1 Maʌ̃ne Joseba idji zezara bʌrʌ edaped̶a jĩã b̶ʌba isõsia. 2 Mãwãnacarea Joseba dji nẽãrã obadarãa idji zeza Israel cacuara pʌrʌbisia b̶erawarãmãrẽã. Ara maʌ̃da pʌrʌ panesid̶aa. 3 Cuarenta ewari mãwã pʌrʌ panasid̶aa, jũma daucha oi carea dãrãbari bẽrã. Jũma ãbaa egiptorãra setenta ewari Jacobo carea sopua ewarida wagasid̶aa. 4 Sopua ewari jõnacarea Joseba Egiptod̶ebema boro ded̶e panabadaa jarasia:

–Mʌ̃ djuburia, dadjirã boroa nãwã jarad̶adua: 5 “Mʌ̃ zezaba mʌ̃́a wãrãneba jarabisia idjira Canaaʌ̃ druad̶e tʌb̶arid̶e edemãrẽã. Idjia jarasia: ‘Mʌ̃ra beuya. Canaaʌ̃ druad̶e mʌ̃a joubada uriada erob̶ʌa. Mama mʌ̃ra tʌb̶aridua.’ Maʌ̃ carea mʌ̃a bed̶ea djuburiaya idu mʌ̃ zeza tʌb̶arid̶e wãbimãrẽã. Tʌb̶ariped̶a waya zeya.”–

6 Ãdjia Egiptod̶ebema boroa mãwã jaraped̶ad̶acarea dji boroba Josea jarasia:

–Bʌ zeza tʌb̶arid̶e wãdua idjia bʌ́a wãrãneba jarabid̶a quĩrãca.–

7 Ara maʌ̃da Josera idji zeza tʌb̶arid̶e wãsia. Idji ume wãbʌrʌsid̶aa jũma Egiptod̶ebema boroare b̶eada, dji boro ẽberãrãnebema dji dromarãda, jũma Egipto druad̶ebema dji dromarã sid̶a. 8 Jose ẽberãrãda, idji djabarãda, idji zeza ẽberãrã sid̶a jũma wãbʌrʌsid̶aa. Ãdji warrarãda, ãdji ovejada, ãdji paca sid̶a Goseʌ̃ne amesid̶aa. 9 Carretad̶eba djõbadarãda idjab̶a cawayod̶eba djõbadarã sid̶a Jose ume wãsid̶aa. Ẽberãrãra bio cãbana wãsid̶aa.

10 Wãbʌdad̶e trigo tẽũbada Atad abadama jũẽsid̶aa. Maʌ̃gʌra Jordaʌ̃ dod̶eba ʌ̃mãdau odjabariare b̶ʌa. Mama Josera waabemarã sid̶a idji zeza Jacobo carea wayacusa aujĩãsid̶aa. Siete ewari bio ororoa aujĩãsid̶aa. 11 Mamabema cananeorãba ãdji bio ororoa aujĩã duanʌra ũrĩsid̶aa. Maʌ̃ bẽrã jarasid̶aa:

–Egiptorãda sopuaba bio jĩãbi ororoa duanʌa.–

Maʌ̃ carea Atad ẽjũãra trʌ̃ b̶ʌsid̶aa Abel-mizraiʌ̃.* Hebreo bed̶ead̶e Abel-mizraiʌ̃ trʌ̃ba jara b̶ʌa: “Egiptorã aujĩãped̶ad̶a.”

12 Jacobo warrarãba ãdji zezaba jarad̶a quĩrãca osid̶aa. 13 Idji cacuara edesid̶aa Canaaʌ̃ druad̶aa. Maʌ̃be Macpela joubada uriad̶e tʌb̶arisid̶aa. Dji ẽjũãra Mamred̶eba ʌ̃mãdau odjabariare b̶ʌa. Abrahaʌ̃ba maʌ̃ ẽjũãra, dji uria sid̶a hitita Eproʌ̃ne bad̶ada nẽdosia idji ẽberãrã jaid̶abʌdada tʌb̶ari carea. 14 Jacobo tʌb̶ariped̶ad̶acarea Josera, idji djabarã, waabemarã sid̶a waya Egipto druad̶aa wãsid̶aa.

