1 Jacoboba unusia Esaúra idji cuatrociento ẽberãrã ume zebʌrʌda. Maʌ̃ carea Jacoboba idji warrarãra ãdjirã papa ume awara awara b̶ʌsia. 2 Dji nezocawẽrãrã umé panʌda ãdji warrarã ume nocoare b̶ʌsia. Ãdjirãare Leada idji warrarã ume b̶ʌsia. Jĩrũare Raquelda idji warra Jose ume b̶ʌsia.

3 Maʌ̃be Jacobora ãdjirã na wãsia. Idji djaba waya b̶ʌd̶eba chĩrãborod̶e cob̶eped̶a b̶arima siete egode b̶arru cob̶e eda wãsia ab̶a idji djaba caita jũẽbʌrʌd̶aa. 4 Baribʌrʌ Esaúra araa pira wãsia Jacobo audiab̶arid̶e. Ojũẽped̶a uridarrad̶e isõped̶a ãdji umena b̶ʌsrid̶aba jĩãsid̶aa. 5 Mãwã panʌne Esaúba Jacobo wẽrãrãra, jũma idji warrarã sid̶a unuped̶a iwid̶isia:

–Za panʌra ¿cai?–

Jacoboba panusia:

–Mʌ̃ boro, naʌ̃gʌrãra mʌ̃ warrarãa, Ãcõrẽba idji biad̶eba mʌ̃́a diad̶aa.–

6 Jacobo nezocawẽrãrãra ãdji warrarã ume Esaúmaa wãnaped̶a wayaad̶eba egode chĩrãborod̶e b̶arru copanesid̶aa. 7 Maʌ̃are Leada idji warrarã sid̶a wãnaped̶a chĩrãborod̶e b̶arru copanesid̶aa. Jĩrũare Joseda Raquel sid̶a wãnaped̶a chĩrãborod̶e b̶arru copanesid̶aa.

8 Maʌ̃be Esaúba iwid̶isia:

–Mʌ̃a animarã cãbana ota unucuad̶ara bʌa ¿cãrẽ crĩchad̶eba jãwã diabuesi?–

Jacoboba panusia:

–Mʌ̃ boro, jãwã osia bʌra mʌ̃ ume bia b̶amãrẽã.–

9 Esaúba jarasia:

–Crĩcharãdua, djaba, mʌ̃a ad̶uba erob̶ʌa. Bʌdjid̶era wagadua.–

10 Jacoboba jarasia:

–Mãwãẽ́a. Bʌda mʌ̃ ume bia b̶ʌbʌrʌ, mʌ̃a dia b̶ʌra edadua. Mʌ̃maarã bʌ unubʌrʌra Ãcõrẽ quĩrãdarra unubʌrʌ quĩrãca b̶ʌa, bʌa mʌ̃ra bia edad̶a bẽrã. 11 Mʌ̃ quĩrã djuburia, bʌ itea enenara edadua. Ãcõrẽba mʌ̃ra bio careba b̶ʌ bẽrã ne jũmada erob̶ʌa.–

Jacoboba maʌ̃ra ara pichia jara b̶esia ab̶a Esaúba edabʌrʌd̶aa.

12 Maʌ̃be Esaúba jarasia:

–Wãna. Mʌ̃ra bʌ na nĩbaya.–

13 Jacoboba jarasia:

–Mãwãẽ́a, mʌ̃ boro. Bʌa unu b̶ʌa mʌ̃ warrarãra wad̶i caibe qued̶eada, idjab̶a mʌ̃ ovejaba, mʌ̃ paca bid̶a warra djiwid̶i tod̶ada erob̶eada. Isabe wãnibʌrʌ jũmawãyã sẽnia. Maʌ̃ba ab̶ari ewarid̶e mʌ̃ animarãra jũma quininia. 14 Maʌ̃ bẽrã, mʌ̃ boro, bʌra mʌ̃ na wãdua. Mʌ̃ra pĩãca caid̶u wãya mʌ̃ animarã, mʌ̃ warrarã nĩbabada quĩrãca. Maʌ̃be Seír druad̶e bʌ b̶abarima dji ununia.–

15 Maʌ̃ne Esaúba jarasia:

–Mʌ̃a ẽberãrã mʌ̃ ume zeped̶ad̶ada ameya bãrã wagad̶amãrẽã.–

Jacoboba jarasia:

–Mãwãẽ́a, mʌ̃ boro. Bʌra mʌ̃ ume bia b̶ed̶a bẽrã ¿cãrẽda waa iwid̶i?–

16 Ara maʌ̃ ewarid̶e Esaúra Seír druad̶aa jẽda wãsia. 17 Baribʌrʌ Jacobora Suco purud̶aa wãsia. Mama deda osia idjab̶a de zaquerãda idji animarã itea ocuasia. Maʌ̃ carea mama trʌ̃ b̶ʌsia Suco.* Hebreo bed̶ead̶e Suco trʌ̃ba jara b̶ʌa “de zaquerã.”

18 Mãwãnacarea Jacobora Siqueʌ̃ purud̶aa wãsia. Mãwã Araʌ̃ druad̶e b̶ad̶ada jẽda zeped̶a Canaaʌ̃ druad̶e bia jũẽsia. Siqueʌ̃ puru quĩrãpe idji wua dera osia. 19 Dji ẽjũãda Hamo warrarãne basía. Hamora Siqueʌ̃ zeza basía. Jacoboba maʌ̃ ẽjũãra nẽdosia cien parata torrobari. Nẽdoped̶a idji wua ded̶e mama b̶esia. 20 Mama Jacoboba mõgarada ʌ̃tʌ pã buesia Ãcõrẽa bia bed̶eai carea. Maʌ̃ mõgara ʌ̃tʌ pã bued̶ara trʌ̃ b̶ʌsia El-Elohe-Israel.† El-Elohe-Israel. Maʌ̃ trʌ̃ba jara b̶ʌa “Ãcõrẽra Israel Ãcõrẽa” idjab̶a “Israel Ãcõrẽra dji Ʌb̶ʌaa.”