1 ኮይሮ ጫቆ ፆሳው ጎዪኒያ ዎጋይኔ ኣሳይ ኦꬄዳ ጌሻ ጎሊ ዴዔ። 2 ኣዪሲ ጎፔ፥ ኮይሮ ዱንካኒ ኤቄዳ፤ ኣ ጊዱዋን ሙቃዳ ዎꬂያዌ፥ ፃራጴዛይኔ ጎዳ ሲንꬃን ዎꬂያ ኡኪꬃይ ዴዔ፤ ሄ ሳዓይ ጌሻሳ ጊዴ ፄሴቴ። ኬስ 26፡1-30፤ 25፡31-40፤ 25፡23-30 3 ላዔንꬆ ጋሪዱዋ ጉዬ ባጋና ኡባፔ ኣꬊያ ጌሻ ሳዓ ጌቴቲያ ዱንካኒ ዴዔ። ኬስ 26፡31-33 4 ኣ ጊዱዋን ኢፃና ጩዋያናው ዎርቃፔ ኦꬄዳ ሳፂኒኔ ኡባሳና ዎርቃን ሼሼዳ ቃላ ጫቁዋ ታቦታይ ዴዔ። ሄ ቃላ ጫቁዋ ታቦታን ማናይ ዴዒያ ዎርቃ ፃሩ፥ ኣሮና ፃምዓይ ኣጬዳዌኔ ቃሲ ሙሴ ሂጊ ፃፌቴዳ ላዑ ማሴቴዳ ሹቻቱ ዴዒኖ። ኬስ 30፡1-6፤ 25፡10-16፤ 16፡33፤ ፓይ 17፡8-10፤ ዛር 10፡3-5 5 ሄ ቃላ ጫቁዋ ታቦታፔ ቦላ ባጋና ኣቶ ጊያ ሳዓ ቁምዒያ ባሬንቱ ቄፊያን ጌንꬂያ ቦንቾ ኪሩቤቱ ዴዒኖ፤ ሺን ሃ ኡባባ ሃዒ ዉርሲ ኦዳናው ዳንዳዮኮ። ኬስ 25፡18-22

6 ሄዌ ሄዋዳን ጊጊ ዴዒሺን፥ ቄሳቱ ኡባ ዎዴ፥ ባሬንቱ ኦሱዋ ኦꬃናው ኮይሮ ዱንካኒያ ጌሊኖ። ፓይ 18፡2-6 7 ሺን ቄሳቱዋ ኡባቱዋ ካፑዋ ፃላላይ ላዔንꬆ ዱንካኒያ ላይꬃፔ ኢቲ ጌዴ ጌሊዴ ባሬ ዲራዉኔ ኤሬናን ኣሳይ ኦꬄዳ ናጋራ ዲራው፥ ፆሳው ያርሺያ ሱꬃ ኣኪዴ ጌሌ። ዎግ 16፡2-34 8 ኮይሮ ዱንካኒ ኤቂ ዴዒሺን፥ ኡባፔ ኣꬊያ ጌሻ ሳዓ ኣፊያ ኦጊ ቢሮ ዶዬቲቤናዋ ጌሻ ኣያናይ ሄዋን ኤሪሴ።

9 ሄ ዱንካኒ ሃ ዎዴው ሌሚሱዋ፤ ሄዋ ጊያዌ ፆሳው ኢሚያ ኢሙኔ ያርሹ ጎዪኒያዋ ሱሬ ዎዛና ባላይ ባይናዋ ኦꬃናው ዳንዳዪኪኖ። 10 ሄዋንቱ ሙሳባ፥ ኡሻባኔ ዱማ ዱማ ሜቻባ ኦዲያ ካሬ ባጋ ዎጋቱዋ፤ ኡንቱንቱ ኦራፂያ ዎዲ ጋካናው ኦሴቲያ ዎጋቱዋ።

11 ሺን ኪሪስቶሲ ሃዋን ዴዒያ ሎዖባው ቄሳቱዋ ኡባቱዋ ካፑዋ ጊዲዴ ዪዲጌዳ። ኢ ጌሊዴ ኦꬂያ ዱንካኒ ኡባፔ ኣꬊያዋኔ ባላይ ባይናዋ፤ ቃሲ ሄ ዱንካኒያ ኣሳይ ኦꬂቤና፤ ሃ ሜꬌቴዳ ሳዓባካ ጊዴና። 12 ኪሪስቶሲ ኡባፔ ኣꬊያ ጌሻ ሳዓ ጌሊያ ዎዴ፥ ዴሻ ሱꬃኔ ጋሎ ማራ ሱꬃ ኦይቂዴ ጌሊቤና፤ ሺን ባሬ ሱꬃ ኦይቂዴ፥ ኑሲ ሜꬊና ኣቶቴꬃ ኢሚዴ፥ ላዔꬄናን ኢቲ ጌዴ ጌሌዳ። 13 ቱኔዳ ኣሳ ቦላ ኮሩማ ሱꬃኔ ዴሻ ሱꬃ ጫጫፊዴ፥ ጉዴቴዳ ኡሳቲ ቢዲንꬃ ቆሊና፥ ሄ ኡራ ቱናቴꬃፔ ጌሻናው ዳንዳዮፔ፥ ዎግ 16፡15-16፤ ፓይ 19፡9፣ 17-19 14 ሜꬊና ጌሻ ኣያና ባጋና ባላይ ባይና ያርሹዋዳን፥ ፆሳው ባሬና ኢሜዳ ኪሪስቶሳ ሱꬃይ፥ ኑኒ ዴዑዋ ፆሳው ኦꬃና ማላ፥ ካሴ ኑ ሃይቄዳ ኦሱዋፔ ኑ ሱሬ ዎዛና ዎቲ ጌሻንዴሻ!

