1 Iö a wewe ngeni eman mwän mi mirit, nge iö a tongeni awewei mettoch? Mirit a asarama won mesen eman aramas o siwili wowongauen won mesan.

2 Kopwe apwönüetä än ewe king allük, pun iei usun ka pwon fän akapel fän mesen Kot. 3 Kosap müttir feila seni fän mesan, kosap pwal peni och föför mi ngau. Pun ewe king epwe chök föri mine a mochen. 4 Iwe, än ewe king kapas a man. Iö a tongeni apwüngü an föför? 5 Eman a aleasochisi an allük esap küna riaföü, nge eman mi mirit epwe silei inet fansoun an epwe föri och, a pwal silei mine epwe föri.

6 Iwe, a wor fansoun fän iten mettoch meinisin, a pwal wor lapalapen ar repwe fis, nge aramas ra chök silei ekis usun. 7 Pun aramas resap silei mine epwe fis me mürin. Nge iö a tongeni aiti ngeniir usun mine epwe fis? 8 Esap wor eman a tongeni amwöchü ngünün, esap pwal wor eman a tongeni nemeni ränin an mäla. Usun eman sounfiu esap sü lupwen fansoun maun, iei usun eman chon föföringau esap tongeni ngasala seni liwinin an föför. 9 Ekei mettoch meinisin üa küna, lupwen üa ekieki usun mine a fis won fanüfan. Iwe, a fis pwe eman aramas a nemeni aramas o ariaföüür.

10 Mürin üa pwal küna chon föföringau ra peias fän kinamwe, ir chokewe mi sou feila lon ewe leni mi pin. Iwe, aramas ra mwareitiir me lon ewe telinimw ia ra föri ar föföringau ie. Pwal ei pön chök. 11 Are liwinin tipisin eman esap müttir fis, aramas repwe chök mochen föri föför mi ngau. 12 Ika mwo eman chon tipis a föföringau fän ipükü, nge a pwal manauatam, üa chök silei pwe chokewe mi niueiti Kot o meniniti repwe feiöch. 13 Nge ekewe chon föföringau resap feiöch. Manauer a usun chök ngünüer, resap pwal tongeni manauatam, pun resap niueiti Kot. 14 Mi pwal wor mettoch mi pön ra fis won fanüfan. Fän ekoch chon pwüngüöch ra angei mine ekewe chon pwüngingau repwe angei, nge chon pwüngingau ra angei mine ekewe chon pwüngüöch repwe angei. Üa apasa pwe pwal ei pön chök. 15 Iei mine üa mochen pwe aramas repwe pwapwa lon manauer. Pun esap wor och mettoch mi mürina ngeni aramas lap seni ar repwe mongö o ün fän pwapwa. Mürin ra pwal tongeni pwapwa lon ar angang weires lupwen ränin manauer Kot a ngeniir won fanüfan. 16 Iwe, üa achocho ngeni ai üpwe sile mirit o nenengenifichi föförün chon fanüfan, pwe lerän me lepwin resap sile möür. 17 Iwe, lupwen üa küna ekewe angang meinisin Kot a föri, üa mefi pwe esap wor eman aramas a tongeni weweiti mine a fis won fanüfan. Nge ika aramas repwe weires le kütta wewen, resap tongeni küna. Nge ika eman mi mirit epwe apasa pwe a silei, esap pwal tongeni silei.