49
Jacoboba idji warrarã sãwãni jarad̶a
1-2 Maʌ̃be Jacoboba jũma idji warrarã trʌ̃bigaped̶a jarasia:
–Mʌ̃ warrarã, mʌ̃ bed̶ea ũrĩne caita zed̶adua. Mʌ̃a jaraya nocoarebema ewarid̶e bãrãra sãwãnida.
3 Rubeʌ̃, bʌra mʌ̃ warra iwinaa. Mʌ̃ drõã bad̶acarea bʌdrʌ naãrã unusia.
Mʌ̃ ʌb̶ʌara bʌd̶eba unubi b̶ʌa. Bʌdrʌ biara wayabadaa. Bʌra dji dromaara b̶ʌa.
4 Baribʌrʌ do zebʌrʌd̶e poyad̶aca quĩrãca bʌa ara bʌdji cacuara poyaẽ́ basía. Bʌra mʌ̃ wẽrã ume cãĩsia.
Mʌ̃ cʌd̶ad̶e cadjiruada osia.* Genesi 35:22. Maʌ̃ carea bʌra bʌ djabarãnebemada dji dromaara b̶aẽ́a.
5 Simeoʌ̃, Levi, bãrãba ab̶ari crĩchada jʌrʌbadaa. Bãrãra bed̶ea ausid̶aa biẽ́ od̶i carea.
6 Quĩrũbid̶eba bãrãba ẽberãrãra quenasid̶aa.† Genesi 34:25-31. Bãdji quĩrĩãã paca jĩrũ quẽgura necoba tʌcuasid̶aa.
Bãrã ãbaa dji jʌrebʌdad̶e mʌ̃ra ed̶a b̶aẽ́a. Bãrãba crĩcha panʌ quĩrãca mʌ̃a oẽ́a.
7 Bãrãra cadrʌa panʌ bẽrã djãrãra jũmawãyã biẽ́ obadaa. Maʌ̃ carea bio biẽ́ panania. Mʌ̃a bãrã ẽberãrãra jũma israelerã tãẽna wãbiya.
8 Juda, bʌ dji quĩrũrãda bʌ jʌwaed̶a erob̶aya. Bʌ djabarãba wayaad̶eba bʌ quĩrãpita b̶arru copanenaped̶a bia jarad̶ia.
9 Juda, bʌra imama quĩrãca b̶ʌa. Imamara ne beaped̶a, ne coped̶a jãwũãbaria. Maʌ̃be egode chũmeped̶a ʌ̃nãũbaria.
¿Caiba idjira mĩã sẽi? Ara maʌ̃ quĩrãca bʌa ẽberãrãra poyaped̶a ʌ̃nãũya, dewararãba wayad̶i bẽrã.
10 Ni ab̶aʌba dji boro bacuru Juda jʌwad̶e b̶ʌra jãrĩnaẽ́a. Idjid̶eba yõbʌdarãba maʌ̃ bacurura ewariza erob̶ead̶ia.
Maʌ̃ bacuru djibari zebʌrʌd̶e jũmarãba idji bed̶eara ĩjã o duanania.‡ Maʌ̃ bacuru djibari. Hebreo bed̶ead̶e jara b̶ʌa “Silo.” Maʌ̃ bed̶eaba jara b̶ʌra ebud̶a b̶ʌẽ́a.
11 Juda ẽberãrãra bio bara panania. Ãdji uvara bio zaui bẽrã ãdji burro zaquera uva jʌ̃carama jʌ̃nia jõnamãrẽã.
Uva b̶a sid̶a bio barai bẽrã ãdjirãba quĩrĩã panʌbara ãdji wuara uva b̶ad̶e tãtocasid̶aa.
12 Ãdjirã daura uva b̶a cãyãbara purea pãĩmaara b̶ead̶ia. Ãdjirã quid̶ara totroa b̶ead̶ia paca jub̶a quĩrãca.
13 Zabuloʌ̃, bʌ ẽberãrãda pusa icawa duanania. Ãdji druad̶e barcora necai wib̶arid̶ia. Ãdji ẽjũãra ab̶a Sidoʌ̃ drua daucha b̶aya.
14 Isacar, bʌra burro quĩrãca zarea b̶ʌa. Baribʌrʌ bʌa atau b̶ʌ edre tab̶abaria.
15 Bʌ ẽberãrãba ẽjũã biada ʌ̃nãũni carea unubʌdad̶e ãdjirãra nezocarãda duanenia. Maʌ̃ne ed̶aa jũrã tʌd̶ia ne ataud̶i carea.
16 Daʌ̃, bʌ purura jipa pe erob̶aya waabema israelerãba ãdji puru obada quĩrãca.
17 Daʌ̃, bʌ ẽberãrãra minijĩchia panania dama o icawa b̶ʌ quĩrãca.
Damaba cawayora jĩrũne caped̶a dji cawayo ʌ̃rʌ̃ chũmʌra ud̶u b̶aebibaria.
