1 Iwe, lon engol me ülüngatin ränin ewe engol me ruuen maram mi iteni Atar a tori fansoun pwe än ewe king allük epwe pwönüetä. Lon ewe rän ekewe chon oputen chon Juta ra ekiekin akufuur, nge ewe rän a wili ngeni eu rän chon Juta ra tongeni akufu chon oputeer. 2 Iwe, lon ena rän ekewe chon Juta ra chufengen lon ar kewe telinimw lon ekewe sop meinisin mi nom fän nemenien ewe king Asuworos, pwe repwe niela chokewe mi ekiekin nirela. Nge esap wor eman a tongeni akufuur, pun aramas meinisin ra niuokusiti ekewe chon Juta. 3 Iwe, samolun ekewe sop meinisin me nöün ewe king kewe nöüwis mi tekia, ekewe kepina pwal ekewe aramas mi angang ngeni ewe king ra alisi ekewe chon Juta, pun ra niuokusiti Mortokai. 4 Pun Mortokai a tekia lon imwen ewe king, nge iteüöchün a chöfetal lon ekewe sop meinisin. Iwe, än Mortokai nemenem a chök fefeitä. 5 Iei mine ekewe chon Juta ra niela chon oputeer meinisin ren ketilas, ra aroserela o föri ngeniir mine ra mochen. 6 Iwe, lon Susa samolun telinimwen ewe fanü chon Juta ra niela limepükü mwän. 7 Ra pwal niela Parsantata, Talfon me Aspatata, 8 Porata, Atalia me Aritata, 9 Parmasta, Arisai, Aritai me Faisata. 10 Ekei engol mwän nöün Haman, nge Haman nöün Hametata ewe chon oputa chon Juta. Nge resap angei och seni pisekir.

11 Lon ewe chök ränin ra asile ngeni ewe king iteiten aramas mi ninnila lon Susa. 12 Iwe, ewe king a kapas ngeni kiwiin Ester, “Ekewe chon Juta ra niela limepükü mwän me nöün Haman kewe engol mwän lon Susa. Met ra pwal föri lon ekewe lusun sop mi nom fän nemeniei? Iwe, met ka chüen mochen? Epwe chök mwümwü ngonuk. Ika met om tüngor? Epwe chök pwönüetä.” 13 Iwe, Ester a pälüeni, “Are a öch me reöm en ai king, kopwe mwüt ngeni ekewe chon Juta mi nom lon Susa, pwe repwe föri lesor usun mine ra piin föri ikenai. Kopwe pwal mwütätä pwe ekewe engol mwän nöün Haman repwe for won irä.” 14 Iei mine ewe king a allük pwe repwe föri ina usun. Iwe, ewe allük a rongofeil lon Susa, nge ekewe engol mwän nöün Haman ra for won irä. 15 Iwe, lon engol me rüanün ränin ewe maram Atar, ekewe chon Juta mi nom lon Susa ra chufengensefäl pwe repwe pwal niela ülüpükü mwän lon Susa. Nge resap angei och seni pisekir.

16 Iwe, ekewe chon Juta, ra nom lon ekewe sop mi nom fän nemenien ewe king, ra pwal chufengen pwe repwe fiu ngeni chon oputeer, pwe repwe ngasala seniir, nge resap mäla. Ra niela fik me limu ngeröü mwän, nge resap angei och seni pisekir. 17 Ei a fis lon engol me ülüngatin ränin ewe maram Atar, nge lon engol me rüanün rän ra asösö o eäni chulapen mongö fän pwapwa. 18 Iwe, nge ekewe chon Juta mi nom lon Susa ra niela chon oputeer lon engol me ülüngatin me engol me rüanün rän, nge lon engol me limuen rän ra asösö o eäni chulapen mongö fän pwapwa. 19 Iei mine ekewe chon Juta mi imweimw lon ekewe kükün telinimw ra achechema ewe engol me rüanün ränin ewe maram Atar, pwe eu ränin pwapwafengen me mongöfengen me asösö, pwal eu ränin lifangfengen mongö mi annö.

20 Iwe, Mortokai a makeetiu ekei mettoch, a pwal tinala toropwe ngeni chon Juta meinisin ra nom lon ekewe sop mi nom fän nemenien king Asuworos, ngeni chokewe mi arap pwal ngeni chokewe mi toau. 21 A allük ngeniir pwe repwe apini ewe engol me rüanün me ewe engol me limuen ränin ewe maram Atar o pinini iteiten ier, 22 pun lon ekei rän chon Juta ra küna ngas seni chon oputeer. Lon ei maram ar riaföü a wili ngeni pwapwa, nge ar letipeta a wili ngeni mwänek. Iwe, Mortokai a pwal allük ngeniir pwe ekewe rän repwe ränin mongöfengen me pwapwafengen, pwal ränin lifangfengen mongö mi annö me lifang ngeni chon wöüngau.

23 Iei usun chon Juta ra sopwela le föri ar ränin chulap usun mine ra fen popuetä, usun Mortokai a mak ngeniir. 24 Pun Haman nöün Hametata ewe mwirimwirin Akak, ewe mi oputa chon Juta meinisin, a ekiekietä usun an epwe arosala chon Juta. Iwe, a föri Pur, wewen a asisil pwe epwe silei lon meni rän epwe nirela o aroserela. ✡ Est 3.7 25 Nge lupwen Ester a uwato ewe pworaus fän mesen ewe king, ewe king a makei eu allük pwe än Haman ekiekingau ngeni chon Juta epwe tori püsin inisin, pun i me nöün mwän repwe for won irä. 26 Iei mine ra aita ngeni Purim ekewe rän pokiten ewe it Pur. Iwe, pokiten meinisin mine Mortokai a makeetiu lon ei toropwe, pwal pokiten meinisin mine a fis ngeniir pwal mine ra küna, 27 ekewe chon Juta ra pwon pwe ir me mwirimwirir kana pwal meinisin mi chu ngeniir repwe pinini ekewe ruu rän iteiten ier usun a fen mak, nge resap tümwününgau ngeni. 28 Iwe, repwe chechemeni ekei rän seni eu täppin aramas tori eu täppin lon iteiten famili, pwal lon iteiten sop me telinimw. Iwe, ekei ränin Purim repwe pin me ren chon Juta meinisin, nge mwirimwirir resap ükütiu le chechemeniir.

29 Mürin, kiwiin Ester nöün Apihail me Mortokai ewe re Juta ra makei eu allük lon aruachön toropwe usun ekewe ränin Purim o apwüngala fän pöchökül. 30 Iwe, ra tinala ekewe toropwe ren ekewe chon Juta meinisin ra nom lon ekewe ipükü rüe me fisu sop mi nom fän nemenien Asuworos. Nge lon ekewe toropwe a mak kapasen kinamwe me allükülük. 31 A pwal mak pwe repwe föri pwüngün ekei ränin Purim a afat me lon ar kewe räninipin, usun Mortokai ewe re Juta me kiwiin Ester ra allük ngeniir, pwal usun chon Juta ra püsin eäni allük fän iter me mwirimwirir. Repwe föri pwüngün ekei rän, usun ra föri pwüngün ekewe ränin echikefel me ngüngüres. 32 Ina usun än kiwiin Ester allük a apöchöküla pinin ekewe ränin Purim, nge ewe allük a pwal mak lon puk.