1 Mürin Jesus a kapas ngeni ewe mwichen aramas me nöün kewe chon kaiö, 2 “Ekewe Sensen Allük me ekewe Farisi a wor ar pwüüng pwe repwe awewei än Moses kewe allük. 3 Iei mine oupwe aleasochis o föri meinisin mine ra ürenikemi, nge ousap apirü ar föför, pun resap manaueni mine ra eäni afalafal. 4 Ra rifengeni mettoch mi fokun chou o isetä won afaren aramas, nge püsin ir resap pomwe ngeni mwo efoch aütür ar repwe alisiir le keki ekewe mettoch mi chou. 5 Ra föri mettoch meinisin pwe aramas repwe küneer. Oupwe nengeni watten ekewe pwor ra rietä won chamwer me pöür, ekewe wokisin seni ekewe Toropwe mi Pin ra nom lon! Nengeni, langatamen ekewe fout lepwülün üfer! ✡ Mat 6.1; Num 15.38; Tut 6.8 6 Ra sani ar repwe mot won ekewe leni fän iten aramas mi iteföüla lon lenien kametip, pwal won ekewe lenien mot mi keimwüela lon ekewe imwen felikis. 7 Ra pwal sani än aramas repwe kapong ngeniir me sufölitiir lon ekewe lenien amömö, pwal än aramas repwe kökköri ngeniir ‘Sense’. 8 Nge ämi ousap mwüt ngeni aramas pwe repwe kökköri ngenikemi ‘Sense’, pun a chök wor eman nöümi Sense, nge ämi meinisin oua pwipwi. 9 Ousap kökköri ngeni eman ikei won fanüfan ‘Sam’, pun a chök wor eman Sememi lon läng. 10 Ousap pwal kökköri ngeni eman ‘Souemwen’, pun a chök wor eman ämi souemwen, iei i ewe Kraist. 11 Ewe mi lap leimi epwe nöümi chon angang. ✡ Mat 20.26-27; Mark 9.35; 10.43-44; Luk 22.26 12 Pun iö a püsin atekiatä epwe tekisonotiu, nge iö a püsin atekisonatiu epwe tekiatä. ✡ Luk 14.11; 18.4

13 “Feiengauemi, ämi Sensen Allük me Farisi! Ämi chon likatuputup! Oua öpüngala ewe asam ngeni Mwün Läng seni aramas. Nge püsin ämi ousap tolong lon, ousap pwal mwüt ngeni chokewe mi mochen tolong ar repwe tolong. 14 [Feiengauemi, ämi Sensen Allük me Farisi! Ämi chon likatuputup! Oua angemwäli imwen ekewe fefin mi mä pwülüer, mürin oua einga ngeni aramas ämi iotek mi langatam. Iei mine oupwe küna apwüng mi fokun chou.]

15 Feiengauemi, ämi Sensen Allük me Farisi! Ämi chon likatuputup! Ämi oua saifeil le matau pwal won fanü fän iten ämi oupwe liapeni eman aramas ngeni ämi lamalam. Nge lupwen eman a etiwa ämi lamalam, oua föri pwe ewe aramas epwe kon ngau senikemi le tolong lon hell.

16 Feiengauemi, ämi souakom mi mesechun! Oua apasa, ‘Are eman a akapelü ewe imwenfel, esap wisen föri pwüngün mine a eäni pwon. Nge are a akapelü ekewe mettoch seni kolt lon imwenfel, epwe fokun föri pwüngün.’ 17 Umwesimi me mesechunemi! Met a fokun aüchea, ekewe mettoch seni kolt ika ewe imwenfel ewe kolt a pin ren? 18 Ämi oua pwal apasa, ‘Are eman a akapelü ewe rongen asor esap wisen föri pwüngün mine a eäni pwon. Nge are a akapelü ewe asor mi nom won ewe rongen asor, epwe föri pwüngün.’ 19 Mesechunemi! Met a fokun aüchea, ewe asor ika ewe rongen asor ewe asor a pin ren? 20 Iei mine lupwen eman a akapelü ewe rongen asor, a akapelü ewe rongen asor pwal ekewe asor meinisin mi nom won. 21 Nge lupwen eman a akapelü ewe imwenfel, a akapelü ewe imwenfel me Kot mi nom lon. 22 Nge iö a akapelü läng, a akapelü ewe lenien mot än Kot pwal ewe mi mot won. ✡ Ais 66.1; Mat 5.34

