1 Iwe, eu ier mürin lon fansoun leräs, lupwen ekewe king ra feila maun, Joap a emwenawu ewe mwichen sounfiu o atai fanüen chon Amon. Nge Tafit a nonometiu Jerusalem. Iwe, Joap a pwelifeili ewe telinimw Rapa fän pisekin maun, a liapeni o ataela. ✡ 2.Sam 11.1 2 Tafit a angei mwärin ar we king seni won möküran, ükükün choun fik me limu paun kolt, a pwal wor eföü fau aüchea won. Iwe, Tafit a isetä ewe mwärämwär won möküran, a pwal uwala chomong liapan seni ewe telinimw. 3 Tafit a pwal uwala ekewe aramas mi nom lon ewe telinimw o aangangeer fän ngerenger, fän turupas me kouk seni mächä. Iei usun Tafit a föri ngeni chon ekewe telinimwen Amon meinisin. Mürin, Tafit me nöün kewe sounfiu meinisin ra liwiniti Jerusalem.

4 Mürin ekoch fansoun a fis maun ngeni ekewe chon Filistia me lon Keser. Iwe, Sipekai seni Husa a niela Sipai, eman me lein mwirimwirin ekewe mwänemong, pwal ekewe chon Filistia ra kuf. 5 Mürin, a pwal fissefäl maun ngeni ekewe chon Filistia. Nge Elhanan nöün Jair we mwän a niela Lami pwin Koliat ewe re Kat. Ätei a wokuni efoch siles ilon a nönnö ngeni öüwün efoch waseres. ✡ 1.Sam 17.4-7 6 A pwal fissefäl maun me lon Kat, ia a nom ie eman mwän mi fokun tam. A wor wonofch aütün pöün me ruofoch, pwal wonofoch aütün pechen me ruofoch, pwe a wor ükükün rüe me fofoch aütün. Ätei pwal eman mwirimwirin ekewe mwänemong. 7 Lupwen ätei a turunufasei chon Israel, Jonatan nöün Simea we mwän a niela, nge Simea pwin Tafit. 8 Ikkei ir mwirimwirin ekewe mwänemong lon Kat, ra ninnila ren Tafit me nöün kewe sounfiu.