1 Iwe, a arapakan an epwe tori ewe chulapen mongö pilawa esap wor iis lon, a iteni Pasofer. ✡ Eks 12.1-27 2 Ekewe souasor mi lap me ekewe Sensen Allük ra niuokusiti ekewe aramas, iei mine ra sotuni ar repwe rawei Jesus pwe repwe niela le monomon.

3 Mürin Satan a tolong lon Jutas a iteni Iskariot, i eman lein ekewe engol me ruoman chon kaiö. 4 Iei mine Jutas a feila o kapas ngeni ekewe souasor mi lap me ekewe meilapen chon tümwünü ewe imwenfel usun an epwe tongeni afangamä Jesus ngeniir. 5 Iwe, ir ra fokun pwapwa ren mine a apasa ngeniir o ra pwon ngeni pwe repwe ngeni moni. 6 Iwe, Jutas a tipeeu ngeni ewe ekiek, iei mine a popuetä le kütta eu fansoun fich pwe epwe afangamä ngeniir Jesus, lupwen ewe mwichen aramas resap nom.

7 Iwe, a tori ewe chulapen mongö pilawa esap wor iis lon, ewe rän lupwen ra niela ekewe nienifön sip fän iten ewe mongön Pasofer. 8 Jesus a üreni Petrus me Johannes, “Oupwe feila o amolätä ewe mongön Pasofer pwe sipwe mongöfengen.” 9 Iwe, ra aisini, “Ia ka mochen pwe aipwe amolätä ie?” 10 Jesus a pölüeniir, “Lupwen oupwe tolong lon ewe telinimw, eman mwän mi uwei eu rume a wor koluk lon epwe churikemi. Oupwe chök tapwela mürin o tolong lon ewe imw i a tolong lon. 11 Iwe, oupwe üreni mine imwan ewe, ‘Nöüm sense a apasa: Ia a nom ie ewe ruum äm me nei kewe chon kaiö aipwe mongö ewe mongön Pasofer?’ 12 Iwe, epwe aiti ngenikemi eu ruum mi watte a nom asan, a fen wes le molotä pisekin lon. Ikenan oupwe amolätä meinisin.” 13 Nge lupwen ar feila ra küna meinisin usun mine Jesus a fen üreniir. Iwe, ra amolätä ewe mongön Pasofer lon ewe leni.

14 Iwe, lupwen a tori ewe fansoun, Jesus me ekewe chon kaiö ra mot ngeni chepel. 15 Iwe, a üreniir, “Ngang üa fokun mochen ach sipwe mongöfengen ei mongön Pasofer mwen ai üpwe tolong lon riaföü. 16 Pun üpwe ürenikemi, pwe seni ikenai üsap chüen mongö ei mongö tori epwe unusen pwönüetä wewen lon Mwün Kot.” 17 Mürin Jesus a angei ewe kap, a iotekin kilisou ngeni Kot won o a apasa, “Oupwe angei ei kap o ünfengen ämi meinisin. 18 Üpwe ürenikemi, pwe seni ikenai üsap chüen ünümi seni ei wain tori wareton ewe Mwün Kot.” 19 Mürin a angei eföü pilawa o a iotekin kilisou ngeni Kot won, a kini o ineti ngeniir o apasa, “Iei inisi üa fangela fän itemi. Oupwe föri ei pwe oupwe chechemeniei.” 20 Pwal ina chök usun, a ngeniir ewe kap mürin ar mongö o apasa, “Ei kap än Kot we pwon mi fö mi fis ren chai a ninnila fän itemi. ✡ Jer 31.31-34 21 Nge nengeni, ätewe epwe afangamäei a nom rei arun ei chepel. ✡ Kölf 41.9 22 Pun Nöün Aramas epwe mäla usun Kot a fen apwüngala, nge feiengauen ätewe epwe afangamä i.” 23 Mürin ra popuetä le aisfengen lefiler iö me leir epwe tongeni föri ei sokun föför.