23 Feiengauemi, ämi Sensen Allük me Farisi! Ämi chon likatuputup! Oua ngeni Kot eu leengolun seni ämi irän nofitin mongö mi annö iter mint, dill me kumin. Nge ousap aleasochis ngeni ekewe allük mi fokun aüchea usun pwüng, kirikiröch me allükülük. Ekei allük oupwe fokun apwönüretä, nge ousap pwal tümwününgau ngeni ekewe ekoch. ✡ Lif 27.30 24 Mesechunemi, ämi souakom! Oua churawu eman long seni lon ünümemi minen ün, nge oua oromala eman kamel!

25 Feiengauemi, ämi Sensen Allük me Farisi! Ämi chon likatuputup! Oua limeti lükün ämi kap me sepi, nge lon a ur ren mine a torikemi ren angangen mwäneson me kirikiringau. 26 Mesechunemi, ämi Farisi! Oupwe akomwen limeti lon ewe kap me ewe sepi, mürin epwe pwal limöchüla ewe lükün.

27 Feiengauemi, ämi Sensen Allük me Farisi! Ämi chon likatuputup! Oua usun chök ekewe peias mi peinitipwech ra lingöch me lükün, nge lon ra ur ren chün aramas me machen somä. ✡ Föf 23.3 28 Iei usun pwal ämi: Oua pwä ngeni aramas lon lapalapen aramas mi pwüng, nge lon letipemi oua ur ren likatuputup me tipis.

29 Feiengauemi, ämi Sensen Allük me Farisi! Ämi chon likatuputup! Oua föri peias mi fokun mürina fän iten ekewe soufos o alinga ekewe föün achem fän iten ekewe chon pwüng. 30 Oua apasa, ‘Are äm aia manau lon fansoun äm kewe lewo, äm aisap etiir le niela ekewe soufos.’ 31 Ren ei oua püsin pwärätä pwe oua mwirimwirin chokewe mi niela ekewe soufos! 32 Oupwe chök sopwela le awesala mine ämi kewe lewo ra popuetä! 33 Ämi serepenit me etelien serepenit! Ifa usun, ämi oupwe tongeni sü seni liwiningauen ämi tipis lon hell? ✡ Mat 3.7; 12.34; Luk 3.7

34 Iei mine üpwe tinala remi soufos me soutipachem me sense. Ämi oupwe niela ekoch leir, oupwe iräpengesi ekoch, oupwe pwal wichi ekoch me lon ämi imwen felikis o cheerela seni eu telinimw tori pwal eu telinimw. 35 Iei mine epwe feitiu womi ewe apwüng fän iten ninnilan ekewe aramas mi pwüng meinisin, seni ninnilan ewe chon pwüng Epel tori ninnilan Sekaraia nöün Perekia, ätewe oua niela lefilen ewe imwenfel me ewe rongen asor. ✡ Ken 4.8; 2.Kron 24.20-21 36 Enlet, üpwe ürenikemi: Ewe apwüng fän iten mälan ekei mi nimanau epwe tori ei pilon aramasen ikenai.

37 “Jerusalem, Jerusalem! Ka niela ekewe soufos o mone fau ngeni ekewe chon künö Kot a tinato reöm! A fän fite ai mochen achufengeni noumw kewe aramas usun eman inelapen chuko a amwichafengeni nöün kana fän pöükässin, nge ämi ousap mochen. 38 Nengeni ämi we imwenfel epwe pöla, pun aramas repwe likitala. ✡ Jer 22.5 39 Pun üpwe ürenikemi, pwe seni lon ei fansoun ousap chüen künasefäliei tori oupwe apasa, ‘A feiöch ätewe a feito fän iten ewe Samol.’ ” ✡ Kölf 118.26