10
1 ኣዪሲ ጎፔ፥ ሂጌው ያና ሎዖባ ኤሹዋ ፃላላይ ዴዔ፤ ኣው ቱሙ ሌሚሱ ባዋ። ኡባ ዎዴ ላይꬃን ላይꬃን ኢቲ ማላ ያርሹ ያርሼቴ፤ ሄዋ ዲራው፥ ሂጊ ፆሳኮ ሺቂያ ኣሳ ሄ ያርሹዋን ባላይ ባይና ኣሳ ኦꬃናው ኡባካ ዳንዳዬና። 2 ፆሳው ጎዪኒያ ኣሳይ ባሬ ናጋራፔ ኡባና ጌዬዳባ ጊዲንቶ፥ ሱሬ ዎዛናን ላዔꬁዋ ናጋራ ቆፔና፤ ቃሲ ያርሺያዋካ ኣጋና። 3 ሺን ኣሳይ ላይꬃን ላይꬃን ሄ ያርሹዋን ባሬ ናጋራ ሃሳዬ። 4 ኣዪሲ ጎፔ፥ ኮሩማ ሱꬃይኔ ዴሻ ሱꬃይ ናጋራ ꬋዪሳናው ኡባካ ዳንዳዬና።
5 ሄዋ ዲራው፥ ኪሪስቶሲ ሃ ኣላሚያ ያና ሃኒዴ፥ ሃዋዳን ያጌዳ፤
«ኔኒ ያርሹዋኔ ኢሙዋ ኮያቤይካ፤
ሺን ታው ቦላ ጊጊሳዳ። ማዝ 40፡6-8
6 ኔኒ ፁጊያ ያርሹዋኒኔ
ናጋራ ያርሹዋን ኡባካ ናሼታካ።
7 ታኒ ሄ ዎዴ፥ ‹ፃꬃ ማፃፋን ታባይ ፃፌቴዳዋዳንካ፥
ፆሳው፥ ታኒ ኔኒ ኮዪያዋ ኦꬃናው ያዲ› ያጋዲ»
ያጌዳ። 8 ያርሹ ያርሼታና ማላ፥ ሂጊ ኣዛዚያዋ ጊዶፔኔ፥ ኪሪስቶሲ ኮይሮ፥ «ኔኒ ያርሹዋ፥ ኢሞታ፥ ፁጊያ ያርሹዋኔ ናጋራ ያርሹዋ ኡባካ ኮያቤይካ፤ ሄዋንቱን ናሼታካ» ያጌዳ። 9 ሄዋፔ ጉዪያን ኪሪስቶሲ፥ «ፆሳው፥ ታኒ ኔኒ ኮዪያዋ ኦꬃናው ያዲ» ያጌዳ። ሄዋ ዲራው፥ ኪሪስቶሲ ላዔንꬁዋ ኤሳናው ኮይሮዋ ꬋዪሴ። 10 ዬሱሲ ኪሪስቶሲ ፆሳይ ኮዬዳዋ ኦꬄዳ ዲራው፥ ባሬ ኣሹዋ ላዔንꬄናን ኢቲ ጌዴ ያርሼዳዋን ኑኒ ኑ ናጋራፔ ጌዪ ኣጌዶ።
11 ቄሳቱዋ ኡባቱ ሃቼ ሃቼ ኤቂዴ፥ ባሬ ኦሱዋ ኦꬂኖ፤ ቃሲ ናጋራ ꬋዪሳናው ኡባካ ዳንዳዬና ኢቲ ማላ ያርሹዋ ዛሪ ዛሪዴ ያርሺኖ። ኬስ 29፡38 12 ሺን ኪሪስቶሲ ናጋራ ዲራው፥ ኡባ ዎዴው ጊዴዳ ኢቲ ያርሹዋ ያርሺዴ፥ ፆሳፔ ኡሼቻ ባጋና ኡቲ ኣጌዳ። ማዝ 110፡1 13 ፆሳይ ሲንꬃፔ ኪሪስቶሳ ሞርኬቱዋ ኪሪስቶሳው ጌዲያን ዬꬊያዋ ኦꬃና ጋካናው፥ ያኒ ናጌ። 14 ኣዪሲ ጎፔ፥ ኢ ኢቲ ጌዴ ያርሼዳዋን፥ ናጋራፔ ጌዬዳዋንታ ሜꬊናው ባላይ ባይናዋንታ ኦꬄዳ።