24 Iwe, a fis eu aninifengen lefilen ekewe chon kaiö won iö leir aramas repwe ekieki pwe a lap seniir meinisin. ✡ Mat 18.1; Mark 9.34; Luk 9.46 25 Jesus a üreniir, “Ekewe kingen chon lükün Israel a wor ar nemenem won aramas, nge chokewe mi wor maner won aramas ra püsin aita ngeniir ‘Chon Alisi Aramas.’ ✡ Mat 20.25-27; Mark 10.42-44 26 Nge esap iei usun lefilemi. Pun ewe mi lap leimi epwe usun chök ewe mi kis, nge ewe eman mi nemenem epwe usun chök eman chon angang. ✡ Mat 23.11; Mark 9.35 27 Iö a lap, ätewe mi mot ngeni chepel are ätewe mi angang ngeni mongö? Ifa usun, esap ätewe mi mot ngeni chepel a lap? Nge ngang üa usun eman chon angang leimi. ✡ Joh 13.12-15

28 “Ämi oua etiei lon ai kewe riaföü meinisin. 29 Usun Semei a ngeniei ai üpwe nemenem, iei usun üpwe pwal ngenikemi ewe nemenem. 30 Oupwe mongö o ün won ai chepel lon mwüi, oupwe pwal mot won ekewe lenien motun king o nemeni ekewe engol me ruu ainangen Israel. ✡ Mat 19.28

31 “Simon, Simon, nengeni, Satan a angei an mwümwütä pwe epwe sotunikemi, epwe mworeikemi usun aramas ra mworei föün wiich, pwe pöör epwe imwü seni föün. 32 Nge ngang üa iotek fän itom Simon, pwe om lükülük esap ükütiu. Iwe, lupwen om kopwe liwinsefäl, kopwe apöchöküla pwiüm kewe.” 33 Petrus a pölüeni, “Ai Samol, üa molotä ai üpwe etukelong lon imwen fötek pwal lon mäla.” 34 Nge Jesus a pölüeni, “Petrus, ngang üpwe ürenuk, pwe lon chök ei pwin mwen ewe chuko epwe kökkö, en kopwe amamäsiniei fän ülüngat.”

35 Mürin Jesus a aisini nöün kewe chon kaiö, “Lupwen üa tinikemiila, nge ousap uwou pwotou, chota me sus, ifa usun, oua osupwangen och mettoch?” Iwe, ra pölüeni, “Ap, aisap osupwangen och mettoch.” 36 Iwe, a üreniir, “Nge iei, are a wor an eman pwotou are chota, epwe fokun angei. Nge are esap wor nöün eman ketilas, epwe amömöla üfan sekit o möni efoch. 37 Pun üpwe ürenikemi, pwe ekei kapas mi mak lon ekewe Toropwe mi Pin repwe pwönüetä fän itei, ‘I a alealong lein ekewe chon pupungau.’ Pun meinisin mine a mak fän itei epwe pwönüetä.” ✡ Ais 53.12 38 Iwe, ekewe chon kaiö ra üreni, “Äm Samol, nengeni, a wor ruofoch ketilas ikei.” Nge Jesus a pölüeniir, “A naf.”

39 Iwe, Jesus a towu seni ewe telinimw o feitä won ewe Chukun Olif usun a piin föföri, nge ekewe chon kaiö ra eti. 40 Iwe, lupwen a tori ewe leni, a üreniir, “Oupwe iotek, pwe ousap turulong lon sosot.” 41 Mürin a feila seniir ina epwe ükükün toauen än eman monei eföü fau. Iwe, a fotopwäsuketiu o iotek. 42 A apasa, “Semei, are ka mochen, kopwe angei seniei ei kapen riaföü, nge esap fis letipei pwe letipom.” 43 Iwe, eman chon läng a pwä ngeni o apöchöküla. 44 Lon an nom lon riaföü watte a achocho le iotek, nge mononan a usun chök supun cha a suputiu le pwül. 45 Iwe, lupwen a ütä seni an iotek, a liwinsefäliti ekewe chon kaiö o a küneer pwe ra möür, pun ra fokun chouchou ren ar lolilen. 46 Mürin a aisiniir, “Pwota oua chök mömöür, oupwe pwätä o iotek, pwe ousap turulong lon sosot.”

