1 Lon ewe chök rän king Asuworos a ngeni kiwiin Ester meinisin mine Haman ewe mi oputa chon Juta a eäni. Nge Mortokai a tolong fän mesen ewe king, pun Ester a pwäri lefiler me Mortokai. 2 Iwe, ewe king a üttawu nöün ringen impwang, a fen angei seni Haman, o ngeni Mortokai. Nge Ester a anomu fän nemenien Mortokai meinisin mine Haman a eäni.

3 Mürin, Ester a kapassefäl ngeni ewe king. A chapetiu arun pechen o tüngor fän kechü pwe epwe amoela ewe allük mi ngau, Haman ewe mwirimwirin Akak a apwüngala, pwe chon Juta meinisin repwe mäla. 4 Iwe, ewe king a eiti ngeni Ester wokun wokun nemenem mi för seni kolt. Iei mine Ester a ütä o ü fän mesen ewe king. 5 Iwe, a apasa, “Are en ai king ka mochen, ika üa küna ümöümöch me reöm, are ei mettoch epwe pwüng me reöm en ai king, ika ka tongeei, kopwe makei eu allük mi siwili pwüngün ewe allük Haman nöün Hametata ewe mwirimwirin Akak a apwüngala, pwe epwe arosala ekewe chon Juta mi nom lon ekewe sop meinisin ra nom fän nemeniom. 6 Pun ifa usun, epwe tufich ngeniei pwe üpwe nengeni ewe feiengau epwe tori aramasei? Are ifa usun, üpwe tongeni nengeni mälan ai famili?” 7 Mürin, ewe king Asuworos a üreni kiwiin Ester me Mortokai ewe re Juta, “Nengeni, üa ngeni Ester meinisin mine Haman a eäni, ra pwal forusi won ewe irä pokiten a ekiekin niela ekewe chon Juta. 8 Nge eu allük mi sain iten ewe king won o impwang ren nöün ringen impwang esap tongeni siwil. Iei usun mine oupwe tongeni föri: Oupwe makei mine oua mochen pwe epwe öchiti ekewe chon Juta. Oupwe mak fän itei o impwangei ngeni nei we ringen impwang.”

9 Iwe, lon rüe me ülüngatin ränin ewe aülüngatin maram a iteni Siwan ra körifengeni nöün ewe king soumak, pwe repwe makei meinisin mine Mortokai epwe allük ngeniir usun mine epwe öchiti ekewe chon Juta. Iwe, ra makei ewe allük ngeni ekewe nöüwis mi tekia me ekewe kepina, pwal samolun ekewe ipükü rüe me fisu sop seni Intia tori Itiopia. Ra makei lon en me maken fanüan me fosun fanüan, ra pwal mak ngeni ekewe chon Juta lon maken fanüer me fosun fanüer. 10 Iwe, Mortokai a makei ekewe toropwe fän iten ewe king Asuworos o impwangei ren nöün ringen impwang. Nge ekewe chon künö mi uweela ekewe toropwe ra wawa oris mi fokun müttir seni än ewe king lenien oris. 11 Iwe, ren masouen lon ekewe toropwe ewe king a mwüt ngeni ekewe chon Juta mi nom lon ekewe telinimw meinisin, pwe repwe tongeni chufengen o fiu ngeni chon oputeer pwe resap mäla. A mwüt ngeniir pwe repwe niela o arosala iteiten mwicheichen aramas lon ekewe sop mi fiu ngeniir, repwe pwal niela nöür me pwülüer o angei pisekir fän pöchökül. 12 Ei repwe tongeni föri lon ekewe sop meinisin mi nom fän nemenien ewe king Asuworos lon engol me ülüngatin ränin ewe engol me ruuen maram a iteni Atar. 13 Iwe, masouen ekewe toropwe epwe wiliti allük, nge kapiin epwe tori ekewe sop meinisin, pwe ewe allük epwe rongofeil ngeni aramas meinisin. Iwe, ekewe chon Juta repwe tongeni amol ngeni ewe rän, pwe repwe fiu ngeni chon oputeer. 14 Iei mine ekewe chon künö ra tötä won nöün ewe king kewe oris mi fokun müttir o fokun müttirila fän än ewe king allük. Iwe, ewe allük a pwal rongofeil lon Susa samolun telinimwen ewe fanü.

15 Iwe, Mortokai a towu seni fän mesen ewe king fän üfen king mi arauarau me pwech, a pwal üföüf echö owokot mi parachol o mwärini epa mwärämwär seni kolt. Iwe, chon ewe telinimw Susa ra mweireir fän pwapwa. 16 Pun iei a fis ngeni ekewe chon Juta eu fansoun apilükülüköch me pwapwa, pwal mwänek me iteüöch. 17 Iwe, lon iteiten sop me telinimw ia än ewe king allük a tori ie, ekewe chon Juta ra pwapwa o mwänek, ra pwal eäni ränin asösö o mongöfengen. Iwe, chomong aramas seni ewe fanü ra eti lamalamen chon Juta, pun ra niuokusiti ekewe chon Juta.