15 ቃሲ ጌሻ ኣያናይ ኑሲ ማርካቲዴ፥ ሃዋዳን ያጌ፤
16 «ታኒ ሄ ጋላሳቱዋፔ ጉዪያን፥
ኡንቱንቱና ጫቄቲያ ጫቁ ሃዋ፡
ታኒ ታ ሂጊያ ኡንቱንቱ ቆፋን ዎꬃና፤
ቃሲ ኡንቱንቱ ዎዛናንካ ፃፋና»
ያጌ። ኤርም 31፡33 17 ቃሲ ሄዋፔ ጉዬና፥
«ታኒ ኡንቱንቱ ናጋራኔ
ኡንቱንቱ ማካላ ኦሱዋ ላዔንꬆ ሃሳዪኬ»
ያጌ። ኤርም 31፡34 18 ፆሳይ ሄ ናጋራ ኣቶ ጌዳ ዎዴ፥ ናጋራ ꬋዪሳናው ሃዋፔ ሲንꬃው ያርሹዋ ኮሼና።
ፆሳኮ ሺቃናው ኮሼ
19 ሲሚ ታናዳን ኣማኒያዋንቶ፥ ኑኒ ዬሱሳ ሱꬃ ባጋና ኡባፔ ኣꬊያ ጌሻ ሳዓ ጌላናው ኑሲ ፃላቴꬃይ ዴዔ። 20 ኪሪስቶሲ ኑሲ ኦራꬃ ኦጊያኔ ዴዑዋ ኦጊያ ጋሪዱዋ ባጋና፥ ሄዋ ጉሳይ ባሬ ቦላ ባጋና ዶዬዳ። 21 ኑሲ ፆሳ ጎሌን ሱንꬄቴዳ ዎልቃማ ቄሳይ ዴዒያ ዲራው፥ 22 ኑኒ ሱሬ ዎዛናና፥ ቱሙ ኣማኑዋና፥ ኢታ ዎዛናፔ ጌዬዳ ዎዛናናኔ ቃሲ ፂሎ ሃꬃን ሜጬቴዳ ቦላና ፆሳኮ ሺቆይቴ። ዎግ 8፡30፤ ሂዝ 36፡25
23 ኑሲ ኢማና ጌዳ ፆሳይ ኣማንꬂያ ዲራው፥ ኑኒ ዴማና ጊዴ ናሼቻን ናጊ ኡቴዳዋ ሎይꬂ ኦይቆይቴ። 24 ኢቱ ኢቱዋና ዋኒ ሲቄታኔንቶኔ ቃሲ ሎዖ ኦሱዋ ዎቲ ኦꬃኔንቶ፥ ኢቱ ኢቱዋሲ ቆፔቶ። 25 ኢቱ ኢቱ ሺቁዋ ዶያ ኡዲዴ ሺቂያዋዳን፥ ኑኒካ ኢቲፔ ሺቂያዋ ኣጎኮ፤ ሺን ጎዳ ጋላሳይ ማታቲያዋ ሂንቴንቱ ቤዒያ ዲራው፥ ኢቱ ኢቱዋ ሜንꬄꬄቶ።
