1 Iwe, üa ekieki usun ekei mettoch meinisin lon letipei o mefi pwe ekewe chon pwüng me chon mirit pwal ar föför meinisin ra nom lepöün Kot. Nge esap wor eman a silei meinisin mine a nom mwan, are epwe küna chen ika sochowun. 2 Eu chök lapalap a fis ngeni aramas meinisin, a fis ngeni chon pwüng me chon pwüngingau, chon mürina me chon ngau, chon limöch me chon limengau, chokewe mi asor me chokewe resap asor. Eman mi mürina a usun chök eman mi tipis, pwal eman mi pwon fän akapel a usun chök eman mi niuokus le pwon fän akapel. 3 Iei och mettoch mi ngau a fis won fanüfan, pwe eu chök lapalap a fis ngeni aramas meinisin. Letipen aramas ra uren mettoch mi ngau, ra pwal uren song lupwen ra manau, nge mürin ra chök mäla. 4 Eman aramas mi chüen nom lein chon manau a wor an apilüköch. Iwe, eman kolak mi manau a feiöch seni eman laion mi mä. 5 Pun ekewe chon manau ra silei pwe repwe mäla. Nge ekewe sotup resap silei och mettoch, resap pwal chüen angei liwinin ar angang, esap pwal wor eman a chechemeniir. 6 Ar tong me ar oput pwal ar lolowo esap chüen wor. Esap pwal wor wiser ngeni ekewe angang ra fis won fanüfan.

7 Iwe, kopwe chök mongö anom mongö, kopwe pwal ünümi unumom wain fän pwapwa, pun iei mine Kot a tipeeu ngeni. 8 Kopwe üföüf üf mi fokun öch fansoun meinisin, kopwe pwal ekepiti mökürom ngeni lö. 9 Oupwe manaufengen fän pwapwa me pwülüom ka tongei lon ränin manauom mi pön Kot a fang ngonuk won fanüfan. Pun iei wisom lon manauom pwal lon om angang weires won fanüfan. 10 Kopwe achocho le angang lon mettoch meinisin ka föri, pun esap wor och angang, ekiek, silelap ika tipachem lon lenien sotup ewe ia kopwe feila ie.

11 Iwe, üa pwal küna och lapalap won fanüfan: Eman mi müttir le kitir esap tongeni win fansoun meinisin, nge eman mi pwora esap pwal wiwin chök lon maun. Iwe, eman mi mirit a tongeni osupwang ren anan mongö, nge eman mi tipachem esap pwal pisekisek chök. Iwe, sap meinisin mi silelap repwe tolong lon wis tekia, nge a chök tongeni fis ngeniir lupwen a tori fansoun. 12 Iwe, eman aramas esap silei fansoun an epwe mäla. Pun usun chök ik ra tup lon eu uk mi afeiengau, pwal usun chök machang ra tup lon eu sär, ina usun chon fanüfan repwe tup lon feiengau lupwen a müttir toriir.

13 Iwe, üa pwal küna eu sokun mirit won fanüfan mi fokun lomot me rei. 14 A wor eu kükün telinimw aramasen lon ra chokükün. Iwe, eman king mi pöchökül a feito pwe epwe maun ngeni. A pwelifeili ewe telinimw fän pisekin maun o senätä eu ororen maun mi fokun watte ünükün. 15 Iwe, lon ewe telinimw a wor eman mwän mi wöüngau, nge a mirit. Ren an mirit a amanaua chon ewe telinimw. Nge esap wor eman a chechemeni ewe mwän mi wöüngau me mürin. 16 Iei mine üa apasa pwe mirit a mürina seni pwora. Nge esap wor eman a aücheani än ewe mwän mi wöüngau mirit ika afäli an kapas. 17 A mürina ach sipwe afäli än eman mi mirit kapas pwetete, lap seni än eman samol kapas leüömong lein chon umwes. 18 Mirit a mürina seni pisekin maun, nge eman chon tipis a ataela chomong mettoch mi öch.