1 Mãwãnacarea Abraʌ̃ba cãĩmocara quĩrãca Ãcõrẽba idjía nãwã bed̶eabʌrʌda unusia:

–Abraʌ̃, wayarãdua. Mʌ̃ra bʌ wagabaria. Mʌ̃a bʌra aud̶uara ne bara b̶ʌya.–

2 Maʌ̃ne Abraʌ̃ba jarasia:

–Ay, Ãcõrẽ, ¿cãrẽ cãrẽã mʌ̃ra ne bara b̶ʌi? Mʌ̃ra warra sid̶a neẽ́ b̶ʌa. Mʌ̃ beud̶acarea mʌ̃a erob̶ʌra mʌ̃ nezoca Elieze Damasco purud̶ebemaba jũma edaya.–

3 Idjab̶a Abraʌ̃ba jarasia:

–Bʌa mʌ̃́a warra unubiẽ́ b̶ʌ bẽrã mʌ̃a erob̶ʌra nezoca mʌ̃ ded̶e tod̶aba jũma edaya.–

4 Maʌ̃ne Ãcõrẽba Abraʌ̃a jarasia:

–Eliezeba bʌa erob̶ʌra edaẽ́a, ãtebʌrʌ bʌ warra araba edaya.–

5 Maʌ̃be dajadaa edeped̶a Ãcõrẽba jarasia:

–Bajãnaa acʌdua, maʌ̃be chĩdauda jũma poya juachaibʌrʌ, juachadua. Jãʌ̃ chĩdau zocãrã b̶ʌ quĩrãca bʌd̶eba yõbʌdarã sid̶a zocãrã duanania.–

6 Abraʌ̃ba Ãcõrẽra wãrãda ĩjãsia. Maʌ̃ carea Ãcõrẽba idjira jipa unusia.* Hebreo bed̶ead̶e Abraʌ̃ trʌ̃ba jara b̶ʌa “zeza jipa b̶ʌ.” 7 Maʌ̃be Ãcõrẽba jarasia:

–Mʌ̃ra Ãcõrẽa. Mʌ̃abʌrʌ bʌra caldeorã puru Urd̶eba ẽdrʌ enesia naʌ̃ Canaaʌ̃ ẽjũãra diai carea.–

8 Maʌ̃ne Abraʌ̃ba jarasia:

–Mʌ̃ Boro Ãcõrẽ, ¿sãwã cawai mʌ̃a naʌ̃ ẽjũãra wãrãda edaida?–

9 Ãcõrẽba panusia:

–Mʌ̃a nãwã unubiya naʌ̃ ẽjũãra diaida: enedua paca zaque poa ũbea b̶ʌda, chiwatu poa ũbea b̶ʌda, oveja umaquĩrã poa ũbea b̶ʌda, puchirãda, putuju sid̶a.–

10 Ara maʌ̃da Abraʌ̃ba maʌ̃ animarã b̶eara jũma enesia. Eneped̶a, beaped̶a, ẽsidra drapetaped̶a, orro ab̶a dewara orro ume quĩrã djica cob̶ʌsia. Ĩbanara drapetaẽ́ basía. 11 Maʌ̃ne ãgosora zesesid̶aa animarã bead̶a cod̶i carea. Zesebʌdad̶e Abraʌ̃ba ãyã jʌrecuabadjia. 12 Queubʌrʌd̶e Abraʌ̃ra bio cãĩ nũmesia. Cãĩ b̶ʌd̶e unusia bio pãĩsosoa minijĩchia nũmʌda. Maʌ̃ bẽrã bio ne wayasia. 13-15 Mãwã b̶ʌd̶e Ãcõrẽba Abraʌ̃a jarasia:

–Bʌra drõã b̶ed̶acarea necai waraga jaid̶aped̶a tʌb̶arid̶ia. Baribʌrʌ cawa b̶adua bʌd̶eba yõi purura djãrã druad̶e b̶aida. Maʌ̃ druad̶ebemarãba ãdjirãra nezocarãda b̶ʌd̶aped̶a cuatrociento poa bia mĩga eropanania.† Exodo 1:1-7; 12:40-41. Baribʌrʌ ãdjirã biẽ́ o panʌra mʌ̃a biẽ́ b̶ʌya. Maʌ̃be bʌd̶eba yõi purura mamaʌba ne bara ẽdrʌya. 16 Maʌ̃ cuatrociento poa bad̶acarea bʌd̶eba yõi purura namaa jẽda zeya. Maʌ̃ ewarid̶e mʌ̃a amorreorã naʌ̃ ẽjũãne duanʌra cawa oped̶a naʌ̃ ẽjũãra bʌd̶eba yõi purua diaya. Bʌ zocai b̶ʌ ewarid̶e mʌ̃a ãdjirãra cawa oẽ́a ãdjia cadjirua od̶ida panʌra wad̶i jũma od̶aẽ́ panʌ bẽrã.–

17 Queud̶acarea pãĩma nũmesia. Mãwã b̶ʌd̶e cawaẽ́ne cuguru waib̶ʌa cowa nũmʌda idjab̶a cãdorrona ĩbĩrã urua nũmʌ sid̶a odjad̶aped̶a dji animarã drapetad̶a ẽsi wãsid̶aa. 18 Ara maʌ̃ba Ãcõrẽba Abraʌ̃ ume nãwã bed̶ea b̶ʌsia:‡ Maʌ̃ ewarid̶e ẽberãba dewara ume bed̶ea b̶ʌbʌrʌd̶e Abraʌ̃ba od̶a quĩrãca animarãda beabadjid̶aa. Bead̶aped̶a, drapetad̶aped̶a, orro ab̶a dewara orro ume quĩrã djica cob̶ʌbadjid̶aa. Maʌ̃be dji bed̶ea b̶ʌ panʌ ẽberãrãra animarã ẽsi wãbadjid̶aa. Ẽsi wãbʌdad̶e jarabadjid̶aa ãdjia bed̶ea b̶ʌped̶ad̶ara wãrãda od̶ida. Maʌ̃ awara jarabadjid̶aa ab̶aʌba maʌ̃ bed̶ea b̶ʌd̶ara oẽ́bʌrʌ, beuida b̶ʌda dji animarã beud̶a quĩrãca. Jeremia 34:18-19.

–Wãrãda mʌ̃a bʌd̶eba yõi purua naʌ̃gʌ ẽjũãra diaya Egipto quĩrãpe b̶ʌ dod̶eba ab̶a do waib̶ʌa Euprate abadad̶aa. 19 Quenitarã, quenizirã, cadmoneorã, 20 hititarã, perezeorã, repairã, 21 amorreorã, cananeorã, gergeseorã, jebuseorã ẽjũã sid̶a mʌ̃a bʌd̶eba yõbʌdarãa jũma diaya.–