Lii lolo Beꞌa nèti Lamatua Yesus
madhutu sasuri Mateos
1
Jꞌajꞌajꞌi nèti Lamatua Yesus
(Lukas 3:23-38)
1-2 Sasuri ne, lole jꞌara mamuri nèti Yesus Kristus, nuka Dhèu dhu Ama Lamatua padhadha mema ho neo pua mai. Yesus ne, ana-èpu dhèu aae Daud dènge Abraham.
Karèi nèti Abraham toke dhèu aae Daud, abhu 14 (canguru èpa) bèi-baki. Kabhia Na sèmi neꞌe:
Abraham matana Isak,
Isak matana Yakob,
Yakob matana Yahuda dènge aꞌari na,
3 Yahuda matana Peres dènge Sera (ina ra, ngara na Tamar)
Peres matana Herson,
Herson matana Ram,
4 Ram matana Aminadab,
Aminadab matana Nahason,
Nahason matana Salmon,
5 Salmon matana Boas (ina na, ngara na Rahab)
Boas matana Obet (ina na, ngara na Rut),
Obet matana Isai,
6 Isai matana Daud.
7-11 Nèti Daud toke lodꞌo dhu ra babège suku Israꞌel asa Babel, abhu hari 14 (canguru èpa) bèi-baki, nuka:
Daud matana Soleman (ina na, uru èèna dhèu èmu Uria).
Soleman matana Rehabeam,
Rehabeam matana Abia,
Asaf matana Yosafat,
Yosafat matana Yoram,
Yoram matana Usia,
Usia matana Yotam,
Yotam matana Ahas,
Ahas matana Heskia,
Heskia matana Manase,
Amos matana Yosias,
Yosias matana Yekonya dènge ari na, lodꞌo babège si asa Babel.✡ 2 Dhèu Aae sèra 24:14-15, 2 Sejara nèti Israꞌel dènge Yahuda 36:10, Yermia 27:20
12-16 Lodꞌo babège si asa Babel, toke dꞌai rara iisi Yesus, abhu 14 (canguru èpa) bèi-baki, nuka:
Yekonya matana Saltiel,
Saltiel matana Serubabel,
Serubabel matana Abihut,
Abihut matana Elyakim,
Elyakim matana Asor,
Asor matana Sadok,
Sadok matana Akim,
Akim matana Eliut,
Eliut matana Eliasar,
Eliasar matana Matan,
Matan matana Yakob,
Yakob matana Yusuf,
Yusuf ne, dhèu èmu Maria. Maria ne ka dhu nara iisi Yesus Kristus.
17 De karèi nèti Abraham toke Daud, abhu 14 (canguru èpa) bèi-baki; nèti Daud toke lodꞌo ra babège si asa Babel abhu 14 (canguru èpa) bèi-baki; aa nèti lodꞌo ra babège si asa Babel dꞌai Maria nara iisi Yesus, abhu 14 (canguru èpa) bèi-baki.
Maria nara iisi Lamatua Yesus
(Lukas 2:1-7)
18 Lii lolo Maria nara iisi Yesus sèmi neꞌe ka:
Maria dhu tunanga le dènge Yusuf. Dua ra paꞌèci rèdhi mèka sama sèmi dhèu èmu-kamali, te ngaa teꞌa boe na, Maria dhu dènge le babia nèti Roh Ama Lamatua dhu Mola-Mèci.✡ Lukas 1:27 19 Ropa Yusuf neꞌa, ka na neo pamaꞌète lii rèngu dua ra. Te ngaa na dꞌèi boe pamakae Maria ètu madha dhèu ae, lula nèngu ne ca dhèu dhu dꞌara mola. Nèti èèna ka, na neo pamau eele lii rèngu ne.
20 Te ngaa lodꞌo dhu na pangee era, dꞌara ca mèda sa, ka nèngu nii. Ètu dꞌara nii ne, ladhe nèdhi ana pajuu Ama Lamatua nèti sorga mai peka dènge ne, aku nèngu na, “Yusuf! Èu ne, ana-èpu dhèu aae Daud. Èu mage makae leo dènge Maria. Te ana dhu na kadꞌo èèna, jꞌajꞌi nèti Roh Ama Lamatua. 21 Bèli-camèdꞌa Maria nara iisi ana mone ca dhèu. Aa èu hudꞌi pangare Ne, Yesus, te Nèngu ka dhu patabuli dhèu unu Ama Lamatua nèti koasa sasala-sasigo ra.”‡ Ngara Yesus sasoa na, “Lamatua patabuli dhèu nèti koasa sasala-sasigo ra.”. ✡ Lukas 1:31
22 Jꞌara ne jꞌajꞌi sèmi èèna, lula Ama Lamatua dhu peka mema nèti uru ka, re dhèu nèti lii padhai Na, ngara na Yesaya, dhu suri, peka na,
23 “Mi nanene! Bèli-camèdꞌa abhu ana bhèni ca dhèu dhu kalora iisi,
teꞌa boe na, nèngu dhu dènge babia le.
Èèna na nara iisi Ana Mone ca dhèu.
Ka ra pangare Ne, Imanuel.”
(Lii Ibrani, ‘Imanuel’ sasoa na:
Ama Lamatua bera-bera dènge èdhi.)✡ Yesaya 7:14
24 Ropa nii èle, Yusuf kèdꞌi nèti bhèjꞌi na. Ka na madhutu ka lii padhai Ama Lamatua dhu na tadèngi ètu dꞌara nii deo na. Ka nare Maria jꞌajꞌi dhèu èmu na. 25 Te ngaa na jꞌunu paꞌèci boe dènge Maria, toke Maria nara iisi aaꞌi. Nara iisi nare ka, Yusuf pangare Ana ne, Yesus.✡ Lukas 2:21
*1:7-11 Sasuri lii Yunani dhu beꞌa risi, suri Asaf. Abhu sasuri cahagꞌe dhu leo, dhu suri, na, Asa. Dhèu neꞌe, èci èèna ka dènge dhèu dhu cèu dꞌara sasuri 1 Sejara nèti Israꞌel dènge Yahuda 3:10.
†1:7-11 Sasuri lii Yunani cahagꞌe suri, na, Amos. Aa abhu cahagꞌe dhu suri, na, Amon.
✡1:7-11 2 Dhèu Aae sèra 24:14-15, 2 Sejara nèti Israꞌel dènge Yahuda 36:10, Yermia 27:20
‡1:21 Ngara Yesus sasoa na, “Lamatua patabuli dhèu nèti koasa sasala-sasigo ra.”.
✡1:23 Yesaya 7:14