1 Lupwen Salomon a wes le aüetä imwen ewe Samol mi Lapalap me püsin imwan, pwal meinisin mine a mochen aüetä, 2 ewe Samol mi Lapalap a pwä ngeni Salomon fän aruuan, usun a fen pwä ngeni me lon Kipeon. ✡ 1.King 3.5; 2.Kron 1.7 3 Iwe, ewe Samol mi Lapalap a üreni, “Üa aüselinga om iotek me om tüngor ka eäni ngeniei. Üa apini ei imwenfel ka aüetä pwe epwe eu leni üpwe imweimw lon tori feilfeilachök. Üpwe mamasa ei leni o tümwünü fansoun meinisin. 4 Nge en, are kopwe angang ngeniei fän wenechar me limöchün lelukom usun Tafit semom we a föri, are kopwe aleasochisi meinisin mine üa allük ngonuk o apwönüetä ai kewe allük me pwüüng, 5 mürin üpwe anüküchara mwum lon Israel tori feilfeilachök, usun üa fen pwon ngeni Tafit semelapom we ren ai apasa, ‘Epwe fokun wor eman mwirimwirum iteiten fansoun, epwe wiseni ewe wisen king me lon Israel.’ ✡ 1.King 2.4 6 Nge are ämi me mwirimwirum kana oupwe kul seniei, are oua aleasolap ngeni ai kewe allük me pwüüng üa ngenikemi, are oupwe angang ngeni pwal ekoch kot o fel ngeniir, 7 mürin üpwe ärawu chon Israel seni lon ewe fanü üa ngeniir. Iwe, ei imwenfel üa apini fän itei üpwe aturawu me fän mesei, nge aramas repwe leaweni chon Israel ren kapsen ämängau me kapasen turunufas me lein chon ekewe mwü meinisin. 8 Iwe, ei imwenfel epwe wiliti eu ioien fau, nge meinisin mi pwereto lükün repwe mairü ren o turunufasei, repwe pwal ais, ‘Pwota ewe Samol mi Lapalap a föri ei sokun föför ngeni ei fanü me ei imwenfel.’ ✡ 2.King 25.9; 2.Kron 36.19 9 Iwe, aramas repwe pälüeni, ‘Pokiten ra likitala ewe Samol mi Lapalap ar we Kot mi emwenawu ar kewe lewo seni ewe fanü Isip. Ra pwal angei ekoch kot, ra fel ngeniir o angang ngeniir. Iei mine ewe Samol mi Lapalap a awarato wor ekei feiengau meinisin.’ ”

10 Iwe, lon ükükün rüe ier Salomon a aüetä imwen ewe Samol mi Lapalap me püsin imwan. 11 Hairam ewe kingen Tirus a ngeni Salomon irä setar me irä saipires me kolt ükükün an mochen. Iwe, amwüchülan ei angang king Salomon a ngeni Hairam rüe telinimw me lon ewe fanü Kalili. 12 Nge lupwen Hairam a feito seni Tirus pwe epwe katol ekewe telinimw Salomon a ngeni, Hairam esap saniir. 13 Iei mine a üreni Salomon, “Pwii, met sokun telinimw kei ka ngeniei.” Iei mine ra aita ngeni ewe fanü Kapul * wewen Kapul esor lomotan tori ikenai. 14 Nge Hairam a fen tinala ren ewe king ina epwe ükükün rüanü esop ton kolt.

15 Iwe, ewe king Salomon a nöünöü chon angangen kinroosi, lupwen a aüetä imwen ewe Samol mi Lapalap me püsin imwan, pwal lupwen a amasoua ewe leni peliötiuen ewe telinimw o aüetä tittin Jerusalem. A pwal nöüniir le aüsefälietä ekewe telinimw Hasor, Mekito me Keser. 16 (Iwe, Farao ewe kingen Isip a feila o liapeni ewe telinimw Keser. A kenala ewe telinimw o niela ekewe chon Kanaan mi imweimw lon. Mürin a lifang ngeni nöün we föpwül ewe telinimw, lupwen a pwülüeni Salomon. 17 Iei mine Salomon a aüsefälietä Keser). Salomon a pwal nöüni ekewe chon angangen kinroosi le aüetä Pethoron-fan, 18 Palat me Tamar mi nom lon ewe fanüapön Juta, 19 ekewe telinimw meinisin ia a nom ie an lenien iseis pisek me ekewe telinimw fän iten waan woken me nöün oris. Iwe, Salomon a pwal aüetä meinisin mine a chök mochen me lon Jerusalem, lon Lepanon pwal lon unusen ewe fanü a nemeni. 20 Iwe, Salomon a nöüni chon angang ekewe aramas mi chüen manau seni ekewe chon Amor, chon Hit, chon Peris, chon Hiw me ekewe chon Jepus. Ir sap aramasen Israel, 21 nge mwirimwirin chokewe mi chüen manau lon ewe fanü ekewe aramasen Israel resap tongeni aroserela. Ikkei ir chokewe Salomon a nöüniir amanau. Iei usun a chüen fis tori ikenai. 22 Nge Salomon esap nöüni amanau ekewe aramasen Israel. Ir ra wisen sounfiu, ra nöüwisen mwü, ra meilap, ra souemwen me chon nemeni chon wawa waan woken, ra pwal chon wawa oris.

23 Iwe, mi wor ükükün limepükü lime meilap mi wisen nemeni ekewe aramas mi föri än ewe king Salomon angangen kaü imw.

24 Nge nöün Farao fefin pwülüen Salomon a feitä seni ewe telinimwen Tafit o feila ngeni püsin imwan Salomon a aüetä fän itan. Mürin, Salomon a amasoua ewe leni peliötiuen ewe telinimw.

25 Iwe, fän ülüngat iteiten ier Salomon a sou eäni asoren kek me asoren kinamwe won ewe rongen asor a senätä fän iten ewe Samol mi Lapalap. A pwal eäni asor apach mi pwokus ngeni ewe Samol mi Lapalap. Iei usun a awesöchüela angangen ewe imwenfel. ✡ Eks 23.17; 34.23; Tut 16.16

26 Ewe king Salomon a pwal falei eu pöisein sip me lon Esion-keper mi arap ngeni Elat arosetin ewe Setipar lon ewe fanü Etom. 27 Nge ewe king Hairam a tinala nöün kewe sälo mi repi lematau won ei pöisei, pwe repwe angangfengen me nöün Salomon kewe chon angang. 28 Iwe, ra saila Ofair o uwato ren ewe king Salomon ina epwe ükükün engol me wonu ton kolt.