1 Mürin ekoch fansoun Nahas ewe kingen chon Amon a mäla, nge Hanun nöün we mwän a siwili lon wisan wisen king. 2 Iwe, Tafit a üra, “Üpwe kirikiröch ngeni Hanun, pun Nahas saman we a kirikiröch ngeniei.” Iei mine Tafit a tinala chon künö, pwe repwe aururu Hanun pokiten än saman mäla. Iwe, lupwen nöün Tafit kewe chon angang ra feila ren Hanun lon fanüen chon Amon, pwe repwe aururu i, 3 ekewe samolun chon Amon ra üreni Hanun, “Ifa usun, ka ekieki pwe Tafit a tinato chon aururuk pokiten an mochen asamolu semom? Ifa usun, nöün chon angang resap feito pwe repwe ouwasacha o operi ewe fanü, pwe repwe ataela?” 4 Iei mine Hanun a turufi nöün Tafit kewe chon angang, a räisöüla alüser o pöküela üfer me lukalapen won wilar. Mürin a tinirela. 5 Iwe, ra feila. Nge lupwen ra asile ngeni Tafit pworausen ekewe mwän, a tinala chon künö pwe repwe uwala an pworaus ngeniir, pun ekewe mwän ra fokun säw. Iei alon ewe king, “Oupwe chök nonom lon Jeriko tori alüsemi epwe pwüksefäl. Mürin oupwap liwinto.” 6 Iwe, lupwen Hanun me ekewe chon Amon ra mefi pwe Tafit a oput ir, ra tinala chon künö fän ina epwe ükükün faik ton silifer, pwe repwe möni woken me chon wawa oris seni Mesopotamia, Aram-maka me Sopa. 7 Iwe, ra möni ilik me ruungeröü woken, pwal ewe king seni Maka me an mwichen sounfiu. Ra feito o nonom mwen Metepa. Pwal ekewe chon Amon ra kö seni ar kewe telinimw, pwe repwe feila maun. 8 Nge lupwen Tafit a rong ei pworaus, a tinala Joap me ewe mwichen sounfiu meinisin. 9 Iwe, ekewe chon Amon ra feito o tettelila mwen asamalapen tittin ar we telinimw Rapa, nge ekewe king mi feito pwe repwe alisiir ra imwüla o atetteliir lon ewe fanü mi amassawa.

10 Nge lupwen Joap a küna pwe ekewe sounfiu ra sousou me mwan me lükisökürün, a fili ekoch mwän mi fokun pwora me lon Israel o atetteliir, pwe repwe maun ngeni ekewe sounfiun Siria. 11 Nge ekewe lusun nöün sounfiu a atolongeer fän nemenien Apisai pwin we. Iwe, Apisai a atetteliir, pwe repwe maun ngeni ekewe sounfiun Amon. 12 Joap a üreni Apisai, “Are ekewe chon Siria ra kon pöchökül ngeniei, ina otun kopwe alisiei. Nge are ekewe chon Amon ra kon pöchökül ngonuk, ina otun üpwe feila o alisuk. 13 Kopwe tipepwora. Sipwe tipen mwän fän iten nöüch aramas, pwal fän iten ekewe telinimwen ach we Kot. Nge ewe Samol mi Lapalap epwe föri mine a öch me ren.” 14 Mürin, Joap me nöün kewe sounfiu ra kaneto o maun ngeni ekewe sounfiun Siria. Iwe, ekewe sounfiun Siria ra sü me mwan. 15 Nge lupwen ekewe sounfiun Amon ra küna pwe ekewe sounfiun Siria ra sü, pwal ir ra sü me mwen Apisai pwin Joap we o sülong lon ewe telinimw. Mürin, Joap a liwiniti Jerusalem.

16 Nge lupwen ekewe sounfiun Siria ra küna pwe ra kuf ren ekewe sounfiun Israel, ra tinala chon künö, pwe repwe emwenato ekewe re Siria mi nom ötiuen ewe chanpupu Oifrat, nge Sopak ewe meilapen nöün Hatateser mwichen sounfiu a emweniir. 17 Lupwen ei pworaus a tori Tafit, a achufengeni ekewe sounfiun Israel meinisin, a feila pekilan ewe chanpupu Jortan o apälüeer. Iwe, lupwen Tafit a atetteli nöün kewe sounfiu, pwe repwe maun ngeni ekewe sounfiun Siria, ekewe sounfiun Siria ra maun ngeni. 18 Nge ekewe sounfiun Siria ra sü me mwen ekewe sounfiun Israel. Iwe, Tafit me nöün kewe sounfiu ra niela seni ekewe re Siria füngeröü chon wawa woken me faik ngeröü sounfiu mi fetal, ra pwal niela Sopak ewe meilapen ar mwichen sounfiu. 19 Iwe, lupwen ekewe king mi nom fän nemenien Hatateser ra küna pwe ra kuf ren ekewe re Israel, ra föri kinamwe ngeni Tafit o atolongeer fän nemenian. Iei mine ekewe re Siria resap chüen mochen alisi ekewe chon Amon.