26 ኑኒ ቱማቴꬃ ኤራ ኣኪዲጊዴ፥ ኤሪዴ ናጋራ ኦꬂያዋ ጊዶፔ፥ ሃዋፔ ሲንꬃው ናጋራ ꬋዪሲያ ያርሹ ኢቲባይኔ ባዋ። 27 ሺን ያሺያ ፒርዳ ናጊያዌኔ ፆሳ ኢፂያ ኡባ ማናው ዎልቃማ ታማይ ዴዔ። ኢሳ 26፡11 28 ሙሴ ሂጌው ኣዛዜቴና ኡራይ፥ ላዑ ኡራይ ዎይ ሄዙ ኡራይ ኣ ቦላ ማርካቶፔ፥ ቃሬቲ ባይናን ሃይቄ። ዛር 17፡6፤ 19፡15 29 ፆሳ ናዓ ካꬌዳ ኡራይ፥ ባሬና ናጋራፔ ጌሼዳ ፆሳ ጫቁዋ ሱꬃ ቱናባዳን ቆፔዳ ኡራይ፥ ቃሲ ኣꬎ ኬካቴꬃ ጌሻ ኣያና ቦሪያ ኡራይ፥ ኣይ ኬና ኢታ ፒርዳ ኣካናው ቤሲንቶኔ ኣኔ ቆፒቴ። ኬስ 24፡8
30 ኣዪሲ ጎፔ፥ «ታኒ ሃሉዋ ኬሳናኔ ኩሺያ ዛራና» ጌዳዋ ኑኒ ኤሬቶ፤ ቃሲካ፥ «ጎዳይ ባሬ ኣሳ ፒርዳና» ያጌዳ። ዛር 32፡35፣ 36 31 ዴዑዋ ፆሳ ኩሺያን ኩንዳናዌ ዳሮ ያሺያዋ።
32 ሂንቴንቱሲ ፆሳ ፖዑ ፖዔዳዋፔ ጉዪያን፥ ሂንቴንቱ ዳሮባን ዋዬቲዴ፥ ዎልቃማ ዋꬌታን ጌንጬዳ ቤኒ ዎዲያ ሃሳዪቴ። 33 ኢቲ ኢቲ ጌዴ ሂንቴንታ ኣሳ ሲንꬃን ቦሬዲኖኔ ፓፃ ካዔዲኖ፤ ቃሲ ሃራ ዎዴ ሄዋዳን ኦꬄዳዋንቱናኔ ኢቲፔ ዴዔዲታ። 34 ኣዪሲ ጎፔ፥ ቃሹዋን ዴዒያ ኣሳቱዋሲ ሂንቴንቱ ቃሬቴዲታ፤ ያቲዴ ሂንቴንቱሲ ሜꬊናው ዉሬና ኡባፔ ኣꬊያ ሻሉ ሳሉዋን ዴዒያዋ ሂንቴንቱ ሁጴው ኤሬዳ ዲራው፥ ሂንቴባ ኡባ ኣኪዲጎፔ ሂዶታን ጌንጬዲታ።
35 ሄዋ ዲራው፥ ዎልቃማ ዎዪታና ዴዒያ ሂንቴንቱ ፃላቴꬃ ኦሎፒቴ። 36 ፆሳይ ኮዪያዋ ኡዲዴ፥ ኢ ሂንቴንቱሲ ኢማና ጌዳዋ ኣካናው ጌንጫና ኮሼ። 37 ኣዪሲ ጎፔ፥ ፆሳ ማፃፋይ፥
«ኣማሬዳ ዎዲ ኣቴዳ።
ዪያዌ ያናዋ፤ ጋሚዔና። ኢምብ 2፡3-4 38 ታ ፂሉ ኣማኔቲዴ ዴዓናዋ።
ሺን ኦኒኔ ጉዬ ሲሞፔ፥
ታና ናሼቼና»
ያጌ። 39 ኑኒ ኣማኔቲዴ ኣቴዳዋንቱ ባጋ ጊዲያዋፔ ኣቲን፥ ጉዬ ሲሚዴ ꬋዬዳዋንቱ ባጋ ጊዶኮ።