞌ tama e onian tiempo. 29 Porque Cadiosir ma tiaꞌ asutpa ulocse lo que ajcꞌubꞌir umener. Y tamar era conda e Dios axin uchojbꞌes ut inteꞌ winic, machi ixto tuaꞌ asutpa ulocse. Y conda e Dios axin usicbꞌa inteꞌ winic tuaꞌ aquetpa tuaꞌ, jaxir machi tuaꞌ asutpa uyare e winic era que mixto jax tuaꞌ coner. 30 Bꞌan cocha turox ani xeꞌ majax tuox e Israel tama e tiempo xeꞌ numuy, machi cꞌupseyanox tut e Dios. Pero umen que e gente tuaꞌ e Israel uyactobꞌ tuaꞌ acꞌupseyanobꞌ tut e Dios, entonces e Dios sutpa y cay uchecsu ucꞌunersiaj tiut nox. 31 Y bꞌan ubꞌan tama e gente tuaꞌ e Israel. Coner machi war acꞌupseyanobꞌ tut e Dios, pero watar e día conda cꞌani achecta watar ucꞌunersiaj e Dios tamarobꞌ otronyajr, bꞌan cocha nox xeꞌ war ichꞌami ucꞌunersiaj e Dios coner. 32 Porque e Dios cꞌapa uche tuaꞌ caquetpa yebꞌar ucꞌotorer e mabꞌambꞌanir tunoron xeꞌ turon tara tor e rum y bꞌan uche tuaꞌ uyubꞌi uchectes ucꞌunersiaj ticoit tunoron xeꞌ turon tara tor e rum ubꞌan.

33 Pues ubꞌijnusiaj e Dios intam, y bꞌan unatanyaj ubꞌan, y jaxir tunor war unata. Pues ma cocha erer canata tunor ubꞌijnusiaj e Dios, y ma cocha erer cacꞌotoy canata lo que war uche Cadiosir ubꞌan. 34 Bꞌan cocha chꞌar tzꞌijbꞌabꞌir tama uyojroner e Dios: “¿Chi war unata lo que war che tunor ubꞌijnusiaj Cawinquirar? ¿Y chi umen cansena e Dios? 35 ¿Y chi war uyajcꞌu Cawinquirar bꞌajxan tuaꞌ asutpa aꞌjcꞌuna uyeror umener otronyajr?” Bꞌan chꞌar tzꞌijbꞌabꞌir tama uyojroner e Dios. 36 Porque tunor lo que ayan tari tuaꞌ e Dios, y tunor lo que ayan chena umen e Dios, y tunor lo que ayan quetpa tuaꞌ acꞌampesna umener ubꞌan. Catattzꞌic ucꞌabꞌa Cadiosir iraj iraj. Amén.