47 Iwe, lupwen Jesus a chüen kakapas, a war eu mwichen aramas fän emwenien Jutas, eman lein ekewe engol me ruoman chon kaiö. Jutas a feiliti Jesus pwe epwe mitiri. 48 Nge Jesus a üreni, “Jutas, ifa usun, kopwe afangamä Nöün Aramas ren och mitimit?” 49 Iwe, lupwen ekewe chon kaiö mi eti Jesus ra küna mine a fis, ra ais, “Äm Samol, aipwe nöünöü nöüm ketilas?” 50 Eman me leir a pöküela pelifichin selingen nöün ewe Souasor mi Lap we chon angang. 51 Nge Jesus a üra, “Oupwe ükütiu! Ousap chüen föri ei sokun.” Iwe, a atapa selingen ewe mwän o a öchusefäl. 52 Mürin Jesus a üreni ekewe souasor mi lap, ekewe meilapen chon tümwünü ewe imwenfel me ekewe souakomwen lamalam mi feito pwe repwe turufi, “Oua feito fän ketilas me wok pwe oupwe turufiei, usun ämi oupwe turufi eman chon föföringau? 53 Üa nonom remi iteiten rän lon ewe imwenfel, nge ousap sotuni pwe oupwe turufiei. Nge iei a tori ämi fansoun, lupwen rochopwak a nemenem.” ✡ Luk 19.47; 21.37

54 Iwe, ra turufi Jesus o etekinala lon imwen ewe Souasor mi Lap. Nge Petrus a tapwela mürin me toau. 55 Lupwen ra akküw eu ekkei lukalapen ewe leni mwen imwen ewe Souasor mi Lap o motfengen ünükün, Petrus a pwal mot rer. 56 Mürin eman chon angang fefin a küna Petrus pwe a momot ikenan ünükün ewe ekkei, a newenewen ngeni o üra, “Ei mwän a pwal eti Jesus.” 57 Nge Petrus a amamäsini o üreni, “Fefin, ngang üsap silei ätewe.” 58 Ekis chök fansoun mürin eman mwän a pwal esilla Petrus o üreni, “Pwal en eman leir.” Nge Petrus a pölüeni, “Mwän, ngang sap eman me leir.” 59 Ina epwe eu awa mürin, eman mwän a pöchökül le üra, “Enlet, ei mwän a pwal eti Jesus, pun pwal i eman re Kalilea.” 60 Nge Petrus a pölüeni, “Mwän, ngang üsap silei mine ka kapas usun!” Iwe, lon ewe chök otun, lupwen Petrus a chüen kakapas, eman chuko a kökkö. 61 Iwe, ewe Samol a kul o newenewen ngeni Petrus. Iwe, Petrus a chechemeni pwe ewe Samol a fen üreni, “Mwen än ewe chuko epwe kökkö lepwinei, en kopwe amamäsiniei fän ülüngat.” 62 Iwe, Petrus a feila lükün o a fokun kechü.

63 Iwe, ekewe mwän mi mamasa Jesus ra turunufasei o wichi. 64 Ra finitala won mesan o aisini, “Iö a wichiik? Kopwe esilla.” 65 Ra pwal apasa ngeni chomong kapasen turunufas.

66 Iwe, lupwen a ränila, ekewe souakomwen lamalam, ekewe souasor mi lap me ekewe Sensen Allük ra mwichfengen. Mürin ra etekinala Jesus mwen ewe mwichen souapwüng. 67 Iwe, ra aisini Jesus, “Kopwe ürenikem are en wesewesen ewe Kraist.” Jesus a pölüeniir, “Are üpwe ürenikemi, ousap lüküei. 68 Nge are üpwe aisinikemi eu kapas ais, ousap mochen pölüeni. 69 Nge seni iei Nöün Aramas epwe mot lepelifichin Kot ewe mi Manau.” 70 Iwe, ir meinisin ra aisini, “Ifa usun, en ewe Nöün Kot?” Jesus a pölüeniir, “A pwüng mine oua apasa, pwe ngang nöün.” 71 Mürin ra üra, “Esap chüen wor lomoten ach sipwe kütta och kapasen pwärätä. Ousia püsin rongorong met a apasa.”