1 Iwe, ewe Samol mi Lapalap a üreni Moses, “Kopwe falei rüepek fau mi chöpöp usun chök ekewe me mwan. Iwe, üpwe ruputi wor ekewe kapas mi mak won ekewe fau mi chöpöp ka amökküür me mwan. 2 Kopwe amoloketä lesosorun lesor, pwe kopwe feitä won ewe chuk Sinai. Kopwe churiei ikenan won ungen ewe chuk. 3 Esap wor eman epwe etuketä, esap pwal wor eman aramas epwe nomofetal won ewe chuk. Pwal ekewe pwiin sip me kow resap tongeni mongöfetal fäsonun ewe chuk.” 4 Iei mine Moses a falei rüepek fau mi chöpöp usun chök ekewe me mwan. Iwe, a pwätä lesosorusich o feitä won ewe chuk Sinai, usun ewe Samol mi Lapalap a allük ngeni. Nge a uwei lepöün ekewe rüepek fau mi chöpöp. 5 Mürin, ewe Samol mi Lapalap a feitiu lon eu kuchu, a ütä ren Moses ikenan o kökköri itan we Samol mi Lapalap. 6 Iwe, ewe Samol mi Lapalap a lü seni Moses o kökkö, “Ngang ewe Samol mi Lapalap, ngang ewe Samol mi Lapalap, ngang eman Kot mi eäni ümöümöch me kirikiröch, üa songomang, üa pwal wöün tong me allükülük. 7 Üa eäni tong ngeni ngeröü o amusala föföringau me pupungau me tipis. Nge üsap amusafatei chon tipis, pwe üa liwini än samasam tipis won nöür me nöün nöür tori aülüngatin me arüanün tettelin aramas.” ✡ Eks 20.5-6; Num 14.18; Tut 5.9-10; 7.9-10 8 Iwe, Moses a müttir chapetiu lepwül o fel ngeni. 9 A apasa, “Ai Samol, are üa wesewesen küna ümöümöch me reöm, üa tüngor ngonuk pwe kopwe etikem. Mi pwüng pwe ir aramas mi ülöförea me tipepöchökül, nge kopwe amusala äm föföringau me äm tipis o atolongakem lon tettelin noum.”

10 Mürin, Kot a üreni Moses, “Iei üpwe föri eu pwon lefilei me ekewe chon Israel. Üpwe föri manaman me fän mesen ekei aramas meinisin, sokun manaman resamwo fis won unusen fanüfan ika lon eu mwü. Iwe, ekewe aramas meinisin ka nom leir repwe küna ekewe föför mi eniwokus ngang ewe Samol mi Lapalap üpwe föri fän itom.

11 Oupwe aleasochisi mine üa allük ngenikemi ikenai. Üpwe asüela seni me mwemi ekewe chon Amor, chon Kanaan, chon Hit, chon Peris, chon Hiw me chon Jepus. 12 Iwe, oupwe afälikemi pwe ousap föri eu pwon ngeni chon ewe fanü ia oupwe feila ie, pwe resap wiliti eu lenien likatup ngenikemi. 13 Nge oupwe amökkätiu ar kewe rongen asor, oupwe atatakisi ar kewe ürefau mi pin o pöküetiu ar kewe uluulun ewe anüfefin Asera. ✡ Tut 16.21 14 Ousap fel ngeni pwal eman kot, pun ngang ewe Samol mi Lapalap itei lukomong, ngang eman Kot mi lukomong won aramasei. 15 Iwe, ousap föri eu pwonen atipeeu ngeni chon ewe fanü, pun ar fel me asor ngeni ar kewe kot a usun chök angangen lisowu me rei. Repwe körikemi, nge ämi oupwe etiir le mongö seni ar kewe asor ra asomä ngeniir. 16 Nge are oua apwüpwülüa nöümi mwän ngeni nöür föpwül mi fel ngeni ar kewe kot, ir repwe atupu nöümi mwän pwe repwe pwal föri iei usun.