15 Ãdji zezara beud̶a bẽrã Jose djabarãba nãwã crĩcha panesid̶aa: “Ãĩbẽrã Joseba dadjirãra quĩrãma b̶ʌa. Ʌ̃rãbʌrʌ dadjirãra biẽ́ oya idji biẽ́ oped̶ad̶a carea.” 16-17 Maʌ̃ bẽrã naʌ̃ bed̶eada Josemaa diabuesid̶aa: “Dadji zeza jaid̶ai naẽna daia jarasia bʌ́a nãwã jarad̶amãrẽã: ‘Bʌ djabarãba wãrãda cadjirua oped̶ad̶amĩna mʌ̃ djuburia maʌ̃ra quĩrãdoadua.’ Maʌ̃ bẽrã dai djuburia, bʌ biẽ́ oped̶ad̶ara quĩrãdoadua. Daira dadji zeza Jacoboba ĩjã b̶ad̶a Ãcõrẽ nezocarãa.”

Maʌ̃ ũrĩbʌrʌd̶e Josera jĩãsia.

18 Maʌ̃be Jose djabarãra idjimaa wãsid̶aa. Ne wayaad̶eba idji quĩrãpita chĩrãborod̶e copanenaped̶a jarasid̶aa:

–Daira bʌ nezocarãa.–

19 Maʌ̃ne Joseba panusia:

–Wayarãnadua. Mʌ̃ra Ãcõrẽẽ́a bãrã cawa oi carea. 20 Bãrãba mʌ̃ra biẽ́ od̶ida crĩchasid̶aa baribʌrʌ maʌ̃ biẽ́ oped̶ad̶ad̶eba Ãcõrẽba biada osia maʌ̃neba zocãrã ẽberãrãda jarrababa beud̶id̶ebemada ẽdrʌ edai carea. Maʌ̃gʌra bãrãba naʌ̃ ewarid̶e unu panʌa. 21 Wayarãnadua. Mʌ̃a bãrãra careba b̶aya. Mʌ̃a dia b̶aya bãrãra, bãrã warrarã sid̶a ne cod̶amãrẽã.–

Mãwã quĩrĩãneba jarad̶a bẽrã Joseba ãdjira sobiabisia.

22 Josera, idji zeza ẽberãrã sid̶a Egiptod̶e panesid̶aa. Josera ciento die poa b̶asia. 23 Beui naẽna idji warra Epraiʌ̃ wiuzaquerãra, ãdji warrarã sid̶a unusia. Idjab̶a Manase wiuzaquerã sid̶a unusia. Ãdji zezara Maquir basía. Joseba maʌ̃gʌrãra idji b̶acarad̶e edaped̶a idji warrarã araad̶a asia.

24 Ewari ab̶a Joseba idji djabarãa jarasia:

–Mʌ̃ra dãrãẽ́ne beuya, baribʌrʌ Ãcõrẽba bãrãra carebaya. Idjia bãrãra, bãrãneba yõbʌdarã sid̶a naʌ̃ druad̶eba Canaaʌ̃ druad̶aa edeya. Maʌ̃ druara idjia Abrahaʌ̃a, Isaa, Jacoboa bid̶a wãrãneba diai jarasia.–

25 Maʌ̃ne Joseba Israel ẽberãrãa jarasia:

–Wãrãda Ãcõrẽba bãrãra carebaya. Maʌ̃ ewarid̶e bãrãba mʌ̃ b̶ʌwʌrʌra namaʌba Canaaʌ̃ druad̶aa tʌb̶arid̶e eded̶adua.–

Maʌ̃gʌra Joseba Israel ẽberãrãa wãrãneba jarabisia.

26 Jose ciento die poa b̶ʌda Egipto druad̶e jaid̶asia. Idji cacuara nẽãrãba pʌrʌsid̶aa b̶erawarãmãrẽã. Pʌrʌd̶aped̶a cajona biad̶e b̶ʌsid̶aa.