Ab̶ari quĩrãca bʌ ẽberãrãra zocãrãẽ́ panʌmĩna mẽsrã panania.
18 ¡Ay Ãcõrẽ, mʌ̃a jʌ̃ã b̶ʌa bʌa mʌ̃ra ẽdrʌ b̶ʌmãrẽã!
19 Ga, dewararãba bʌ purura urad̶e zed̶imĩna bʌ ẽberãrãba ãdjirãra poyad̶ia.
20 Aser, bʌ ẽberãrãba cod̶ira dji bia baya. Maʌ̃da ẽberãrã bororãa cobigad̶ia.
21 Neptali, bʌ ẽberãrãra b̶egui mẽã nĩbabari quĩrãca duanʌa. Ãdji warrarãra quĩrãwãrẽã qued̶eaa.
22 Jose, bʌra bacuru do icawa b̶ʌ quĩrãca b̶ʌa. Dji jʌwatera bia zaubaria, mõgara puru aud̶u jũrã ca b̶ʌ cãyãbara ʌ̃tʌara waribaria.
23 Cha drʌ cawa b̶eaba bʌra bariduaareba chaba drʌ panesid̶aa. Bʌra quĩrãma panasid̶aa.
24 Baribʌrʌ bʌ enedrʌmara bio enatʌ eronũmasia jʌwa wẽsa ãdjimaa drʌi carea.
Bʌa ãdjirãra poyasia mʌ̃ Ãcõrẽ ne jũma poya b̶ʌba bʌra carebad̶a bẽrã, dadji israelerã wagabari Ãcõrẽba bʌra waga b̶ʌ bẽrã, dadji israelerã Ãcõrẽ mõgara droma quĩrãca b̶ʌba bʌra jũãtrʌ erob̶ʌ bẽrã.
25 Bʌ zezaba ĩjã b̶ʌ Ãcõrẽneba bʌa poyasia. Ara maʌ̃ Ãcõrẽba bʌra carebaya.
Ãcõrẽ ne jũma poya o b̶ʌba bʌ ẽberãrãa bajãneba cueda diaya. Idjab̶a naʌ̃ ẽjũãne baidoda diaya.
Bʌd̶eba yõbʌda wẽrãrãba, bʌ animarã b̶ea bid̶a warrarãda zocãrã to b̶ead̶ia idjab̶a ju dawa b̶ead̶ia.
26 Jose, mʌ̃a bʌra biara jara b̶ʌsia mʌ̃ djibarirãba mʌ̃ bia jara b̶ʌped̶ad̶a cãyãbara.§ Hebreo bed̶ead̶e maʌ̃ versículora ebud̶a b̶ʌẽ́a.
Eya jõca quĩrãca bʌ bia jara b̶ʌd̶ara jõca baya, bʌ djabarã cãyãbara bʌdrʌ Ãcõrẽba biara b̶ʌd̶a bẽrã.
27 Benjamiʌ̃, bʌra usa cadrʌa quĩrãca b̶ʌa. Usa cadrʌaba diaped̶a bead̶ara coped̶a dji ad̶ubad̶ada quewara jed̶ecabaria.
Ara maʌ̃ quĩrãca bʌa dji quĩrũra poyaped̶a ãdji nebiada jed̶ecaya.–
28 Mãwã Jacoboba idji warrarãra bia jara b̶ʌsia. Ãdjiza idjia arid̶e jarasia. Idji warrarã doce panʌneba yõped̶ad̶ara Israel puru doce panasid̶aa.
Jacobo jaid̶ad̶a
29-32 Maʌ̃be Jacoboba idji warrarãa jarasia:
–Mʌ̃ra beubʌrʌa. Mʌ̃ra tʌb̶arid̶adua mʌ̃ drõãenabemarã tʌb̶ariped̶ad̶ama Macpela ẽjũã uriad̶e. Macpelara Canaaʌ̃ne b̶ʌa Mamred̶eba ʌ̃mãdau odjabariare. Abrahaʌ̃ba maʌ̃ ẽjũãra dji uria sid̶a hitita Eproʌ̃ne b̶ad̶ada nẽdosia idji quima tʌb̶ari carea.* Genesi 23:1-20. Mama Abrahaʌ̃ sid̶a tʌb̶arisid̶aa. Mʌ̃ zeza Isara, dji quima Rebeca sid̶a mama tʌb̶arisid̶aa. Mʌ̃a Lea sid̶a mama tʌb̶arisia.–
33 Jacoboba idji warrarãa mãwã jaraped̶a idji cʌd̶ad̶e wayacusa tab̶esia. Tab̶eped̶a jaid̶asia.