1 Pues entonces tama inteꞌ día cay ojron e Noemí taca e Rut y che:

—Ijchꞌoc, nen ucꞌani tuaꞌ insicbꞌa inteꞌ aviejo xeꞌ uyubꞌi ucojcuet. 2 Y e Booz xeꞌ ajyum rum tiaꞌ cay patnet taca e ijchꞌoctac familia tacaron. Pues coner acbꞌar jaxir cꞌani axin tama e lugar tiaꞌ tuaꞌ uwajri alocꞌoy ut ucebada tama usojqꞌuir. 3 Entonces cꞌani inwaret lo que ucꞌani tuaꞌ ache. Atien y yara e perfume y lapa abꞌujc xeꞌ más galan y quiqui esto tiaꞌ war apatna e Booz. Pero ira awacta unata e Booz que turet este que acꞌapa aweꞌ y este que acꞌapa uyuchꞌi uvino. 4 Y conda axin achꞌan tuaꞌ awayan chꞌujcun awira tiaꞌ aquetpa. Entonces conda war awayan quiqui locsen ubꞌojchꞌibꞌir unuc uyoc y chꞌanen yajaꞌ ubꞌan* Pues tama e onian tiempo ayan meyra costumbre tama e lugar Israel xeꞌ intiach que cacostumbre non. Pues e Rut ixin tuaꞌ achꞌan tama utajn uyoc e Booz tuaꞌ uchecsu ubꞌa que turix tuaꞌ anujbꞌi tacar jay bꞌan ucꞌani e Booz. Pero e Rut machi uche e mabꞌambꞌanir conda uche cocha era.. Y de allí jaxir tuaꞌ uyaret lo que ucꞌani tuaꞌ ache otronyajr, che e Noemí.

5 Y che e Rut:

—Cꞌani inche tunor lo que awaren, che e Rut.

6 Entonces ixin e Rut esto tama e lugar xeꞌ arobꞌna umen upixam y uche tunor lo que arobꞌna umener. 7 Y conda e Booz cꞌapa weꞌ y cꞌapa uyuchꞌi uvino war atzay. Entonces ixin chꞌan tuaꞌ awayan tuyejtzꞌer tiaꞌ morojsempa tunor e sian ut cebada. Y nacpat era yopa e Rut tzꞌustaca y ulocse e bꞌojchꞌibꞌ tama unuc uyoc e Booz y chꞌan yajaꞌ† Iranic e checsuyaj lo que ayan tama e Rut 3:4 tuaꞌ inata más tama e costumbre era.. 8 Pero tama uyuxin e acbꞌar bꞌixcꞌa e Booz, y conda sutrema uwira que ayan inteꞌ ixic chꞌar tut utajn uyoc, bꞌacta.

9 Y che e Booz:

—¿Chiet net, pue? che e Booz. Y e Rut che:

—Jax nen e Rut xeꞌ amanen. Net familiaret taca nipixam winic ani y tamar era jax net xeꞌ ucꞌani ani tuaꞌ acojcon. Entonces jayaꞌ abꞌojchꞌibꞌ tamaren tuaꞌ achecsu abꞌa que cꞌani inujbꞌi tacaren, che e Rut.

10 Entonces ojron e Booz y che:

—Que Cawinquirar Dios uchojbꞌesiquet, ijchꞌoc. Coner war achectes abꞌa que turix tuaꞌ inujbꞌi tacaren y que war ayajta ut apixam coner motor más que conda chamay aviejo. Pues erer ani asajca inteꞌ xeꞌ más chꞌom sitz que nen tuaꞌ inujbꞌi tacar, motor que jax inteꞌ xeꞌ matucꞌa utumin o inteꞌ xeꞌ ayan meyra utumin, pero majax bꞌan war ache. 11 Pero ira ibꞌacta, ixic, porque cꞌani inche tunor lo que war acꞌajti tacaren era. Pues tunor e gente tama cachinam war unatobꞌ que net erachet y tamar era mamajchi tuaꞌ ubꞌijnuobꞌ que majax bueno tuaꞌ innujbꞌi tacaret xeꞌ ajnajtir gentiet. 12 Pues erach que nen familiaren tacaret, y tamar era nen ucꞌani ani tuaꞌ incojcuet. Pero ucꞌani tuaꞌ anata que ayan otronteꞌ que más familia tacaret que nen. 13 Quetpen tara tama tunor e acbꞌar. Ejcꞌar jay e familia era cꞌani umani e rum xeꞌ tuaꞌ ani e Elimelec xeꞌ chamay y anujbꞌi tacaret, erer uche. Pero jay jaxir machi ucꞌani, entonces cꞌani inwaret tut Catata Dios que nen turix tuaꞌ inche. Pero coner era waynen tara este que asacojpa, che e Booz.

14 Entonces e Rut quetpa wayan tama tunor e acbꞌar tut utajn uyoc e Booz. Entonces conda ne mato asacojpa tama inteꞌ día e Rut achpa, porque arobꞌna umen e Booz que mamajchi tuaꞌ unata que yopa inteꞌ ixic tama e lugar era.

15 Entonces achpa e Booz ubꞌan y che:

—Tares ujojbꞌibꞌ ajor y apasi y aquete taniut. Cꞌani imbꞌutꞌi taca e cebada, che e Booz. Y tamar era e Booz uyari chateꞌ arroba cebada tamar, y de allí utacre e Rut tuaꞌ utꞌabꞌse uturbꞌa tor uquejrebꞌ tuaꞌ ucuchi axin. Y de allí e Booz locꞌoy tama uchor y sutpa ixin esto tama e chinam ubꞌan.

16 Entonces e Rut sutpa ixin esto tiaꞌ turu upixam. Y conda cꞌotoy, e Noemí uyubꞌi tuaꞌ y che:

—¿Cocha locꞌoy tunor taca e Booz? che e Noemí.

Entonces e Rut uyare upixam tunor lo que uche e Booz tuaꞌ utacre. 17 Y de allí ojron e Rut otronyajr y che:

—Y uyajqꞌuen tunor e cebada era y uyaren que ma cocha erer tuaꞌ insutpa inyopa tut nipixam bꞌan taca, che e Rut.

18 Entonces ojron e Noemí y che:

—Pues coner ucꞌani tuaꞌ taca cacojco tuaꞌ cawira tucꞌa tuaꞌ achecta watar otronyajr. Machi tuaꞌ ajiri e Booz este que aquetpa chequer cocha tuaꞌ alocꞌoy tunor era. Pues conda merato acꞌapa e día cꞌani oꞌstampa tunor era, che e Noemí.