1 Mürin, ewe Samol mi Lapalap a üreni Moses, “Kopwe feila seni ikei, ämi me ekewe aramas ka emwenirewu seni ewe fanü Isip. Kopwe emwenirela ngeni ewe fanü üa fen pwon fän akapel ngeni Apraham, Isaak me Jakop pwe üpwe ngeni mwirimwirir. ✡ Ken 12.7; Ken 26.3; Ken 28.13 2 Iwe, üpwe tinala eman chon läng pwe epwe akom mwom, üpwe pwal asüewu ekewe chon Kanaan, chon Amor, chon Hit, chon Peris, chon Hiw me chon Jepus. 3 Kopwe feila lon ewe fanü mi pwülüöch o fanüeräs. Nge üsap etikemi, pwe üsap arosakemiila me won al, pun ämi eu mwichen aramas mi ülöförea o tipepöchökül.”

4 Iwe, lupwen ekewe aramas ra rongorong ekei fos mi eniwokus, ra letipeta. Nge esap wor eman a foutei. 5 Pun ewe Samol mi Lapalap a fen üreni Moses, “Kopwe üreni ekewe aramasen Israel: Ämi eu mwichen aramas mi ülöförea me tipepöchökül. Ika üpwe etikemi fansoun mochomoch echök, üpwe arosakemiila. Iei mine oupwe ettatiu foutemi iei, pwe üpwe silei mine üpwe föri ngenikemi.” 6 Iei mine ekewe aramasen Israel resap chüen fouteer seni ewe fansoun ra nom ren ewe chuk Horep.

7 Iwe, Moses a angei ewe imw mangaku o aüetä lükün toau seni ewe ia chon Israel ra nonom ie. Iwe, a aita ngeni ewe imw imwenfel seni mangaku ia aramas ra churi Kot ie. Nge iteiten eman me eman mi mochen churi ewe Samol mi Lapalap, a feila ngeni ewe imwenfel seni mangaku a nom lükün ewe leni ia ra nonom ie. 8 Iteiten fansoun Moses a feila ngeni ewe imw mangaku, aramas meinisin ra ütä leasamalapen imwer o nenela mürin Moses tori a tolong lon ewe imw mangaku. 9 Lupwen Moses a tolong lon, ewe ürekuchu a feitiu o ü leasamalapen ewe imw mangaku. Iwe, ewe Samol mi Lapalap a fos ngeni Moses. 10 Nge lupwen ekewe aramas meinisin ra küna pwe ewe ürekuchu a ü leasamalapen ewe imw mangaku, ir meinisin ra chapetiu lepwül, eman me eman lon en me asamalapen imwan. 11 Iei usun ewe Samol mi Lapalap a fos newenewen ngeni Moses, usun eman aramas a fofos ngeni chienan. Nge lupwen Moses a liwiniti lenier, nöün chon angang Josua nöün Nun we mwän esap towu seni ewe imw mangaku.

12 Iwe, Moses a üreni ewe Samol mi Lapalap, “Nengeni, ka kapas ngeniei pwe üpwe emwenala ekei aramas ngeni ewe fanü, nge kosap asile ngeniei iö kopwe tini pwe epwe etiei. Nge ka fen üreniei, ‘Üa sileek, ka pwal küna ümöümöch me rei.’ 13 Iei mine üa tüngor ngonuk, ika üa küna ümöümöch me reöm, kopwe aiti ngeniei om akot pwe üpwe sileek o küküna ümöümöch me reöm. Kopwe pwal chechemeni pwe ekei aramas noum.” 14 Iwe, Kot a pälüeni, “Püsin ngang üpwe etuk, üpwe pwal asösök.” 15 Mürin, Moses a üreni, “Are en kosap püsin etikem, kosap pwal atokeemiwu seni ikei. 16 Ren met epwe pwä pwe aia küna ümöümöch me reöm, äm me noum aramas? Ifa usun, esap pwä, lupwen ka püsin etikem? Ren ei äm me noum aramas aipwe sokola seni aramas meinisin won fanüfan.”

17 Iwe, ewe Samol mi Lapalap a üreni Moses, “Üpwe fokun föri meinisin mine ka tüngor, pun üa sileek, ka pwal küna ümöümöch me rei.” 18 Mürin, Moses a üreni, “Kose mochen kopwe aküna ngeniei lingom.” 19 Iwe, Kot a üreni, “Üpwe awora ai kirikiröch pwe epwe akom mwom, üpwe pwal asilefeili me mwom itei we ‘Samol mi Lapalap’. Iwe, üpwe ümöümöch ngeni iö üa mochen ümöümöch ngeni, üpwe pwal eäni tong ngeni iö üa mochen eäni tong ngeni. ✡ Rom 9.15 20 Nge kosap tongeni küna won mesei, pun esap wor eman epwe manau ika epwe küna won mesei.” 21 Mürin, ewe Samol mi Lapalap a üra, “Nengeni, mi wor eu leni ünüki ia ka tongeni ütä won eu achau ie. 22 Nge lupwen ai ling epwe waroto, üpwe aopokolong lon pwangen ei achau o pwölü ngonuk pei, tori üpwe lüla senuk. 23 Mürin üpwe asü pei pwe kopwe küna lükisöküri, nge won mesei kosap tongeni küna.”