17 Ousap föri uluulun kot seni mächä fän itemi. ✡ Eks 20.4; Lif 19.4; Tut 5.8; 27.15

18 Iwe, oupwe föri ewe chulapen mongö pilawa esap wor iis lon. Lon ükükün fisu rän oupwe mongö pilawa esap wor iis lon, usun üa fen allük ngenikemi. Oupwe föri ei lon ewe fansoun üa filätä, lon ewe maram Apip, pun lon ewe maram oua towu seni Isip. ✡ Eks 12.14-20; Lif 23.6-8; Num 28.16-25 19 Iwe, ekewe mwänichi meinisin nei, pwal ekewe ätemwänin mweinöün man seni ekewe pwiin kow me sip nei. ✡ Eks 13.2 20 Nge eman mweinöün aas epwe akasiwil ngeni eman nienifön sip. Iwe, ika kosap mochen akasiwili, kopwe kupi üen ewe aas. Nöümi mwänichi meinisin oupwe möni. Esap wor eman epwe feito rei fän an asöülapö. ✡ Eks 13.13

21 Iwe, wonu rän oupwe föri ämi angang, nge lon ewe afisuen rän oupwe asösö. Pwal lupwen fansoun tuw pwül me fansoun kinikin oupwe asösö. ✡ Eks 20.9-10; 23.12; 31.15; 35.2; Lif 23.3; Tut 5.13-14 22 Iwe, oupwe föri ewe chulapen wiik, ewe fansoun kinikin mwen uän irän wiich, pwal ewe chulapen ionalong uän fanüemi leamüchülan eu ier. ✡ Lif 23.15-21; Num 28.26-31; Lif 23.39-43 23 Fän ülüngat lon eu ier nöümi mwän meinisin repwe feito o fel ngeniei ngang Kot ewe Samol mi Lapalap, ewe Koten Israel. 24 Pun üpwe asüela chon ekewe mwü seni mwemi o awatteloi kiännin fanüemi. Nge esap wor eman epwe mocheniaiti fanüemi, lupwen oupwe feila fän ülüngat lon eu ier, pwe oupwe fel ngeniei ngang ewe Samol mi Lapalap ämi we Kot.

25 Iwe, ousap eäni asor ngeniei chan ewe mönün asor fiti pilawa mi wor iis lon, ousap pwal iseis och seni ewe mönün asoren Pasofer tori lesosor. ✡ Eks 12.10 26 Oupwe uwato öchün mwen uän fanüemi lon imwei ngang ewe Samol mi Lapalap ämi we Kot. Ousap kuku eman apanen kuuch lon chönün oupun ewe inelap.” ✡ Tut 26.2; Tut 14.21

27 Mürin, ewe Samol mi Lapalap a üreni Moses, “Kopwe makei ekei kapas, pun ai pwon ngonuk me ekewe chon Israel a nom lon ekei kapas.” 28 Iwe, Moses a nom ren ewe Samol mi Lapalap lon ükükün faik rän me faik pwin. Esap mongö, esap pwal ünümi koluk. Iwe, Kot a ruputi won ekewe fau mi chöpöp kapasen ewe pwon, ekewe engol allük.

29 Iwe, Moses a feitiu seni won ewe chuk Sinai o amwöchü lepöün ekewe rüepek fau mi chöpöp ia a mak ie ekewe engol allük. Nge lupwen a feitiu, Moses esap silei pwe won mesan a saramaram pokiten an kapasfengen me Kot. 30 Iwe, lupwen Aaron me ekewe aramasen Israel meinisin ra küna Moses pwe won mesan a saramaram, ra niuokus ar repwe kan ngeni. 31 Nge Moses a kökköriir. Iwe, Aaron me ekewe souemwenin ewe mwichen chon Israel ra liwinsefälito ren, nge Moses a fos ngeniir. 32 Mürin, ekewe aramasen Israel meinisin ra kanoto ren. Iwe, Moses a aiti ngeniir ekewe allük meinisin ewe Samol mi Lapalap a fen ngeni me won ewe chuk Sinai. 33 Iwe, lupwen Moses a wes me kapas ngeniir, a pwölüela won mesan ngeni echö mangaku. 34 Nge iteiten fansoun än Moses tolong lon ewe imw mangaku ren ewe Samol mi Lapalap pwe epwe kapas ngeni, a särifala ewe pwölüpwöl me won mesan tori a pwal towusefäl. Iwe, lupwen a towu, a apworausa ngeni ekewe aramasen Israel mine Kot a allük ngeni. 35 Ekewe aramasen Israel ra küna won mesen Moses pwe a saramaram. Mürin, Moses a pwal pwölüsefäliela won mesan tori a tösefälilong lon ewe imw mangaku, pwe epwe kapas ngeni Kot. ✡ 2.Kor 3.7-16