15 ሄዋ ዲራው፥ ፆሳይ ፄሴዳዋንቱ ኢ ኢማና ጌዳ ሜꬊና ኣንጁዋ ላታና ማላ፥ ኪሪስቶሲ ኦራꬃ ጫቆ ጋናቴዳ፤ ሄዌ ሃናና ዳንዳዪያዌ፥ ኣሳይ ኮይሮ ጫቁዋፔ ጋርሳን ዴዒዴ ኦꬄዳ ባላ ኣይሌቴꬃፔ ኬሲያ ሃይቁ ዴዒያ ዲራሳ።

16 ኣዪሲ ጎፔ፥ ሃይቂያ ኡራይ ዎይቴዳዌ ዴዖፔ፥ ሄ ኡራይ ሃይቆዌ ኤሬታናው ኮሼ። 17 ኣዪሲ ጎፔ፥ ዎይቴዳ ኡራይ ሃይቄዳ ዎዴ፥ ኢ ዎይቴዳዌ ፖሌቴዳ፤ ሄ ዎይቴዳዌ ፓፃ ዴዒሺን፥ ኣይኔ ፖሌቴና።

18 ሃራይ ኣቶ፥ ኮይሮ ጫቁካ ሱꬃይ ባይናን ኢንጄቲቤናዌ ሃዋሳ። 19-20 ኣዪሲ ጎፔ፥ ሂጊያን ዴዒያ ኣዛዙዋ ኡባ ሙሴ ኣሳ ኡባው ኦዴዳ፤ ሄዋፔ ጉዪያን፥ ጋሎ ማራ ሱꬃኔ ዴሻ ሱꬃ፥ ሃꬃና፥ ዞዖ ዶርሳ ኢሲኪያናኔ ሂሶጲያ ጊያ ሚꬃ ቦንጪያና ኢቲፔ ኣኪዴ፥ «ሃዌ ሂንቴንታ ፆሳይ ኣዛዜዳ ጫቁዋ ሱꬃ» ያጊዴ፥ ሂጊያ ማፃፋ ቦላኔ ኣሳ ኡባ ቦላ ጫጫፌዳ። ኬስ 24፡6-8 21 ሄዋዳንካ፥ ዱንካኒያ ቦላኔ ኦꬂያ ሚሻ ኡባ ቦላ ሱꬃ ሙሴ ጫጫፌዳ። ዎግ 8፡15 22 ሂጊ ጊያዋዳን፥ ቱሙካ ኣማሬዳዋፔ ኣቲን፥ ኡባባይካ ሱꬃን ጌዬ፤ ሱꬃይ ጉካና ꬋዮፔ፥ ኣቶቴꬃይ ባዋ።

23 ሄዋ ዲራው፥ ሳሉዋን ዴዒያዋንታ ማላቲያዋንቱ ሄ ያርሹዋን ጌያናው ኮሼ፤ ሺን ሳሉዋን ዴዒያዋንቱካ ባሬንቱ ሁጴው ጌያናው ኣꬊያ ያርሹዋ ኡንቱንታ ኮሼ።

24 ኣዪሲ ጎፔ፥ ኪሪስቶሲ ቱሙ ጌሻሳን ሌሚሴቲያ ኣሳይ ኦꬄዳ ጌሻሳ ጌሊቤና፤ ሺን ኢ ሃዒ ኑ ጊሻታው ፆሳ ሲንꬃን ቤታናው ያ ሳሉዋ ጌሌዳ። 25 ቄሳቱዋ ኡባቱዋ ካፑ ላይꬃን ላይꬃን ባሬ ሱꬃ ጊዴናዋ ኦይቂዴ፥ ጌሻ ሳዓ ጌሊያዋዳን፥ ኪሪስቶሲ ባሬና ኡባዴ ያርሻናው ጌሊቤና። 26 ሄዋ ጊዲንቶ፥ ኪሪስቶሲ ሳዓይ ሜꬌቶዴፔ ዶሚዴ ዳሮ ጌዴ ዋዬታናው ኮሼ፤ ሺን ሃዒ ዎዲያ ዉርሴꬃን ናጋራ ꬋዪሳናው ባሬና ያርሺዴ፥ ላዔꬄናን ኢቲ ጌዴ ቤቴዳ።

27 ኣሳይ ኡባይ ኢቲ ጌዴ ሃይቃናው ቤሴ፤ ሄዋፔ ጉዪያን ፆሳይ ኣሳ ፒርዳና። 28 ሄዋዳንካ፥ ቃሲ ኪሪስቶሲ ዳሮ ኣሳ ናጋራ ꬋዪሳናው ኢቲ ጌዴ ያርሼቴዳ፤ ቃሲ ኢ ባሬና ሎይꬂ ናጊያዋንታ ኣሻናው ቤታናፔ ኣቲን፥ ላዔንꬆ ናጋራ ቶካናው ቤቴና። ኢሳ 53፡12