1 Maʌ̃ ewarid̶e Quedorlaóme abadada Elaʌ̃ druad̶ebema boro basía. Idjiare naʌ̃ bororãda panasid̶aa: Amrapel, Sinar ẽjũãnebemada; Ario, Elasar purud̶ebemada; idjab̶a Tidale, Goiʌ̃ druad̶ebemada. 2 Maʌ̃ Quedorlaómeare b̶eara Berá abada ume djõ panasid̶aa. Maʌ̃ Berára Sodoma purud̶ebema boro basía. Idjiare naʌ̃ bororãda panasid̶aa: Birsa, Gomorra purud̶ebemada; Sinabo, Admá purud̶ebemada; Semebé, Zeboiʌ̃ purud̶ebemada; idjab̶a Bela purud̶ebema boro sid̶a. Bela purura Zoar abadaa. 3 Maʌ̃gʌrãra Sidim jewed̶ad̶e jũma ãbaa dji jʌresid̶aa Pusa Beud̶a abada icawa Quedorlaómeare b̶ea ume djõni carea.

4 Maʌ̃ Quedorlaómeba Sodomanebema boroare panʌra idji jʌwaed̶a doce poa erob̶asia. Baribʌrʌ trecebema poad̶e maʌ̃gʌrãba Quedorlaómera waa ĩjãnaẽ́ basía. 5 Maʌ̃ carea poa catorcebemane Quedorlaómera idjiare panʌ bororã sid̶a wãsid̶aa ãdjirã ume djõni carea.

Wãbʌdad̶e naãrã Astarot-carnaim purud̶e jũẽsid̶aa. Mama repairãda poyasid̶aa. Mamaʌba Ham purud̶aa wãnaped̶a zuzirãda poyasid̶aa. Mamaʌba Quiriataim jewed̶ad̶e jũẽne wãnaped̶a emirãda poyasid̶aa. 6 Maʌ̃be Seír eyad̶e jũẽnaped̶a horeorãda quena wãsid̶aa ab̶a Paraʌ̃ ẽjũã ewara b̶ʌmaa. 7 Jẽda zebʌdad̶e En-mispat purud̶e jũẽsid̶aa. Maʌ̃ purura idjab̶a Cadé abadaa. Mama amalecitarãda poyad̶aped̶a jũma ãdjia eropanʌra ãrĩsid̶aa. Amorreorãda ara maʌ̃ quĩrãca osid̶aa Hazezon-tamar purud̶e.

8-9 Quedorlaómeare panʌba maʌ̃ puru b̶eara jũma poyad̶aped̶a Sidim jewed̶ad̶aa wãsid̶aa. Mama Sodomanebema boroare panʌra ãbaa dji jʌre panasid̶aa ãdjirã ume djõni carea. Sodomanebema boroare panʌra naʌ̃gʌrã basía: Gomorrad̶ebema boroda, Admánebema boroda, Zeboiʌ̃nebema boroda, idjab̶a Belad̶ebema boro sid̶a. Bela purura Zoar abadaa. Maʌ̃ bororãra juesuma panasid̶aa. Maʌ̃ne Elaʌ̃nebema boro Quedorlaómeare panʌra naʌ̃gʌrã basía: Goiʌ̃nebema boro Tidaleda, Sinard̶ebema boro Amrapelda, Elasard̶ebema boro Ario sid̶a. Ãdjira quĩmãrẽ panasid̶aa. 10 Djõbʌdad̶e Quedorlaómeare panʌba poyasid̶aa. Maʌ̃ carea Sodomanebema boroare b̶eara mĩrũ wãbʌrʌsid̶aa. Maʌ̃ Sidim jewed̶ara egorod̶ebema cãdorrona susuaid̶a b̶asia. Maʌ̃ bẽrã mĩrũ wãbʌdad̶e ʌ̃cʌrʌ maʌ̃ susuad̶e ed̶a b̶aesid̶aa. Waabemarãra eyad̶aa mĩrũ wãsid̶aa.

11-12 Maʌ̃ne Quedorlaómeare panʌba Sodomanebema nebiada, cobada sid̶a jũma jãrĩsid̶aa. Ab̶arica osid̶aa Gomorrad̶e. Maʌ̃ne Abraʌ̃ tẽãbea Lora Sodomane b̶ad̶a bẽrã Quedorlaómeare panʌba jida edesid̶aa. Ne jũma jãrĩnaped̶a wãsid̶aa.

13 Mãwãnacarea mĩrũ wãna ab̶aʌba Abraʌ̃a jũma nẽbʌrʌsia. Maʌ̃ ewarid̶e Abraʌ̃ “hebreo” abadara bacuruid̶a b̶ʌ ẽjũãne b̶abadjia. Maʌ̃ ẽjũãra Mamre abadjid̶aa Mamrera djibari bẽrã. Idji djabarãra Escol idjab̶a Aner basía. Maʌ̃gʌ amorreorãra Abraʌ̃are panasid̶aa. 14 Maʌ̃ne Abraʌ̃ba ũrĩsia Quedorlaómeare panʌba idji tẽãbeara jida eropanʌda. Maʌ̃ carea Abraʌ̃ba idji ded̶e tocuad̶a mẽsrã b̶eada 318 jʌresia. Maʌ̃be Quedorlaómeare panʌ caid̶u ẽpẽ wãsid̶aa Daʌ̃ purud̶aa. 15 Mama diamasi Abraʌ̃ba dji mẽsrã b̶eara zocãrã awara awara wãbiped̶a djõsid̶aa. Maʌ̃ne Quedorlaómeare panʌra poyad̶aped̶a dji mĩrũ wãbʌda caid̶u wãsid̶aa Hobá purud̶aa, Damasco wagaa. 16 Maʌ̃be Quedorlaómeare panʌba nebia jãrĩped̶ad̶ara Abraʌ̃ba jũma jãrĩsia. Lod̶e sid̶a jãrĩsia. Maʌ̃ne idji tẽãbea Lora, wẽrãrãda, dewara ẽberãrã sid̶a ẽdrʌ edasia.

17 Abraʌ̃ba Quedorlaómera dji bororã idjiare djõ panʌ sid̶a poyaped̶a idji druad̶aa jẽda zesia. Savé jewed̶a “Ẽberãrã Boro Jewed̶a” abadad̶e wãbʌrʌd̶e Sodomanebema boroda Abraʌ̃ audiab̶arid̶e zesia. 18 Mãwã b̶ʌd̶e Saleʌ̃nebema boro Melquisedéda zesia.* Saleʌ̃ purura idjab̶a Jerusaleʌ̃ abadaa. Maʌ̃ Melquisedéba paʌ̃da uva b̶a sid̶a enesia. Melquisedéra Ãcõrẽ dji Dromaara b̶ʌ sacerdote basía. 19 Maʌ̃ne idjia Abraʌ̃ra nãwã bia jara b̶ʌsia:

21 Mãwãnacarea Sodomanebema boroba Abraʌ̃a jarasia:

–Mʌ̃́a diadua mʌ̃ ẽberãrã ẽdrʌ edad̶ada. Baribʌrʌ bʌa nebia waya jãrĩnara edadua, mʌ̃re sid̶a edadua.–

22-23 Maʌ̃ne Abraʌ̃ba Sodomanebema boroa jarasia:

–Edaẽ́a. Mʌ̃a wãrã arada Ãcõrẽ dji Dromaara b̶ʌ, naʌ̃ ẽjũã idjab̶a bajã od̶a ume nãwã bed̶ea b̶ʌsia: mʌ̃a bʌrera edaẽ́a. Ni maãrĩara quiru sid̶a edaẽ́a. Bʌ jĩrũne jʌ̃bari jʌ̃cara sid̶a edaẽ́a. Mãwã edaẽ́a bʌa jararãmãrẽã mʌ̃ra ne bara b̶ʌsida. 24 Mʌ̃ nezocarãba coped̶ad̶a awara mʌ̃a waa quĩrĩãẽ́a. Baribʌrʌ mʌ̃are djõ panana Anerba, Escolba, Mamre bid̶a ara ãdjia quĩrĩãbʌdada edad̶ia.–